Адыгеим чъыгхатэу иIэм аужырэ илъэсхэм хэпшIыкIэу хэхъо, гектар мини 5-м кIэхьагъ ахэм аубытырэр. Ащ щыщэу охътэ кIэкIым къызпыкIэрэ чъыг лъэпкъхэр гектар минрэ 850-м ехъу.

[caption id="attachment_142776" align="aligncenter" width="800"] АР-м мэкъу-мэщмкIэ и Министерств.[/caption]

Анахьыбэу пхъэшъхьэ-мышъхьэ ыкIи цумпэ къэгъэкIыным зызщиушъомбгъухэрэм ащыщ Теуцожь районыр. АР-м мэкъу­мэщ хъызмэтымкIэ и Минис­терствэ тызэрэщигъэгъозагъэмкIэ, гектар 573-рэ мы уахътэм яI. Ахэр охътэ кIэкIым къэхъурэ чъыг лъэпкъых, «капельнэкIэ» заджэхэрэ шIыкIэм тетэу псыр акIагъахъо, гектар 358-мэ пхъэ­шъхьэ-мышъхьэхэр къащагъэкIы. Нахьыбэу мы районым мыIэрысэрэ къыпцIэрэ къы­щагъэкIырэр.

ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «МААРИС» зыфиIорэр чъыгхатэхэм апылъ хъызмэтшIэпIэ ныбжьыкIэу мы муниципальнэ образованием итхэм ащыщ. 2016-рэ илъэсым апэрэ чъыг цIыкIухэр Джэджэхьэблэ псэупIэ коим щагъэтIысхьэгъагъэх. Непэ «Делишес», «Гала», «Голден-Делишес», «Новелла-­РедФри» зыфиIорэ мыIэрысэ лъэпкъэу гектари 100 ыкIи къып­цIэ лъэпкъэу «Стенлей» зыфиIорэу гектар 82-рэ алэжьы. Ахэм зэкIэми пхъэшъхьэ-мы­шъхьэхэр къатых.

[caption id="attachment_142777" align="aligncenter" width="800"] АР-м мэкъу-мэщмкIэ и Министерств.[/caption]

Мыгъэ мыIэрысэ тонн 1790-рэ хъызмэтшIапIэм къыщаугъоижьыгъ. Адыгеим имызакъоу, Урысыем инэмыкI шъолъырхэми япродукцие ащыIуагъэкIы.

Джащ фэдэу хъызмэтшIапIэм IофшIэпIэ чIыпIэ зимыIэхэм япчъагъэ нахь макIэ хъуным иIахь хелъхьэ. Непэ ащ нэбгырэ 25-рэ щэлажьэ.

Чъыгхэтэ лэжьыным ищыкIэгъэ техникэм нэмыкIэу трактор ыкIи хьылъэзещэ машини 8 иI. «МААРИС-р» Теуцожь районым имэкъумэщ хъызмэт хэхъоныгъэхэр езгъэшIэу, неущырэ мафэмкIэ гугъэпIэ инхэр къэзытыхэрэм зэращыщыр пчъа­гъэхэм къаушыхьаты.

ПшъэдэкIыжьэу ыхьырэмкIэ гъунэпкъэ гъэнэфагъэ зиIэ хъыз­мэтшIапIэу «Адыгеим ичъыгхатэхэр» зыфиIорэри мы районым щагъэпсыгъэхэм ащыщ, цумпэ зэфэшъхьафхэр, дэжъые­хэр къыщагъэкIых.

Цумпэ лъэпкъэу голубикэр республикэм апэу къыщызы­гъэ­кIынэу езгъэжьагъэр мы хъыз­мэтшIапIэр ары. ИлъэсищкIэ узэкIэIэбэжьмэ апэрэ кондэ цIы­кIухэр агъэтIысхьагъэх. Непэ гектари 10 яI. Мыгъэ апэрэу сатыу рыпшIын плъэкIынэу къы­пыкIагъ, куандэ пэпчъ грамм 500 — 600 къытыгъ. ТапэкIэ зым килограмми 4 — 5-м къы­щымыкIэу къытынэу мэгугъэх.

Ащ нэмыкIэу ежевикэ къегъэ­кIы, ари гектари 10 зэрэхъурэр, черешне гектари 4-м ехъоу агъэтIысхьагъэм пхъэшъхьэ-­мы­шъхьэ къеты, дэжъые лъэпкъ зэфэшъхьафэу гектари 100-м ехъу яI.

Мы муниципальнэ образо­ванием цумпэхэм якъэгъэкIын зыщырагъэушъомбгъунэу гухэлъ яI. Ащ фэшI районым ифермерэу къэралыгъо программэхэм ахэлажьэхэрэм япчъагъэ нахьыбэ хъуным чанэу ыуж итых. 2019-рэ илъэсэу цумпэ къэгъэкIыным зегъэушъомбгъугъэным фытегъэпсыхьэгъэ прог­раммэр зыщыIэм къыщыублагъэу мы культурэм изакъоу сомэ миллион 24-м ехъу грантэу къыфэкIуагъ. Ащ ишIуагъэкIэ цумпэхэм аубытырэр гектар 30-м ехъугъ.

Адыгеир зэрэщытэу пштэмэ, аужырэ илъэситIум цумпэхэм ялэжьын пылъхэм грантэу къа­ратыгъэр сомэ миллион 46,5-рэ мэхъу. Ар зэкIэмкIи мэкъумэщ хъызмэтым пэIухьэгъэ грант- хэм языщан.

ХЪУТ Нэфсэт.