Урысыем ичемпионат и Суперлигэ хэлэжьэрэ «АГУ-Адыифым» зэкIэлъыкIоу ешIэгъуих шIуахьыгъ.

Зичэзыу зэIукIэгъоу иIагъэр къалэу Ижевскэ щыкIуагъ, чIыпIэ командэу «Университетым» де­шIагъ. Пчъагъэр зэфэдизэу ешIэгъур аухыгъ.

«Университет» (Ижевск) — «АГУ-Адыиф» (Мыекъуапэ) — 21:21 (10:9).

Мы спорт лъэпкъыр зыгу ри­хьыхэрэр нэмыкI зэфэхьысыжь ежагъэх. «Университетыр» аужырэ чIыпIэм щыт, арышъ, тигандболисткэхэм текIоныгъэр къыда­хыным тыщыгугъыгъ. Бысым- хэм якомандэ хэтхэм ащыщэу ешIэгъум хэлэжьагъэр нэбгырэ 11 ныIэп. Ау ащ иегъэшхо къэкIуагъэп, апэрэ такъикъхэм къащегъэжьагъэу пчъагъэмкIэ «Университетыр» «АГУ-Адыифым» ыпэ итыгъ.

ЕшIэгъур аухынкIэ такъикъым ехъу къэнагъэу Валентина То­милинам Iэгуаор къэлапчъэм ди­дзагъ, Адыгеим икомандэ те­кIоныгъэр къыдихынымкIэ амалышIухэр иIэ хъугъэ. Ау Ижевскэ илIыкIохэр ащ къезэгъыгъэхэп, Аюна Басанговам ыкIи Юлия Шакирьяновам Iэгуаор тикъэлапчъэ тIогъогогъо къыдадзагъ, пчъагъэр 21:21-у зэIукIэгъур аухыгъ. КъэлэпчъэIутхэу Люд­мила Баскаковамрэ Юлия Пойловамрэ цыхьэшIэгъоу ешIагъэх. «АГУ-­Адыифым» ыгъэцэкIэгъэ пенальти 9-м щыщэу 4-р дидзагъэп.

— ТекIоныгъэр къыдэтхы­нымкIэ амалышIухэр тиIагъэх, ау непэ тиешIакIэ дэгъугъэп. Ащ мыщ фэдэ зэфэхьысыжь къыкIэлъыкIуагъ, — къыIуагъ «АГУ-Адыифым» итренер шъхьаIэу Наталья Дерепаскэм.

Командэхэр зыдэщыт чIыпIэхэр ыкIи очко ­пчъагъэу рагъэкъугъэр: 1. «Ростов-Дон» — 28. 2. «ЦСКА» — 25. 3. «Астраханочка» — 23. 4. «Черноморочка — 22. 5. «Лада» — 21. 6. «Кубань» — 17. 7. «Динамо-Синара» — 15. 8. «Ставрополье» — 10. 9. «Звезда» — 8. 10. «АГУ-Адыиф» — 8. 11. «Луч» — 4. 12. «Университет» — 1.

Тыгъэгъазэм и 11-м «АГУ-Адыифыр» командэу «Лучым» IукIэщт. ЕшIэгъур Мыекъуапэ щыкIощт, мафэм сыхьатыр 5-м рагъэжьэщт.