Тихэгъэгу и Президент ихэдзынхэу щыIэщт­хэм ахэлэжьэн мурад зэриIэмкIэ Владимир Путиным макъэ къыгъэIугъ.

Урысыем и ЛIыхъужъхэм бгъэхалъхьэу «Дышъэ Жъуа­гъор» Кремлым защыретыжьы нэуж ДНР-м ипарламент ипащэу, «Спартэм» икомбатэу Артем Жогэ къэбарыр къэралыгъо пащэм къыриIуагъ. Тыныр зыфагъэшъошагъэхэр Президентым къызекIолIэжьыхэ нэуж Жогэ Владимир Путиным къе­лъэIугъ хэдзынхэм ахэлэжьэнэу. Ащ илъэIукIэ нэмыкIхэри къыгоуцуагъэх, Президентыр къешIугъ.

«Типащэ лъэныкъо пстэумкIи детэгъаштэ! Ти Хэгъэгу гупсэ инеущырэ мафэ зыфэдэщтым ыгъэгумэкIырэ пстэуми къэралы­гъом ипащэ иеплъыкIэхэм зэра­дырагъаштэрэм сицыхьэ телъ.

Мы аужырэ илъэсхэм Адыге­им фэхъугъэ зэхъокIыныгъэшIу­хэр Владимир Путиныр кIэщакIо зыфэхъугъэ Iофтхьабзэхэр гъэ­цэкIагъэ зэрэхъухэрэм бэкIэ елъытыгъэх. ЦIыфхэми цыхьэшхоу фашIырэр ащ епхыгъэу щыт. ЗэхъокIыныгъэхэр цIыфхэм янэрылъэгъух ыкIи ахэм къагурэIо зыпкъитыныгъэ зы­хэлъ политикэ курсым тапэкIи хэхъоныгъэу тшIыщтыр зэре­лъытыгъэр.

Ти Президент типащэу ткIуа­чIэ зэдгъэуIумэ, уахътэм къыгъэуцурэ гумэкIыгъохэр щыд­гъэзыенхэ, джыри нахь лъэш тыхъун, дунаим чIыпIэу щы­тыубытырэр нахь пытэ тшIын зэ­рэтлъэкIыщтым сицыхьэ телъ. Тихэгъэгу иамалышхохэм зядгъэушъомбгъущт, цIыфхэр къызэрэтщыгугъхэрэр къэдгъэ­шъып­къэжьхэзэ, Iофыгъохэу къэуцухэ­рэр зэкIэ нахь шIогъэ ин хэ­лъэу зэшIотхыщтых. Типытагъэ, ткIуа­чIэ нахь хэдгъэхъон фае.

Урысые Федерацием и Президентэу Владимир Путиным къыгъэуцурэ стратегическэ пшъэ­рылъхэм язэшIохын иIахьы­шхо хишIыхьаным Адыгеир фэхьазыр. Тызэгъусэмэ, хэти къыттекIон ылъэкIыщтэп!» — къыIуагъ КъумпIыл Мурат.

Урысыем и Президент ихэ­дзынхэр 2024-рэ илъэсым игъэт­хэпэ мазэ и 17-м щыIэщтых.

В. Путиным ащ текIоныгъэ къаз­щыдихыкIэ, къэралыгъом и Конституцие къызэрэдилъытэу, Урысыем 2030-рэ илъэсым нэс ипэщэщт.