КIэлэцIыкIухэмрэ ныбжьыкIэхэмрэ я Урысые движениеу «Пэрытхэм я Движение» и ЛъыплъэкIо совет ия 2-рэ зэхэсыгъоу тыгъэгъазэм и 5-м щыIагъэм Урысые Федерацием и Президентэу Владимир Путиным тхьамэтагъор щызэрихьагъ. Движением хэт кIэлэцIы­кIухэр, ахэм янэ-ятэ­хэр, егъэджэкIо-гъэсакIохэр ащ хэлэжьагъэх.

Адыгэ Республикэм ыцIэ­кIэ Пэрытхэм я Движение и ЛъыплъэкIо совет изэхэсыгъо хэлэжьагъ Мые­къуапэ дэт лицееу

N 19-м икIэлэеджакIоу Али­са Зоринар. Ар Урысые зэнэкъокъу, олимпиа­дэ пчъагъэмэ ащатекIуагъ, кIэлэцIыкIухэмрэ ныбжьыкIэхэмрэ патриотическэ пIуныгъэ ягъэгъотыгъэным тегъэпсыхьэгъэ проектэу «Память из прошлого в настоящее и будущее» зыфиIорэм иавтор. Пшъэшъэжъыер Пэрытхэм я Движение ишъолъыр къутамэ хэт, зигугъу къэтшIыгъэ движением къалэу МыекъуапэкIэ ичIыпIэ къутамэ и Совет итхьамат, движением зэрихьэрэ Iоф­тхьабзэу «Сышъуфэраз» зыфиIорэм икоординатор, усэхэр зэхелъхьэ, мэкъа­мэ­хэр къыхехы. Алисэ Уры­сые программэу «Тэ Урысыем тырицIыф» зыфиIорэм хэлэжьагъ. Мы Iофтхьабзэм кIэлэцIыкIу­хэм паспортхэр къащаратыжьыгъэх.

«Пэрытхэм я Движение и ЛъыплъэкIо совет изэхэ­сыгъоу тыгъэгъазэм и 5-м щыIагъэм сыхэлэжьагъ. Мыщ фэдэ Iофтхьабзэм Адыгэ Республикэр къызэ­рэщызгъэлъэгъуагъэр сэркIэ насыпыгъэшхоу щыт. ЗгъэцакIэ сшIоигъо проектым фэгъэхьыгъэу Владимир Путиным къыфэсIо­тэнэу мыхъугъэми, гукъэ­кIыжь гъэшIэгъоныбэ Iоф­тхьабзэм къысфигъэнагъ. Сипроект зытегъэпсыхьагъэр Адыгэ Республикэм кино щытехыгъэныр, кIэлэ­цIыкIухэр актерэу, сценаристэу, режиссерэу ащ къыхэлэжьэнхэу амал яIэ­ныр ары. Къэбар жъугъэм иамалхэм респуб­ликэм зыщягъэушъом­б­гъугъэным сипроект фытегъэпсыхьагъ. А Iофтхьабзэм сызэрэхэлэжьагъэм лъэшэу сырэгушхо, егъэшIэрэу ар сыгу къинэ­жьыщт», — къыIуагъ Алиса Зоринам.

«Пэрытхэм я Движение зызэхащагъэр бэшIагъэп, ащ фэдэ гупшысэр апэу мэлылъфэгъум къыхалъхьагъ. Ащ кIэщакIо фэ­хъугъэхэр ежь кIэлэцIыкIу­хэр ары. Ащ фэдэ движение зэрэзэхащагъэр лъэшэу сигуапэ хъугъэ. Тиобществэ зэкъозыгъэуцорэ хэбзэшIухэм ягъэпытэн ащ иIахьышхо хешIыхьэ. Ащ хэхъоныгъэ ышIынымкIэ амалэу щыIэхэм татегущыIэнэу непэ сэгугъэ. КIэлэцIыкIухэр, Iэтахъохэр, ныбжьыкIэхэр ары унэшъо, гупшысэ пстэуми якIэщакIохэр. Ахэм ашIогъэшIэгъонхэр, агукIэ апэ­благъэхэр ары движениер зыпылъын фаер. На­хьыжъхэм типшъэрылъыр ящыкIэгъэ IэпыIэгъу ахэм ядгъэгъотыныр ары», — къыIуагъ Урысые Федерацием и Президентэу Владимир Путиным.

Сурэтхэр: «Пэрытхэм я Движение» ипресс-къулыкъу