Мыекъопэ къэралыгъо технологическэ университетыр къызызэIуа­хыгъэр илъэс 30 зэрэхъурэм фэгъэхьыгъэ мэфэкI Iофтхьабзэ республикэ филармонием щыкIуагъ. Адыгеим и ЛIышъхьэу КъумпIыл Мурат ащ хэлэжьагъ.

[caption id="attachment_142898" align="aligncenter" width="800"] А. Гусев[/caption]

Джащ фэдэу АР-м и Къэралыгъо Совет — Хасэм и Тхьаматэу Владимир Нарожнэр, МКъТУ-м ипрезидентэу, АР-м и ЛIышъхьэщтыгъэу, АР-м и Къэралыгъо упчIэжьэгъоу Тхьа­кIущынэ Аслъан, МКъТУ-м ирек­торэу Къуижъ Саидэ, Къыблэ федеральнэ университетым ипре­­зидентэу, Урысыем и Къы­блэ иапшъэрэ еджапIэхэм ярек­торхэм я Совет итхьаматэу Ма­рина Боровскаяр, Краснодар краимрэ Адыгеимрэ арыт апшъэ­рэ еджапIэхэм яректорхэм я Совет итхьаматэу Владимир Лобановыр, Урысыем и Къыблэ ит апшъэрэ еджапIэ­хэм яректорхэр, студентхэр, МКъТУ-м ипрофессорхэр, икIэлэегъаджэ­хэр, иIофышIэхэр мэ­фэкI Iоф­тхьабзэхэм ахэлэ­жьагъэх.

Мыекъопэ къэралыгъо технологическэ университетым ишIэныгъэлэжьхэм ясовет изэхэсыгъо рагъэжьэным ыпэкIэ Адыге­им и ЛIышъхьэу КъумпIыл Му­рат студентхэм ягъэхъагъэ­хэм уащызыгъэгъозэрэ къэгъэлъэгъоным нэIуасэ зыфишIыгъ, ныбжьыкIэхэмрэ ахэм якIэлэ­егъаджэхэмрэ адэгущыIагъ.

Республикэм и ЛIышъхьэ МКъТУ-р къызызэIуахыгъэр илъэс 30 зэрэхъурэм фэшI апшъэрэ еджапIэм ипащэхэми, иIофышIэхэми афэгушIуагъ. Университетыр Урысыем и Къыблэ итехнологическэ апшъэ­рэ еджэпIэ пэрытхэм зэращыщыр ащ къыхигъэщыгъ. Респуб­ликэм и ЛIышъхьэ зэрэхигъэу­нэ­фыкIыгъэмкIэ, наукэмкIи, егъэ­джэн IофымкIи, Адыгеим, Уры­сыем, IэкIыб къэралыгъохэм ящыкIэгъэ специалист дэгъухэм ягъэхьазырынкIи апшъэрэ еджа­пIэм гъэхъэгъэшхохэр ышIыгъэх.

«Апшъэрэ еджапIэм Iутхэр ренэу яIэпэIэсэныгъэ хагъэхъо­ным, лъэныкъуакIэхэм алъыIэсынхэм зэрэпылъхэм къыушы­хьатырэр университетыр уахътэм зэрэдэбакъорэр, обществэм къыщыхъурэ зэхъокIыныгъэхэм зэрадыригъаштэрэр, республи­кэм иэкономикэ зыфэныкъохэр къыдилъытэзэ, иIофшIэн зэригъэпсырэр ары. Ау лъэгапIэу зынэсыгъэхэм къащыуцухэ хъу­щтэп. Урысые Федерацием и Президентэу Владимир Путиным зэрэхигъэунэфыкIыгъэмкIэ, «гъэсэ­ныгъэм илъэныкъо пстэуми, IофышIэхэм ягъэхьазырыни акIуачIэу рахьылIэрэм хэгъэхъо­гъэн фае». Лъэныкъо зэфэшъхьафхэм Iоф ащызышIэщт IофышIэ дэгъухэм Адыгеир непэ афэныкъу», — къыIуагъ КъумпIыл Мурат.

Республикэм и ЛIышъхьэ сту­дентхэр зэрэрагъэджэрэ программи 150-мэ, технологиякIэхэм, урысые, дунэе научнэ сообществэм зэрэхахьэхэрэм шъхьафэу къатегущыIагъ.

Апшъэрэ еджапIэм факультет 12 зэриIэр шъугу къэтэгъэкIы­жьы. МКъТУ-м хэхьэх мединститутыр, псэупIэу Яблоновскэм дэт къутамэр, колледжи 2-р, мэкъу-мэщымкIэ шIэныгъэ-ушэтэкIо институтыр, шIэныгъэ-техническэ, опытнэ-экспериментальнэ базэр, научнэ гупчи 6-р, лабораторие 12-р, шIэныгъэ тхылъеджапIэр, ныбжьыкIэ гупчэхэр, дзэмкIэ гъэсэныгъэ зыщарагъэгъотырэ гупчэр ыкIи нэмыкIхэр. Илъэс къэс университетым специалист миным ехъу къычIетIупщы, студент мин 11-м ехъу ащ щеджэ. Лъэныкъо 14-кIэ научнэ ушэтынхэр ща­шIых. Ахэр мэкъу-мэщым, гъомылэпхъэшIыным, роботиза­цием, цифрэ технологиехэм ягъэфедэн, медицинэм, фармацием япхыгъэх.

Технологическэ предпринимательствэм IэпыIэгъу фэхъурэ программэхэр МКъТУ-м щагъэ­цакIэх. Къэралыгъо корпора-циеу «Росатомым» игъусэу про­ектэу «ШIуагъэ къытэу Iоф­шIэнхэр зэхэзыщэрэ шъолъыр» зы­фи­Iорэм Iоф дашIэ. Апшъэрэ еджапIэм процессхэмкIэ ифаб­рикэ нэбгырэ мини 3-м ехъу щеджагъ. Ахэм ащыщхэм Адыге­им и ЛIышъхьэрэ АР-м иминистрэхэм я Кабинетрэ я Администрацие Iоф щашIэ, гъэцэ­кIэ­кIо хабзэм икъулыкъухэм, Уры­сыем ишъолъыр заулэмэ гъэсэныгъэмкIэ яучреждениехэм ащэлажьэх.

ЭкономикэмкIэ, зекIонымкIэ, социальнэ лъэныкъомкIэ, псауныгъэм икъэухъумэнкIэ рес­публикэм ищыкIэгъэ IофышIэхэм ягъэхьазырын МКъТУ-м иIа­хьы­шхо зэрэхишIыхьэрэр Респуб­ликэм и ЛIышъхьэ къыхигъэ­щыгъ. КъумпIыл Мурат апшъэрэ еджапIэм Iутхэм IэпэIэсэныгъэ­шхо зэрахэлъым, гуетыныгъэ фыряIэу Iоф зэрашIэрэм афэшI зэрафэразэр къыIуагъ. Джащ фэдэу МКъТУ-р зэхэзыщагъэу, апэрэ ректорэу иIэгъэ ТхьакIущынэ Аслъанрэ джыдэдэм ирек­торэу Къуижъ Саидэрэ шъхьа­фэу «тхьашъуегъэпсэу» ари­Iуагъ.

АР-м и Къэралыгъо Совет — Хасэм и Тхьаматэу Владимир Нарожнэм МКъТУ-м иIофышIэхэми истудентхэми шIу-фэс къарихыгъ, ямэфэкIкIэ къа­фэгушIуагъ. Республикэми, хэгъэгуми апашъхьэ ит пшъэрылъхэм язэшIохын апшъэрэ еджапIэм тапэкIи нахь лъэшэу ыкIуа­чIэ зэрэрихьылIэщтым ицы­хьэ зэрэтелъыр ащ къы­Iуагъ.

МэфэкIым философиемкIэ, социологиемкIэ, педагогикэмкIэ кафедрэм ипрофессорэу, культурологиемкIэ докторэу Сихъу Аминэт щытхъуцIэу «АР-м наукэмкIэ изаслуженнэ IофышIэшху» зыфиIорэр къызэрэфа­гъэшъошагъэр къэзыушыхьа­тырэ тхылъыр щыратыжьыгъ. Прикладной информатикэмкIэ кафедрэм ипрофессорэу, экономикэ шIэныгъэхэмкIэ док­торэу Сергей Чефрановым щытхъуцIэу «АР-м иапшъэрэ еджапIэ изаслуженнэ IофышI» зыфиIорэр къыфагъэшъошагъ. Административнэ-хъызмэт Iоф­хэмкIэ проректорэу Пэрэныкъо Аслъанрэ социальнэ IофхэмкIэ ыкIи пIуныгъэмкIэ отделым иве­дущэ специалистэу Галина Из­майловамрэ Адыгеим и Къэ­ралыгъо Совет — Хасэм и Рэзэныгъэ тхылъхэр афагъэ­шъошагъэх.

МКъТУ-м иректорэу Къуижъ Саидэрэ ипрезидентэу Тхьа­кIущынэ Аслъанрэ къэзэрэу­гъоигъэхэм шIуфэс къарахыгъ, пса­лъэ къашIыгъ. Къыблэ федеральнэ университетым ипрезидентэу Марина Боровскаяр, Краснодар краимрэ Адыгеимрэ яапшъэрэ еджапIэхэм яректор­хэм я Совет итхьаматэу Владимир Лобановыр, Урысыем ишъолъырхэм яапшъэрэ еджапIэхэм япащэхэр МКъТУ-м иIо­фышIэхэмрэ япащэхэмрэ къафэгушIуагъэх университетыр къызызэIуахыгъэр илъэс 30 зэрэхъугъэм фэшI.

ШIэныгъэлэжьхэм ясовет изэ­хэсыгъо ыуж артистхэм мэ­фэкI концерт къатыгъ.

АР-м и ЛIышъхьэ ипресс-къулыкъу.