Режиссерэу Михаил Тюркиным ыгъэу­цугъэ спорт-патриотическэ фильмэу «Финт Боброва» зыфиIорэр Мыекъуапэ икIэлэеджэкIо 200 фэдизмэ культурэм и Унэу «Гигантым» тыгъуасэ къащыфагъэлъэгъуагъ.

Iофтхьабзэр зэлъашIэрэ спорт­сменэу Всеволод Боб­ровым ыныбжь илъэси 101-рэ зэрэхъурэм фэгъэхьыгъ. ЦIыф­хэм социальнэ IэпыIэгъу ягъэгъотыгъэнымкIэ мысатыу организациеу «За жизнь» зыфиIорэр ащ кIэщакIо фэхъугъ.

Мы организацием ипащэу Екатерина Метасевам къызэри­IуагъэмкIэ, мы фильмыр джыри прокатым къыщагъэлъэгъуагъэп, ау режиссерым Адыгеим шъхьэ­кIафэ къызэрэфишIырэм къы­хэкIэу кIэлэеджакIохэм къафагъэлъэгъонэу Iизын къаритыгъ.

— Мы фильмым шъузеплъырэ нэужым спорт ыкIи творческэ сэнаущыгъэу шъухэлъхэм зяжъугъэушъомбгъунымкIэ кIуа­чIэ къызхэжъугъотэнэу тэгугъэ. Шъуинеущрэ мафэ гъэпсыгъэныр шъо къышъолъытыгъ, шъу­кIуачIэ къыхьыщтыр зэрэгъунэнчъэм шъуицыхьэ тежъугъэлъ, лъэгапIэхэм шъуафакIу! — къы­Iуагъ ныбжьыкIэхэм закъыфигъазэзэ Екатерина Мета­севам.

Фильмэу «Финт Боброва» зы­фиIорэр зыфэгъэхьыгъэ Всеволод Бобровыр футболымкIэ ыкIи хоккеимкIэ СССР-м ихэшыпыкIыгъэ олимпийскэ командэхэм якапитаныгъ. Всеволод Михаил ыкъом зыфэдэ щымыIэ гъэхъагъэу ышIыгъэхэр спортым итарихъ хэхьагъэх. Режиссерэу М. Тюркиным фильмэу «Финт Боброва» зыфиIорэр ыгъэуцунымкIэ гушхуагъэ къезытыгъэр капитаным игъэхъагъэхэр ары.

ЗэлъашIэрэ спортсменым ищыIэныгъэ къыхэхыгъэ хъу­гъэ-шIэгъэ шъыпкъэхэр фильмым лъапсэ фэхъугъэх ыкIи спортым хэхъоныгъэ ышIынымкIэ иIа­хьы­шIоу хилъхьагъэр, сэнаущыгъэу, гъэхъагъэу иIэхэр къыщыреIотыкIых.

Iэшъынэ Сусан.