АР-м и Къэралыгъо академическэ ансамблэу «Налмэсым» джыри зэ ыцIэ дахэкIэ раригъэIуагъ.

[caption id="attachment_142760" align="aligncenter" width="800"] АР-м иконцертнэ объединение.[/caption]

Мыгъэ реным Iоф зыдишIэгъэ хореографическэ спектаклэу «Адыгэ нысэщэ джэгу» зыфи­Iорэм илъэтегъэуцо республи­кэм щыкIуагъ ыкIи культурнэ хъугъэ-шIэгъэ ин хъугъэ. Къэгъэ­лъэгъоныкIэм икъэбар зэхэзы­хыгъэхэу, еплъыным кIэхъопсыщтыгъэхэр АР-м и Къэралыгъо филармоние ансамблэм щиу­гъои­гъэх. Къашъом имызакъоу, шэн-хэбзэ зекIуакIэхэм чIыпIэшхо ащызыубытыщтыгъэ адыгэ нысэщэ джэгу шъыпкъэм идунай дахэ ахэр хищагъэх, пэсэрэ зэманым зэкIихьажьыгъэх.

Сыхьатрэ ныкъорэ кIорэ хо­рео­графическэ спектаклэм джэгу псаур къыщыгъэлъэгъогъуай. Ары нахь мышIэми, ащ иIахь шъхьаIэхэу нысэр къызэращэрэр, унэм зэрэращэрэр, джэгу зещакIэр ащ хэхьагъэх. Къэгъэлъэгъоныр ямышIыкIэ зышIырэр къашъохэм адакIоу адыгабзэкIэ къызэрэгущыIэхэрэр ары. Лъэпкъым ижъ-ижъыжькIэ хэлъыгъэ чIэгъчIэлъ гущыIакIэр, жэбзэшIуагъэр, кIалэхэмрэ пшъа­шъэхэмрэ зэфадзыщтыгъэ гущыIэхэр — а пстэури еплъыгъэхэм зэхахыгъ. Ащ ишIуагъэ­кIэ IофшIэгъакIэм еплъыгъэхэр «Налмэсым» ылъэгу чIэплъэгъэ­хэ къодыеп, ымакъи зэхахыгъ.

[caption id="attachment_142761" align="aligncenter" width="800"] АР-м иконцертнэ объединение.[/caption]

«Тхьэм егъэпсэух! «Налмэсыр» къэшъогъэ къодыеп, спектакль псау къытигъэлъэгъугъ. Орэдхэр, шэн-хабзэхэр — зэкIэри зэхэфыгъэу къытагъэлъэ­гъугъ. Емыплъыгъэхэр зэкIэ еплъынхэ фаеу сэлъытэ».

«Слъэгъугъэ къэгъэлъэгъоным сэркIэ мэхьанэшхо иI. ­Тилъэпкъ итарихъ, ишэн-хабзэхэр зэ­тэ­гъашIэх, ау ар икъурэп. Мыщ фэдэу плъэгъунхи фае. Тэ тизакъоп, нэмыкI лъэпкъхэм ащ нэIуасэ зыфашIынымкIэ мыщ фэдэ IофшIагъэхэм мэхьанэшхо яI. Арышъ, ащ дэлэжьагъэхэм зэкIэми «тхьашъуегъэпсэу» ясэ­Iо. Лъэшэу сыгу рихьыгъ», — хореографическэ спектаклэу «Адыгэ нысэщэ джэгу» зыфиIорэм еплъыгъэхэр къыддэгощагъэх.

КъэгъэлъэгъоныкIэм игъэхьазырын ансамблэм хэтхэм анэмыкIэу тарихълэжьхэр, сурэтышI­хэр, филологхэр, хореографхэр, мультипликаторхэр, музыкантхэр — пстэумкIи нэбгыри 100-м ехъу дэлэжьагъ. УФ-м культу­рэмкIэ и Министерствэ икъэралыгъо тын къыдыхэлъытэгъэ ахъщэмкIэ проектыр гъэцэкIагъэ хъугъэ.

Урысыем щыпсэурэ лъэпкъ цIыкIухэм якультурнэ кIэн къы­зэтегъэнэжьыгъэным ар фэлажьэ, лIэужыкIэхэр адыгэ хабзэм тетэу пIугъэнхэр, ятарихъ, ялъэпкъ, абзэ язэгъэшIэн иIофыгъохэр къызэлъеубытых. Лъэпкъ шэн-хабзэхэм зягъэу­жьы­жьыгъэным, пIуныгъэ тэрэз ныб­жьыкIэхэм ахэлъыным афэ­лажьэ.

«Творческэ купми, республи­кэм щыпсэухэрэми мыщ фэдэ культурнэ хъугъэ-шIэгъэ инымкIэ сафэгушIо! Ащ фэдэ проект­хэм яшIуагъэкIэ тилъэпкъ икуль­турэ бай, ишэн-хабзэхэр зэтедгъэуцожьынхэ, къэтыухъумэнхэ тэлъэкIы. Сицыхьэ телъ унагъо зышIэн гухэлъ зиIэ ныбжьыкIэхэмкIэ ар щысэтехыпIэ зэрэ­хъущтыр. 2024-р унагъом и Илъэсэу Урысыем и Президен­тэу Владимир Путиным ыгъэнэфагъ. КъэгъэлъэгъоныкIэр ащ ипэгъокI зэрэхъугъэм мэхьанэшхо иI. Къэралыгъоми респуб­ликэми унэгъо пытэхэр, зэгуры­Iожьхэр ащыбэгъонхэу, зищыIэныгъэ гъогу зэзыпхырэ ныбжьыкIэхэм джэгу мэфэкI гъэшIэгъонхэр егъэжьапIэ афэхъун­хэу сафэлъаIо. Ахэр унагъом ишэн-хабзэхэм яухъумэпIэ къо­дыехэп, ахэр тилъэпкъ икультур­нэ кIэн бай. Тэ ар къэтыухъу­мэн ыкIи лIэужыкIэхэм алъыдгъэсыжьын фае. Мэхьанэ ин зиIэ проектыр гъэцэкIагъэ зэ­рэ­хъу­гъэмкIэ джыри зэ «Нал­мэсым» сыфэгушIо. ТапэкIи твор­ческэ гъэхъагъэхэр ышIынхэу сыфэлъаIо,» — къыщи­тхыгъ ителеграм нэкIубгъо Адыгэ Республикэм и ЛIышъхьэу КъумпIыл Мурат.

Хореографическэ спектаклыр джырэкIэ зылъэгъун зылъэкIыщт­хэр республикэм щыпсэухэрэр ары. УрысыбзэкIэ зызэрадзэ­кIыкIэ, дэкIыгъохэр зэхащэщтых.

Анцокъо Ирин.