Зипсауныгъэ лъэшэу зыщыфэсакъыхэрэ апэрэ шъолъыр 15-м Адыгеир ахэфагъ. Рейтингэу Ria.ru зыфиIорэм зэхигъэуцуагъэм къызэригъэлъагъорэмкIэ, Адыгэ Республикэм я 13-рэ чIыпIэр ыубытыгъ.

ЯпсауныгъэкIэ зэрар къафэзыхьэу, ау зэсагъэхэр щыгъэзыегъэнхэмкIэ шъолъыр 72-мэ язытет илъэсым къыкIоцI нахьышIу ашIыгъ.

Зэрар къэзыхьыхэрэр зымыгъэфедэхэрэр, зипсауныгъэ анахьэу зыщыпылъхэр, ыпэрэхэм афэдэу, джыри Темыр Кавказыр арэу къэнэжьы. Апэ итых Чэчэн Республикэр, Дагъыстаныр ыкIи Ингушетиер. Ахэм ялъытыгъэмэ, Камчатскэ краим, Еврейскэ автоном хэкум, Республикэу Хакасием ащыпсэухэрэр шъон пытэхэмрэ тутынымрэ IэкIыб ашIын гухэлъ яIэп.

2022-рэ илъэсыр пштэмэ, Адыгеир я 13-рэ чIыпIэм щыIэми, рейтингымкIэ балл пчъагъэу къыфагъэуцугъэм хигъэхъуагъ, 2021-рэ илъэсым иIэгъэ балл 70,3-м къикIи, 2022-рэ илъэсым балл 74,7-м нигъэсыгъ.

ЦIыфхэм зэрар къафэзыхьырэ шъон пытэхэм, тутыным ыкIи нэмыкIхэм ащыухъумэгъэнхэм фэшI Адыгеим Iофтхьэбзэ зэфэшъхьафыбэ щырагъэкIокIы. Спортым ылъэныкъокIэ илъэситфым къыкIоцI республикэм псэолъэ 95-рэ щашIыгъ, ахэм азыныкъор къоджэ псэупIэмэ адагъэуцуагъ. Псауныгъэр зыщагъэпытэрэ физкультурнэ комплекси 3 джырэ уахътэм ашIы.