Хэгъэгум и ЛIыхъужъхэм я Мафэ Урысыем щыхагъэунэфыкIы зэрэхъугъэм имэхьанэ нахь зыкъезгъэ­Iэ­тыгъэхэм ащыщ хэушъхьафыкIыгъэ дзэ операциер.

Мы мафэм СССР-м ыкIи Урысыем я ЛIыхъужъхэр, Щытхъум ыкIи шыихъэу Георгий яорденхэм якавалерхэр агу къагъэкIыжьых, непэ къытхэтхэм ящытхъу аIо.

«ЛIыхъужъэу къэхъухэрэп, лIы­хъужъ мэхъух» зыфиIорэ гущыIэжъыр тызхэт лъэхъаным бэрэ агъэфедэу зэхэтэхы. Сыда пIомэ а гущыIэхэр зыфэбгъэхьы хъущт нэбгырабэхэр непэ тищыIэныгъэ къыхэуцуагъэх. Хэу­шъхьафыкIыгъэ дзэ операцием хэлэжьэрэ тидзэкIолIхэр язе­кIуакIэкIэ лIыхъужъ шъып­къэх. Пшъэрылъ къызэрымыкIохэр агъэцакIэх, мамыр щы­IакIэм фэбанэх, афэлъэкIырэмкIэ пыир зэхакъутэ, къауIэгъэ яныбджэгъухэм апсэ къызэтырагъэнэным фэгуIэх.

ГухэкI нахь мышIэми, ахэм ащыщыбэхэм ядэжь къагъэзэ­жьыгъэп. Мамырныгъэ тиIэным пае нацизмэм пэуцужьыхэзэ, зыпсэ зытыгъэхэм зэрахьэгъэ лIыхъужъныгъэм къапэблагъэхэр рэгушхох ыкIи егъашIэм ащыгъупшэщтхэп.

Дзэ операциер зырагъэжьагъэм къыщыублагъэу непэ къыз­нэсыгъэм Шэуджэн районым щыщ Нэгъэрэкъо Ислъам ащ хэлажьэ. А уахътэм къыкIоцI кIэлэ ныбжьыкIэр зэзэгъыны­гъэм тIогъогогъо кIэтхэнэу игъо ифагъ.

Ар зыгъэпсэфыгъом къэкIуа­гъэу тытефи зыIудгъэкIагъ, гущыIэгъу тыфэхъугъ.

ЗэзэгъыныгъэкIэ къулыкъур къыхэзыхыгъэ дзэкъулыкъушIэ­хэм ыкIи ахэм яунагъохэм къэралыгъор IэпыIэгъу афэхъу, социальнэ тын зэфэшъхьафхэр афигъэнэфагъ. Къыхэзгъэщымэ сшIоигъу, Ислъам дзэ опера­цием хэлэжьэнэу зырехъухьэм джыри ащ фэдэ ахъщэ тынхэр зэрэщымыIагъэхэр. Пыир гъу­нэгъоу зэрэщытыр, и Хэгъэгу IэпыIэгъу фэхъун, къоуцон зэ­рэфаер кIэлэ ныбжьыкIэм дэгъоу къыгурыIощтыгъэти, апэрэу дэкIыгъэ гуфакIохэм ахэ­хьанэу хъугъэ.

— Сэ къулыкъухьыным, дзэ Iофым хэшIыкI афысиIэу щы­тыгъ. 2014-рэ илъэсым Мые­къопэ къэралыгъо гуманитар-­техническэ колледжым сычIэ­хьэгъэ къодыеу бжыхьэ дзэ дэщыгъор зэрэрагъэжьагъэр зэ­хэсхыгъ. Еджэныр згъэтIылъи, къулыкъум сыкIуагъ ыкIи зэу илъэсищ пIалъэ зиIэ зэзэгъыныгъэм сыкIэтхагъ. ХэушъхьафыкIыгъэ моторизированнэ дзэ частьхэм сахэтыгъ, сипIалъэ зыщысыухырэм тефэу баталь­о­ныр зэхагъэкIыжьынэу зэхъум сыкъэкIожьыгъагъ. СиIофхэр зесфэхэзэ, Мыекъуапэ, Краснодар сащыпсэугъ. Музыкэм сыфэщагъ, орэдхэр зыщыты­ратхэрэ студие сиIэу сылажьэщтыгъ. ХэушъхьафыкIыгъэ дзэ операциер зэрэрагъэжьагъэр зэхэсхыгъ. СыгукIэ сымырэ­хьа­тэу, синыбджэгъу кIалэхэм са­фытеоу езгъэжьагъ, кIощтхэм са­кIэупчIагъ. Уикъэралыгъо къа­дзыхьагъэу сыдэущтэу гупсэфэу ущысыщта? А уахътэм гуфэкIо отрядэу зэхэхьа­гъэхэм ащыщ сыхэтэу сыкIуагъ, — къыIуагъ Ислъам.

ТигущыIэгъу апэрэ зэзэгъыныгъэр 2022-рэ илъэсым жъоныгъуакIэм зеухым къэкIожьыгъ. Бэрэ щымысэу а илъэс дэдэм шышъхьэIум зэзэгъыныгъакIэм кIэтхагъ ыкIи джы УФ-м и Лъэпкъ гвардие идзэхэм я Федеральнэ къулыкъу хэтэу хэушъхьафыкIыгъэ дзэ операцием ипшъэрылъхэр щегъэца­кIэх. Ар разведчик-снайпер.

Iоф мыпсынкIэм зэрэIууцощтыр Ислъам къыгурыIощтыгъ, ау ежь къызэрэшIощтыгъэ дэдэу къычIэкIыгъэп. Зэон Iофым кIэрахъохэм анахьи, ошъогу кIуачIэхэр зэрэщагъэфедэхэрэр ышIагъэп.

— Апэрэ уахътэм къин дэ­дагъ, — къеIуатэ Ислъам. — Мыщ щыхъурэ-щышIэрэр икъоу къыдгурыIощтыгъэп, пыйри тэтыехэри зэхэшIыкIыгъуаеу щытыгъ. Джы зэон амалхэр къыт­IэкIэхьагъэх, ары пакIошъ, тыздэщыIэ чIыпIэм щыпсэухэрэм тадэгущыIэ зыхъукIэ якъэIуа­кIэхэмкIэ уIэшыгъэр зэу къэтэшIэ. Мэхьанэшхо зиIэ чэщырэ дгъэфедэрэ пкъыгъоу тызэрыплъэхэрэ «Командарм» зыфи­Iохэрэм афэдэхэр джы къыт­IакIагъэхьагъэх. Ахэм яшIуа­гъэкIэ метрэ 2500-м нэсэу уапэ къикIырэр плъэгъун олъэкIы. Зэпэуцужьхэр чэщрэ нахь кIо­хэу мэхъу.

ДзэкъулыкъушIэхэм къызэ­рэхигъэщыгъэмкIэ, тидзэ ищыкIагъэр зэкIэ IэкIэлъ. Джащ фэ­дэу тылым къикIэу къаIукIэрэ IэпыIэгъум лъэшэу агу къыдещае. Анахь зыфезэщыхэрэ шхы­ныгъоу ащ къыIорэр уна-гъом щашIырэ стырыпсыхэр ары. Ащ фэдэхэр бгъэстыры­жьынхэ къодыеу къызаIукIэхэкIэ, лъэшэу щэгушIукIых. Тидзэ­кIолIхэр къызажэрэ зэпытхэм ащыщ кIэлэцIыкIухэм ягущыIэ фабэхэр зэрытхэгъэ письмэхэр. Мэзхэм ахэсэу, окоп куухэм адэсхэу зэпхыныгъэр щымыIэ зыхъукIэ, яджыбэхэм арылъ письмэхэр къаштэхэшъ, яджэх. Ислъам ныбжьыкIэ цIыкIухэм ягупшысэхэр шIогъэшIэгъоных. КIэлэцIыкIухэм тыдэрэ шъо­лъыри къыратхыкIы, письмэхэр зэхэпхъагъэхэу атырагуащэх. Мары бэмышIэу Хабаровскэ къикIыгъэу къытефагъэм Ис­лъам игу­гъу къытфишIыгъ. Ти­зэолIхэм ялIыхъужъныгъэ щы-сэ зэрэты­рахырэр, ТекIоныгъэр яеу къызэрагъэзэжьыщтыр ащ итхагъэх.

Мыщ фэдэ плъыр-стыр Iофхэм уахэт зыхъукIэ узэрыфэщт гузэжъогъу чIыпIэр къэшIэгъуае. Къыбгот ныбджэгъоу къыбдэзао­рэм изекIуакIэ мэхьанэшхо иI.

— Лъэпкъ зэфэшъхьафхэм къахэкIыгъэхэм тызэготых, зы пшъэрылъ зэрэдгъэцакIэрэр къыд­гурэIо. ГущыIэм пае, тэ нэбгырэ 14-у тызэхэтым ащыщ ыкIыб къызэрэсфимыгъэзэщтым сицыхьэ телъ. Сыда пIомэ щэ­рыонхэми бэрэ тахэфагъ, тIогъогогъо сыкъауIэу къыхэкIыгъ. Ау сыдигъокIи IэпыIэгъу тызэ­фэмыхъужьэу хъугъэп. Хэзгъэу­нэфыкIымэ сшIоигъу, хэушъхьафыкIыгъэ дзэ операциер зы­щырагъэжьэгъэ апэрэ мафэхэм анахьи, джы тиухъумакIохэм дзэ гушхоныгъэр, патриотизмэр лъэшэу къахэщыхэ зэрэ­хъугъэр. Теубытэгъэ пытэ ахэлъэу япшъэрылъхэр агъэцакIэх. ГуфакIохэм яшъхьэгъусэхэр зэкъохьагъэхэу шIушIэ IэпыIэгъур аугъои, яхъулъфыгъэхэм агу къыдащае, — еIо тигущы­Iэгъу.

Илъэс 27-рэ зыныбжь ухъумакIом янэ-ятэхэр, шырэ шыпхъурэ иIэх. ЯкIалэ ышIыгъэ унашъом гумэкIыгъо хидзагъэх, ау дырагъэштагъ, ялIыхъужъ рэгушхох. Ислъам зэо зэпэуцужьхэм яветеран, медальхэу «За ратную доблесть», «За участие в СВО» зыфиIохэрэр, нэмыкIхэри къыфагъэшъоша­гъэх. Джыри къэралыгъо тын лъапIэхэм ащыщ шIэхэу къыфэ­кIожьынэу ежэ.

Зыгъэпэсфыгъо тIэкIоу иIагъэри хьаулыеу ыгъэкIуагъэп. Районым иныбжьыкIэхэм афызэхащэгъэ зэIукIэгъухэм ахэлэ­жьагъ. ТидзэкIолIхэм зэра­хьэрэ лIыхъужъныгъэр къа­фиIотагъ.

ТапэкIэ гухэлъышIоу зыдиIыгъхэмкIэ Ислъам теупчIыгъ.

— Къулыкъур схьызэ, пшъэ­рылъхэр зыфэсэгъэуцужьых ыкIи ахэм сафэкIо. ПсэупIэ сищыкIагъэти зэзгъэгъотыгъ, машинэ сиIэнэу сыфэягъэти, къэсщэ­фыгъ. ТекIоныгъэр къыдэтхэу, ащ сицыхьэ телъ, хэушъхьафыкIыгъэ дзэ операциер тыухэу сыкъызыкIожьыкIэ, сызфэщэгъэ музыкэм зыфэзгъэзэжьынкIи хъун е дзэ Iофым пыз­дзэжьыщт, — къыIуагъ тигущы­Iэгъу.

ТилIыхъужъхэу зыпсэ емыблэжьыхэу текIоныгъэр къэз­гъэблагъэхэрэм ящытхъу тIоныр къалэжьыгъ. Ахэм ящыкIэгъэ IэпыIэгъур цIыф лъэпкъ зэфэшъхьафхэм къызэраугъоирэм, цIыфхэм ыкIи дзэм зыкIыныгъэ зэрахэлъым уимыгъэгушхон ылъэкIырэп!

Iэшъынэ Сусан.