Тигъэзетеджэхэр хъугъэ-шIагъэхэмкIэ къыддэгуащэхэу бэрэ къыхэкIы. Мызыгъэгум къытфэтхагъэр Мыекъуапэ дэт кIэлэцIыкIу IыгъыпIэу N 62-у «Лэгъупкъопс» зыфиIорэм икIэлэпIоу КIубэ Саид. КIэлэцIыкIу IыгъыпIэм щызэхащэгъэ Iофтхьабзэм ар къытегущыIэ.

Уихэгъэгу, укъызщыхъугъэ къуаджэр, уилъэпкъ шэн-хабзэхэр, уиныдэлъфыбзэ хэтрэ цIыфкIи анахь шъхьаIэу щытынхэ фае. Сабыим ицIыкIугъом ебгъа­шIэрэр, ебгъэлъэгъурэр ары ыгу риубытэрэр. Хаплъхьэ­рэр ары ины хъуми къэтIэмыжьырэр.

Адыгэ Республикэр шIу алъэгъуным, Iэдэб ахэ­лъэу тикIэлэцIыкIухэр зекIонхэм, лъэпкъым къыкIугъэ тарихъ гъогур, икультурэ зыфэдэр ашIэзэ къэтэджынхэм мэхьэнэ ин щетэты тикIэлэцIыкIу IыгъыпIэ.

Ащ тегъэпсыхьагъэу, ижъырэ лъэхъаным адыгэхэм ящыIэкIэ-псэукIэ зыфэдагъэр нэгум къыкIэзыгъэуцорэ музей цIыкIу тикIэлэцIыкIу IыгъыпIэ къыщызэIутхыгъ. Ижъырэ Iэмэ-псымабэ тянэжъ-тятэжъ пIашIэхэм унэгъо хъызмэтым щагъэфедэщтыгъэу, щагъэпсэуалъэ­щтыгъэу мыщ щызэхэтыугъоягъ. Ны-тыхэм яшIуагъэ къытагъэкIызэ музеир къызэIутхыгъ.

Лъэпкъ шъуашэхэу цыемрэ саемрэ, ижъырэ тхъу­уалъэр, къоеихылъэр, пIуаблэхэр, шыкIэпщынэр, пхъэкIычыр, кушъэр, дышъэ IуданэкIэ тхыпхъэ зэфэшъхьафхэр зыхэдыкIыгъэ Iалъмэкъхэр ыкIи нэмыкIыбэхэр тимузей чIэлъых.

Лъэпкъ культурэм кIэлэцIыкIухэр фэщагъэ хъунхэмкIэ мыхэр зэкIэ тэ, кIэлэпIухэм къызфэтэгъэфедэ, пIуныгъэ-гъэсэныгъэмкIэ ахэр лъэшэу тиIэпыIэгъух. КIэлэцIыкIу IыгъыпIэм чIэс сабыйхэр тимузей ихьэкIэ зэпытых.

Адыгэ лъэпкъым иблэкIыгъэ щыщ пычыгъо къэзыгъэлъэгъорэ пкъыгъохэм апылъ къэбар хьалэмэтхэр, тарихъыр зэрэзэрагъашIэрэм нэмыкIэу мэфэкI зэхахьэхэр мыщ щеретэгъэкIокIых.

ТикIэлэцIыкIу IыгъыпIэ чIэс адыгэ сабыйхэр титхакIомэ атхыгъэ усэ цIыкIухэм къятэгъаджэх.

МэфэкI зэхахьэхэм музеим чIэлъ пкъыгъохэр ащытэгъэфедэх. Ахэр ары лъэпкъым къырыкIуагъэр зэхэтэзыгъашIэрэр, ижъырэ пкъыгъохэр ары къыткIэхъухьэрэ лIэужхэм ядышъэ кIэныр.

КIУБЭ Саид. КIэлэцIыкIу IыгъыпIэу «Лэгъупкъопсым» икIэлэпIу.