Хэгъэгум и ЛIыхъужъхэм я Мафэ ипэгъокIэу къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ зикIэщэкIо лIыхъужъныгъэм исыхьат Адыгэ республикэ гимназием щыкIуагъ.

Ащ къырагъэблэгъагъэр хэу­шъхьафыкIыгъэ дзэ операцием хэлэжьагъэу, отставкэм щыс дзэ морякэу, я 3-рэ ранг зиIэ капитанэу Олег Спиряковыр ары.

Фондым ипащэ игуадзэу Джарымэ Еленэ я 9-рэ классым ис кIэлэеджакIохэу зэIукIэгъум хэлэжьагъэхэм закъыфигъазэзэ, дзэ Iофым епхыгъэ мэфэкIхэм якъэбар къафиIотагъ. Хэгъэгу зэошхом иветеранхэр сыдигъуи зэрэдгъэлъапIэхэрэр, ау, гухэкI нахь мышIэми, ахэм ащыщэу псаоу къэнагъэр зэрэмакIэр къыхигъэщыгъ.

— Джырэ лъэхъаным илIы­хъужъэу алъытэхэрэ хэушъхьафыкIыгъэ дзэ операцием иветеранхэр ныбжьыкIэхэм афызэхэтщэрэ зэIукIэгъухэм амал зэриIэкIэ къятэгъэблагъэх. Ахэм хэгъэгум шIулъэгъоу фыряIэр, патриотизмэ нэшанэхэм ямэхьанэ къыткIэхъухьэрэ лIэужхэм къафаIуатэ, — хигъэунэфыкIыгъ Джарымэ Еленэ.

ЛIыхъужъныгъэм исыхьат къе­блэгъэгъэ дзэ морякэу Олег Спиряковым гущыIэр лъигъэ­кIотагъ. Дзэ сэнэхьатхэм, уихэ­гъэгу шIу плъэгъуным, къэу­ухъумэным мэхьанэ зэриIэр, Темыр флотым ыкIи хэушъхьафыкIыгъэ дзэ операцием къулыкъу зэращихьыгъэр къэзэрэугъоигъэхэм ащ къафиIотагъ.

— Дзэ операцием гуфакIоу сыкIуагъ, офицерэу сызэрэ­щы­тым фэшI нэмыкI зекIуакIэ къысхэфэн ылъэкIыщтыгъэп. Хэ­гъэгур, унагъохэр, тичIыгогъу­­хэр къэсыухъумэнхэр къыхэс­хыгъ. Дзэ сэнэхьатэу сиIэмкIэ IофшIэн зыщэсымыгъотым, мо­тострелковэ дзэхэм рядовоеу сахэхьагъ. Типшъэрылъыгъэр пыим тылъыплъэныр ары. Ук­раинскэ диверсионно-разве­дывательнэ купхэр къызнэсыгъэхэр къыхэдгъэщыщтыгъэх, мэхьанэ зиIэ объектхэм ты­наIэ атетыгъ, — къыIуагъ Олег Спиряковым.

ЗэолIым къэбарэу къыIотагъэхэр ашIогъэшIэгъонэу ныбжьыкIэхэр едэIугъэх, упчIэ зэ­фэ­шъхьафхэр ратыгъэх.

Ахэм зэу ащыщ щынэр къытекIоу къыхэкIыгъэмэ еджакIохэм ащыщ къызэрэкIэупчIагъэр.

— ХэушъхьафыкIыгъэ дзэ опе­рацием сыхэлэжьэфэ сы­щы­нагъэу къыхэкIыгъэп, ащкIэ Iэ­­пыIэгъу къысфэхъугъэр дзэ Iо­­фым хэшIыкI зэрэфысиIэр ары. ДзэкъулыкъушIэ унагъом сыкъи­хъухьагъ, сятэжъ къыщегъэжьагъэу сыящэнэрэ офицер. Илъэ­сибл нахь сымыныбжьэу артиллерийскэ къухьэм сятэжъ сырищэгъагъ. СицIыкIугъом къыщегъэжьагъэу хым сыкъызэрэще­кIо­кIыгъэм фэшI атомнэ псычIэгъ къухьэм къулыкъур щысхьы зэ­хъуми щынэр зэхэсшIагъэп. Джащ фэд, дзэ операцием сыкъэтыфэ сиIофшIэн згъэцэкIагъэ, командирхэм къаIорэм седэIугъ, — къыIуагъ лIы­хъужъым.

ЗэIукIэгъум икIэух кIэлэеджа­кIохэм рэзэныгъэ зыхэлъ гущы­Iэхэмрэ къэгъэгъэ Iэрамрэ ветераным пагъохыгъэх.

Къыхэдгъэхъожьымэ тшIоигъу, хэушъхьафыкIыгъэ дзэ операци­ем хэлажьэхэрэм Адыгэ респуб­ликэ гимназием Iоф щызышIэ­хэрэри, щеджэхэрэри афэгумэкIых. Ащ ишыхьат чэзыу-чэзыоу шIушIэ IэпыIэгъухэр зэрафатIупщыхэрэр. Мары бэмышIэу къау­гъоигъэ шIушIэ IэпыIэгъоу къэм­лэнэ 60 хъурэр тидзэкIолIхэм афатIупщыгъ.

Iэшъынэ Сусан.

Сурэтхэр авторым иех.