Урысые Федерацием и Президентэу Владимир Путиным пшъэрылъ зэрэфишIыгъэм тетэу УФ-м и Президент и Полномочнэ лIыкIоу ­Къыблэ федеральнэ шъо­лъырым щыIэ Владимир Устиновым видео­конференцие шIыкIэм те­тэу цIыфхэр ригъэблэ­гъагъэх. Адыгеим и ЛIы­шъхьэу КъумпIыл Мурат а Iофтхьабзэм хэлэжьагъ, нэмыкI шъолъырхэм япащэхэм афэдэу .

Къыблэ федеральнэ шъолъы­рым къыхиубытэрэ субъект зэфэшъхьафхэм ащыпсэухэрэм Iофыгъоу зыкъызэрэфагъэ­за­гъэхэм ащ щахэплъагъэх, Адыгеи­ри ахэм зыкIэ ащыщыгъ. Мыекъуапэ дэс Татьяна Вранцевар къыкIэлъэIугъ урамэу Же­лезнодорожнэм тет унэхэм ащыщ горэм ищагу зэтегъэпсы­хьэгъэнымкIэ яшIуагъэ къарагъэкIынэу.

КъумпIыл Мурат къызэриIуа­гъэмкIэ, а Iофыгъом фэгъэ­хьыгъэ унашъо аштэгъах ыкIи 2024-рэ илъэсым гъатхэм ар гъэцэкIагъэ хъущт.

Федеральнэ программэу «Къэлэ щыIэкIэ Iэрыфэгъур гъэ­псыгъэныр» зыфиIорэм къыды­хэлъытагъэу лъэпкъ проектэу «ПсэупIэмрэ къэлэ щыIакIэмрэ» зыфиIорэмкIэ рахъухьэгъэ IофшIэнхэр зэшIуахыщтых.

Проект-сметэ документациер агъэхьазырыгъах, къэралыгъо уплъэкIуным икIэух зэфэхьысыжь ащ осэ дэгъу къыфи-шIыгъ. А чIыпIэм изэтегъэпсы­хьан къыдыхэлъытагъэу унэхэм якIолIэрэ гъогухэр асфальткIэ апкIэщтых, транспорт уцупIэхэри, спортым ыкIи хъызмэтым япхыгъэ чIыпIэ зэфэшъхьафхэри зэтырагъэпсыхьащтых.

Шъугу къэтэгъэкIыжьы: щагу­хэмрэ общественнэ чIыпIэхэмрэ язэтегъэпсыхьан илъэс къэс республикэм ынаIэ атырегъэты. Мы илъэсым рахъухьэгъэ Iоф­тхьабзэхэм къыдалъытэхэрэр зэкIэ икъоу агъэцэкIагъэх. Адыгэ Республикэм псэолъэшIынымкIэ и Министерствэ къы­зэритыгъэмкIэ, муниципальнэ образование пстэуми чIыпIэ 42-рэ ащызэтырагъэпсыхьагъ (ащ щыщэу общественнэ чIыпIэхэр зэрэхъухэрэр 11, щагу-хэр — 31-рэ). 2024-рэ илъэсым Адыгеим чIыпIэ 36-рэ щы­зэ­тырагъэпсыхьанэу агъэнэ­фагъ (ахэм ащыщэу 6-р об­щественнэ чIыпIэх, 30-р щагух). Район пстэуми пIоми хъунэу подряд организациехэм зэзэ­гъыны­гъэ­хэр щадашIыгъэх. Ти­къэлэ шъхьа­Iэ щызэшIуахынэу рахъу­хьагъэр пстэуми анахьыб.

«Республикэм щыпсэухэрэм ящыIакIэ нахьышIу шIыгъэным пае федеральнэ программэхэм ыкIи лъэпкъ проектхэм джыри тадэлэжьэщт. А лъэныкъом сы­наIэ лъэшэу тесэгъэты. Iофтхьа­бзэу зэшIуахыгъэхэм язытет сшъхьэкIэ сэуплъэкIу, чIыпIэу зэ­тырагъэпсыхьагъэхэм зэIу­кIэ­хэр ащызэхэсэщэх. ТэркIэ мэ­хьэнэ гъэнэфагъэ иI а чIы­пIэхэм ащыпсэухэрэри Iофым къыхэгъэ­лэжьэгъэнхэм. Общественнос­тыр кIэщакIо зыфэхъухэрэм аде­тэгъаштэ, цIыфхэм яеплъыкIэхэм такъыпкъырыкIызэ зэтегъэпсыхьэгъэн фэе чIыпIэхэр къыхэтэхых ыкIи IофшIэнхэр зэ­шIотэхых. Зигъо Iофыгъоу му­ниципалитет пэпчъ къащыуцу­хэрэр псынкIэу къыхэгъэщыгъэн­хэм ыкIи зэшIохыгъэнхэм апае цIыфхэм зыкъызэрэтфагъэзэрэ тхылъхэм ренэу тынаIэ атетэу Iоф адэтэшIэ», — къыхигъэщыгъ Адыгеим и ЛIышъхьэ.

Урысые Федерацием и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновым рес­публикэм и ЛIышъхьэ пшъэ­рылъ къыфишIыгъ щагум изэ­тегъэ­псыхьанкIэ унашъоу аштагъэр икъоу гъэцэкIагъэ хъуным пае Iофтхьэбзэ гъэнэфагъэхэр рихъухьанхэу.

АР-м и ЛIышъхьэ ипресс-къулыкъу