Урысые зэнэкъокъоу «Хрустальная терпсихора» зыфиIоу Къэбэртэе-Бэлъкъар Республикэм икъалэу Налщык щыкIуагъэм Адыгеим икупэу «Адагурыр» къа­щыхэщыгъ, ащ Гран-при къыфагъэшъошагъ. Ащ нэмыкIэу апэрэ шъуашэ зиIэ лауреатыцIэр щэгъогогъо къы­лэжьыгъ.

Урысыем культурэмкIэ и Министерствэ иIэпыIэгъу­кIэ зэнэкъокъур зэхащагъ. Шъонтырпэо ныбжьыкIэхэм якуп ипащэу ЦIыкIушъэ Мыхьамодэ къэгъэлъэгъон гъэ­шIэгъон зэхищагъ. «Ацах», «Непэрэ шъуашэм диштэрэ попурри» ыкIи «Къушъхьэмэ ямэкъамэхэр» зыфиIохэрэр купым фестиваль-зэнэкъокъум къыщигъэлъэгъуагъэх.

2019-рэ илъэсым щегъэжьагъэу искусствэхэмкIэ еджапIэу псэу­пIэу Тульскэм дэтым кIэлэцIыкIу 29-рэ шъонтырыпым теонхэу щагъасэх. Ахэм Iоф адэзышIэрэр ЦIыкIушъэ Мыхьамод. Ансамблэм адыгэхэр, дагъыстанхэр, ермэлхэр, урысхэр ыкIи нэ­мыкI лъэпкъхэм къахэ­кIыгъэхэ кIэлэцIыкIухэр хэтых.

Ежь Мыхьамодэ Мые­къуапэ иеджапIэу N 4-м адыгабзэр щызэригъэшIагъ. Университетым зычIахьэм къэ­шъокIо ансамблэу «Нартым» хэтыгъ.

Кавказым щыпсэурэ лъэпкъхэм хагъэунэфы­кIырэ мэфэкIхэм, джэгухэм, зэнэкъокъухэм шъон­тырыпым ымакъэ чанэу ащэIу. Ащ утеоныр псын­кIэу бэмэ къа­шIошIы, ау хэукъох. Къарыуи, щэIагъи, IэпэIэсэныгъи ищыкIагъэх.

Кружокым къэкIорэ кIэ­лэцIыкIухэр чаных, псынкIэх, зэгурэIох, зы унагъом фэдэу зэхэтых, сценэм къызэрэтехьэхэу шъонтырыпхэр «къагъэгущыIэх». Аужырэ лъэхъаным пшъэшъэжъыехэри кружо­кым къакIохэу рагъэжьагъ.

АР-м щызэхащэрэ Iофтхьэбзэ зэфэшъхьафхэм купым хэтхэр ахэлажьэх. Ахэм зэу ащыщ сэнаущыгъэ зыхэлъ кIэлэцIыкIухэм ятворческэ зэнэкъокъоу «Золотое кольцо» зыфиIорэр.

Творческэ купхэм яфестиваль-зэнэкъокъоу Москва щыкIуагъэм «Адагурыр» хэлэжьагъ. Шъонтырпэо ныбжьыкIэ купым пэсэрэ адыгэ орэдхэм ямэкъамэхэр къыригъэIуагъэх, Москва икубокрэ зэнэкъокъум и Гран-прирэ къыдихыгъэх.

Лъэпшъыкъо Фатим.

Сурэтыр: купым ихъарзынэщ.