Мыекъопэ къэзэкъ отделым иатаманхэм я Совет мы мафэхэм зэхэсыгъо иIагъ. Къэралыгъо ыкIи нэмыкI къулыкъухэр район обществэхэм зэрахьырэр, ныбжьыкIэхэр патриотхэу зэрапIухэрэр зэхэсыгъом щызэфахьысыжьыгъэх, зэфэхьысыжь-хэдзынхэу щыIэщтхэм атегущыIагъэх.

Iофтхьабзэм хэлэжьагъэх губернаторым игуадзэу, Пшызэ къэзэкъыдзэм иатаманэу Александр Власовыр, АР-м и ЛIышъхьэ ыкIи министрэхэм я Кабинет яадминистрацие ипащэу Владимир Свеженец, лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ АР-м и Комитет итхьаматэу Шъхьэлэхъо Аскэр, дзэ атаманым игуадзэхэу, Мыекъопэ отделым иатаманэу Александр Даниловыр ыкIи динлэжьэу Иоанн Гармаш, Мыекъуапэ ыкIи Адыгэ епархием идинлэжьэу Виталий Белентьевыр, район ыкIи чIыпIэ обществэхэм яатаманхэр.

ШIуфэс гущыIэхэр зэхэсы­гъом хэлажьэрэмэ апагъохыгъэх дзэ атаманэу Александр Власовым­рэ Владимир Свеженецрэ. ХэушъхьафыкIыгъэ дзэ операцием зэрэхэлажьэхэрэм, гуманитар IэпыIэгъу зэрафарагъащэрэм, дзэкIолIхэмрэ ахэм яунагъохэмрэ зэрадеIэхэрэм апае къэзэкъмэ ялIыкIохэм «тхьашъуегъэпсэу» араIуагъ.

Нэужым Пшызэ къэзэкъы­дзэм иатаман игуадзэхэм докладхэр къашIыгъэх, Мыекъопэ отделым хэхьэрэ район обществэхэм Iоф зэрашIагъэм, гъэ­хъагъэу яIэхэм къатегущыIагъэх. Къэзэкъыдзэм иатаман игуа­дзэу, штабым ипащэу Виталий Мясниковым ягугъу къышIыгъ документациер зэрагъэзекIорэм, отчетэу къашIыгъэхэм, экономикэм хэхъоныгъэ зэрэрагъэшIырэм. Максим Медянниковым къыIотагъ ныбжьыкIэхэр патриотхэу пIугъэнхэм, ягушъхьэ— баиныгъэ къэIэтыгъэным фэшI ашIэрэр.

— Мыгъэ кIэлэпIумэ яп­чъагъэ хэпшIыкIэу хэ­хъуагъ, ахэм яIоф­шIэни нахьышIу хъугъэ. А лъэныкъом чанэу яIахьышIу хашIы­хьэ хэушъхьафыкIыгъэ дзэ опе­рацем хэлажьэ­хэрэм. Къэзэкъ тарихъым идесэхэр кIэлэцIыкIумэ афызэхащэх, чылысхэр арагъэлъэгъу, зекIо ащэх. Мыекъопэ отделым дзэ-пат­риотическэ ыкIи спортивнэ клуби 6 хэхьэ. Ахэм къэзэкъ ныбжьыкIэхэр бэнэкIэ зэфэшъхьафхэм, шым тесынхэм, шъэ­жъыехэм ядзын ащафагъасэх. Къэзэкъ ныбжьыкIэмэ япчъагъэ хэхъо. Район обществэхэм еджа­пIэхэр яIэх «Къэзэкъ гъэсэныгъэ организациекIэ» яджэ­хэу, джащ фэдэу къэзэкъ классхэри купхэри, — къыIотагъ Максим Медянниковым.

Дзэ атаманым игуадзэу Александр Слипченкэм идоклад зыфэгъэхьыгъагъэр общественнэ щынэгъончъэным икъэухъу­мэн фэгъэзэгъэ къэзэкъ дружинэхэр ары. Ащ къыкIэлъыкIоу Мыекъопэ къэзэкъ отделым иобществэхэм яатаманхэр къэ­гущыIагъэх, хэушъхьафыкIыгъэ дзэ операцием хэлажьэхэрэм, ахэм зэпхыныгъэу адыряIэхэм, гуманитар IэпыIэгъоу афагъа­кIорэм ыкIи нэмыкIхэм ягугъу къашIыгъ.

Шытхьэлэ район къэзэкъ обществэм иатаманэу Сергей Ефимовым къызэрэхигъэщы­гъэмкIэ, тонн 46,5-рэ гуманитар IэпыIэгъоу тидзэкIолIхэм афарагъэщагъ.

Адыгеим икъэзэкъ ныбжьыкIэмэ я Союз Iофэу ышIагъэм къытегущыIагъ кIэлэцIыкIу-ныбжьыкIэ движением ипащэу Екатерина Загорулькэр.

— Адыгеим икъэзэкъ ныбжьыкIэмэ я Союз зыщыIэр илъэсым къехъугъ, ащ хэтмэ япчъагъэ хэхъо. Респуб­ликэм ит еджапIэмэ къэзэкъ классхэр яIэх, кIэлэцIыкIу IыгъыпIэмэ къэзэкъ купхэр ащызэхащагъэх, лъэпкъ къогъупэхэр къащызэIуа­хыгъэх. Мы движениер щыIэ зыхъу­гъэм къыщыублагъэу къэзэкъ ныбжьыкIэхэр Iоф­тхьэбзэ 86-мэ ахэлэжьа­гъэх. Ахэр тэ тишъолъыри, ащ ыкIыби ащыкIогъэ Iофтхьабзэхэу щытыгъэх. ГущыIэм пае, къэзэкъ ныбжьыкIэхэм я Урысые слетэу къалэу Астрахань щыкIуагъэм тыщы­Iагъ, грантитIу къыщытхьыгъ. Гуманитар IэпыIэгъум иугъо­ини чанэу тыхэлажьэ, ащ дакIоу, письмэхэр, сурэт шIыгъэхэр, плакатхэр, гур къэзыIэтырэ видеороликхэр дзэкIолIмэ афятэгъащэ, — къыIотагъ Екатеринэ.

Тыгъэгъазэм и 9-м зэфэхьысыжь-хэдзын зэIукIэу Мыекъуа­пэ щызэхащэщтым изыфэгъэ­хьазырын епхыгъэ Iофыгъор зэхэсыгъом къыщаIэтыгъ. Мые­къопэ отделым иатаман IэнатIэ тырагъэхьанэу Сергей Захаровыр къагъэлъэгъуагъ. Мыекъопэ къэзэкъ отделым зыкъыIэтыжьынымкIэ, къэзэкъ хабзэхэр къэ­ухъумэгъэнхэмкIэ ыкIи ныбжьыкIэхэр патриотхэу пIугъэнхэмкIэ IэпыIэгъу къызэрафэхъурэм фэшI лъэпкъ IофхэмкIэ, IэкIыб къэралхэм ащыпсэурэ тилъэп­къэ­­гъухэм адыряIэ зэпхыныгъэ­хэмкIэ ыкIи къэбар жъугъэм иамал­хэмкIэ АР-м и Комитет итхьаматэу Шъхьэлэхъо Аскэр я II-рэ шъуашэ зиIэ орденэу «За Веру, Кубань и Отечество» зыфиIоу къыфагъэшъошагъэр зэхэсыгъом икIэухым губернаторым игуа­дзэу, Пшызэ къэзэкъыдзэм иатаманэу Александр Власовым ар къыритыжьыгъ.

Пшызэ къэзэкъыдзэм и Мыекъопэ къэзэкъ отдел.