[caption id="attachment_142691" align="aligncenter" width="800"] ДЕЛЭКЪО Анет.[/caption]

Къэралыгъо фондэу «Хэгъэгум иухъумакIохэр» зыфиIорэм ишъо­лъыр къутамэ илъэсыкIэ еджэгъур заублагъэм къыщегъэжьагъэу хэу­­шъхьафыкIыгъэ дзэ операцием иветеранхэр зыхэлэжьэрэ Iоф­тхьэ­бзэ зэфэшъхьафхэр зэхещэх, ахэм ащыщ лIыхъужъхэр ныбжьы­кIэ­хэм гущыIэгъу зэрафэхъухэрэр.

[caption id="attachment_142692" align="aligncenter" width="800"] ДЕЛЭКЪО Анет.[/caption]

Фондым ишъолъыр къутамэ Адыгэ къэралыгъо университетым и Координационнэ гупчэ игъусэу мы мафэхэм Iэнэ хъу­рае зэхищагъ. ХэушъхьафыкIыгъэ дзэ операцием иветеранэу, фондым икъутамэ иIофышIэу, а операцием иветеранхэм я Ассоциацие хэтэу Сергей Артюшенкэр ащ рагъэблэгъагъ.

Сергей гуфакIоу дзэ операцием тIогъогогъо хэлэжьагъ, «кIэпсэжъыем» зэпырыкIыгъ ыкIи лIыхъужъныгъэу къыхэ­фагъэхэм афэшI дзэ тын лъэпIэ зэфэшъхьафхэр къыфагъэшъошагъэх, ахэм ащыщ медалэу «За отвагу» зыфиIорэр. Дзэ­кIолIым ылъэгъугъэр, общест­веннэ IофшIэнэу ыгъэцакIэхэрэр, тапэкIэ гухэлъэу зыдиIыгъ­хэр ныбжьыкIэхэм къафиIотагъ. Яхэгъэгу итарихъ ашIэн, шIу алъэгъун зэрэфаер къариIуагъ.

Дзэ операциехэм тидзэкIолI­хэм лIыгъэу щызэрахьэрэм фэгъэхьыгъэ къэбархэр ныбжьыкIэхэм ашIогъэшIэгъонэу едэIугъэх. Непэрэ мафэм илIы­хъужъхэм патриотизмагъэу, зэкъошныгъэу, зыкIыныгъэу ахэлъыр къыткIэхъухьэрэ лIэ­ужхэм ящысэтехыпIэх.

Студентхэм яупчIэ зэфэшъхьафхэм игъэкIотыгъэ джэуап­хэр Сергей къаритыжьыгъ.

ДЕЛЭКЪО Анет.