ТекIоныгъэм къыфэкIонхэм пай
Шъолъырхэр зэзыпхырэ форумэу «Вместе на равных» зыфиIорэр Мыекъопэ индустриальнэ техникумым щыкIуагъ.
[caption id="attachment_142780" align="aligncenter" width="800"] А. Iэшъын.[/caption]
Сэкъатныгъэ зиIэхэм я Дунэе мафэ ар фэгъэхьыгъагъ. Ащ кIэщакIо фэхъугъ мысатыу организациеу «Социальнэ-правовой, культурнэ ыкIи гъэсэныгъэ проектхэм хэхъоныгъэ ашIынымкIэ Гупчэу «Инва-Форум» зыфиIорэр.
Мыгъэрэ форумым темэ шъхьаIэу иIэр «ЗэкIэ ТекIоныгъэм пай». АщкIэ зэхэщакIохэм пшъэрылъэу яIагъэр сэкъатныгъэ зиIэхэр зыхэлэжьэхэрэ патриотическэ Iофтхьабзэхэм IэпыIэгъу афэхъугъэныр ары.
Форумым хэлэжьагъэх Урысые народнэ фронтым икъутамэу АР-м щыIэм ишъолъыр гъэцэкIэкIо Комитет ипащэу Юрий Гороховыр, Советскэ Союзым и ЛIыхъужъэу Андырхъое Хъусен иIахьыл гупсэу, экономикэ шIэныгъэхэмкIэ докторэу Хъуажъ Аминэт, Мыекъуапэ ипрокурорэу Максим Яковенкэр, Урысые общественнэ организациеу «Хьафизэхэм я Урысые обществэ» и Адыгэ республикэ къутамэ итхьаматэу Нэхэе Руслъан, колледжым иволонтерхэр ыкIи истудентхэр.
ЫпшъэкIэ зигугъу къэтшIыгъэ гупчэм ипащэу Элеонора Халатовам къызэриIуагъэмкIэ, форумым гупшысэ шъхьаIэу иIэр обществэм зыкIыныгъэ ыкIи зэгурыIоныгъэ хэлъэу хэушъхьафыкIыгъэ дзэ операцием дыригъэштэныр ары. Джащ фэдэу зипсауныгъэ амалхэр зэщыкъогъэ цIыфхэм обществэм зыкъыхагъотэнымкIэ социальнэ-культурнэ IофшIэным мэхьанэу иIэм форумым щытегущыIагъэх. Искусствэм щызэлъашIэрэ цIыфхэр, pbтворческэ амалхэр яIэшIагъэхэмкIэ къизыIотыкIырэ сурэтышIхэр мы Iофтхьабзэм зэфищагъэх.
— Народнэ фронтыр кIэщакIо зыфэхъугъэ шIушIэ проектэу «Все для Победы» зыфиIорэм цIыф мин пчъагъэ зэрепхы ыкIи тэри ащ тыхэлэжьэнэу итхъухьагъ. Мы проектыр дзэкъулыкъушIэхэу хэушъхьафыкIыгъэ дзэ операцием хэлажьэхэрэм, джащ фэдэу Донбасс щыпсэурэ мамыр цIыфхэм IэпыIэгъу афэхъугъэнхэм фэIорышIэ. Зипсауныгъэ амалхэр зэщыкъогъэ цIыфхэр обществэм зэрищыкIагъэхэр, ахэми яшIуагъэ къагъэкIон зэралъэкIыщтыр агурыдгъэIоныр ары пшъэрылъэу тиIэр, — къыIуагъ Э. Халатовам.
Народнэ фронтым икъутамэу АР-м щыIэр кIэщакIо зыфэхъугъэ шIушIэ проектэу «Все для Победы» зыфиIорэм Мыекъопэ индустриальнэ техникумым дыригъэштагъ. Мыщ щеджэрэ студентхэу сэкъатныгъэ зиIэхэм аIэкIэ ашIыгъэ хьакоу «буржуйкэкIэ» заджэхэрэр тидзэкIолIхэу хэушъхьафыкIыгъэ дзэ операцием щыIэхэм афащэщтых. Ащ нэмыкIэу дэеу зэхэзыхыхэрэм ыкIи дэеу зылъэгъухэрэм афытегъэпсыхьэгъэ еджэпIэ-интернатым щеджэхэрэм тидзэкIолIхэм открыткэхэр, нэмыкI шIухьафтын цIыкIухэри афырагъэхьых.
Форумым иIофшIэн хахьэу «ЗыкIыныгъэр ары тикIуачIэр» зыцIэ конференцие рагъэкIокIыгъ.
Советскэ Союзым и ЛIыхъужъэу Андырхъое Хъусен фэгъэхьыгъэ художественнэ фильмэу «Андырхъое Хъусен. Сэ сыпсэущт!» зыфиIорэм форумым икъэгъэлъэгъон кIэух фэхъугъ.
КIАРЭ Фатим.