Лъэпкъ шIухьафтын
Лъэпкъ шъуашэм илъ пцIыикъ джэгуалъэхэр Адыгеим иIэпэIасэхэм республикэм илъэсыкIэмкIэ шIухьафтын къыфашIыгъ.
Лъэпкъ художественнэ Iэмэ-псымэхэмкIэ IэпэIасэхэм я Ассоциацие хэтхэу Сет Сафиет, Гумэ Ларисэ, Мыгу Рузанэ, Джарымэкъо Зурет, Хьакъунэ Эльзэ джэголъэ 20 ежьхэм аIэхэмкIэ ашIыгъ. Ахэр хъураехэу, къэтэбэ плъыжь атебзагъэу, адыгэ тхыпхъэхэр атешIыхьагъэхэу щытых. Гъэдэхалъэ пэпчъ ежь хэушъхьафыкIыгъэу гъэпсыгъэ, дышъэ идагъэр, хэбзыкIыгъэхэр, лыдырэ щыгъыжъыехэр ахэм яшIынкIэ агъэфедагъэх.
«Шъопсэу шIухьафтын дахэ зэрэшъушIыгъэмкIэ! Джэгуалъэхэр республикэ правительствэм и Унэ пцIыикъ чъыгэу чIэтым палъэгъахэх, нахь кIасэу ащ къыпыхьащтых шIушIэ Iофтхьабзэу «ШIоигъоныгъэхэм япцIыикъ чъыг» зыфиIорэм хэлажьэхэрэм ятхыгъэхэр», — ирэзэныгъэ IэпэIасэхэм афигъэзагъ Адыгеим и ЛIышъхьэу КъумпIыл Мурат.
Хабзэ зэрэхъугъэу, илъэсыкIэ джэгуалъэм изэнэкъокъоу илъэс къэс зэхащэрэм текIоныгъэ къыщыдэзыхыгъэхэри мыщ щагъэшIощтых, ахэм яIэшIагъэхэр тиIэпэIэсэ пэрытхэм яехэм адыпылъэгъэщтых.