Къэгъэлъэгъон-форумэу «Урысыер» зыфиIоу Москва щыкIорэр къызызэ­Iуахыгъэр мазэ хъугъэ. ШэкIогъум и 4-м ВДНХ-м ащ иIофшIэн щиублагъ, Адыгеим фыхэхыгъэ чIы­пIэр зэгъокIэу зыкIи къы­хэкIыгъэп.

[caption id="attachment_142685" align="aligncenter" width="800"] С. Кушъу.[/caption] [caption id="attachment_142686" align="aligncenter" width="800"] С. Кушъу.[/caption]

ЭкономикэмкIэ, культурэмкIэ, медицинэмкIэ, спортымкIэ, гъэсэныгъэмкIэ, зекIонымкIэ — лъэныкъо пстэумкIи къэралыгъом ишъолъырхэм зэкIэми хэхъоныгъэу ашIыгъэр ащ къыщыгъэлъэгъуагъ. Анахь чанэу Iофтхьабзэм хэлажьэрэмэ ащыщ Адыгеир. Мазэм къыкIоцI ащ игъэлъэгъуапIэ щы­жъот. Республикэм илIыкIохэр щызэблэ­кIыхэзэ, еплъынэу ащ къекIуалIэхэрэм шъолъырым ищыIэкIэ-псэукIэ илъэныкъо пстэуми нэIуасэ афа­шIых. Мы мафэхэм ВДНХ-м къикIыжьыгъэу, АР-м культурэмкIэ иминистрэ игуадзэу Кушъу Светланэ къызэриIуагъэмкIэ, Адыгеим игъэлъэгъуапIэ пчэдыжьым къыщегъэжьагъэу пчы­хьэ кIахэ нэс Iоф ешIэ.

[caption id="attachment_142687" align="aligncenter" width="800"] С. Кушъу.[/caption]

АР-м зекIонымрэ зыгъэпсэфыпIэхэмрэкIэ и Комитет мафэр ащ къыщызэIуехы. Респуб­ликэм ичIыпIэ дахэхэм, Iошъхьэ лъагэхэм нэIуасэ уафэзышIырэ фильмыр къегъэлъагъо. Ащ фы­тегъэпсыхьэгъэ нэгъунджэхэм яшIуагъэкIэ ушъхьащыбыбыкIырэм фэдэу чIыопсым ухэплъэн олъэкIы. ЗекIуабэхэм ашIогъэшIэгъонэу ар аушэты. Джащ фэдэ шIыкIэкIэ осрыкIохэмкIэ Адыгеим икъушъхьэхэми «къащыпкIухьан» олъэкIы. Ащ нэмыкIэу, Адыгеим ичIыопс, зе­кIоным, лъэпкъ шхыныгъохэм афэгъэхьыгъэ упчIэ-джэуап джэ­­гукIэхэр щырагъэкIокIых. Ахэм ахэлажьэхэрэр шIухьафтынынчъэу IукIыжьыхэрэп. Адыге­им къэкIонхэ зэралъэкIыщт пу­тевкэхэри арылъхэу зэ­пеохэр зэхащагъэх.

Лъэпкъ IэпэщысэхэмкIэ IэпэIасэхэми IэнэкIэу хьакIэхэр агъэкIожьхэрэп. Зызэблахъузэ, ахэр къэгъэлъэгъоным чанэу хэлажьэх. Мы мафэхэм ащ щыIэх Нэгъуцу Аслъан, ТIэшъу Мэзагъо, Акъущ Фатимэ.

«Культурнэ программэу тиIэр баи. ПхъэкIычхэм яшIынкIэ мастер-классхэр Нэгъуцу Ас­лъан регъэкIокIых. ЗышIо­гъэшIэгъонэу къекIуалIэрэр бэ. Мэкъэмэ Iэмэ-псымэр зыщыщыр, лъэпкъым зэригъэфедэрэр, мэхьанэу ритырэр къафе­Iуатэ. Ащ имызакъоу, пхъэкIыч цIыкIухэр арегъэшIых ыкIи шIу­хьафтынэу аретыжьых. Ар зэ­кIэми лъэшэу ягуапэ мэхъу. Джащ фэд ТIэшъу Мэзагъуи. ПIуаблэм ишIыкIэ цIыфхэм арегъэлъэгъу, итарихъ бай щегъэгъуазэх. Ащ ишIыкIэ ари­гъэлъэгъу къодыеу щымытэу, игъэхьазырыни хегъэлажьэх. СатыритIу-щыр ашIогъэшIэгъонэу ашIы. Акъущ Фатими шъагъэм, уагъэм яшIын щегъэгъуа­зэх, Iэпшъэрылъхэр арегъаблэх, зыдарегъэштэжьых. А пстэумэ акIыгъужьэу Адыгеим икъэбар афэтэIуатэ. Арышъ, тиIофшIэн гъэшIэгъонэу рекIо­кIы», — Адыгеим игъэлъэгъуа­пIэ Iоф зэришIэрэм тыщигъэ­гъозагъ Кушъу Светланэ.

  [caption id="attachment_142688" align="aligncenter" width="800"] АР-м культурэмкIэ и Министерств.[/caption]

АР-м шIэныгъэмрэ гъэсэ­ныгъэмрэкIэ и Министерстви Адыгеим игъэлъэгъуапIэ щэла­жьэ. ХьисапымкIэ хырыхыхьэ гъэшIэгъонхэр, джэгукIэхэр щы­рагъэкIокIых. ЦIыкIухэм апай нахь мышIэми, инхэми ашIогъэ­шIэгъонэу зыщаушэты. А пстэумэ адакIоу лъэпкъ шъуа­шэхэр зыщыгъхэм уаготэу сурэт зыщытепхын плъэкIыщт.

«ЗекIохэм янэплъэгъу ахэм псынкIэу зыфащэ, акIэрэхьэх, лъэпкъ шъуашэхэр зэрагъэлъэгъух, акIэупчIэх, сурэтыбэ зытырахы. Зэпыугъохэр зыхъухэ­рэм, тыфимытыми, къашъохэр кIэкIэу къятэгъэлъэгъух, тиныбжьыкIэхэм орэдхэр къаIох, пщынэ еох. Ар лъэш дэдэу агу рехьы. КъыкIэлъыкIорэ мафэм къытфэзыгъэзэжьыхэрэр бэу къахэкIы. Джащ фэдэу Мые­къуа­пэ инэпэеплъ сурэтхэу, ду­наим исыд фэдэрэ цыпэ бгъэ­хьын плъэкIыщтхэри цIыф­хэм агу рехьы», — ылъэгъу­гъэмкIэ къыддэгощагъ Кушъу Светланэ.

Джащ фэдэу медицинэри, спортыри гъэшIэгъонэу Iофтхьабзэм къыщыгъэлъэгъуагъэх. Адыгеим фыхэхыгъэ чIыпIэр зэгъокIы къамышIэу лъэныкъо пстэумкIи республикэм илIыкIохэр гъэлъэгъуапIэм щылэжьэщтых. Шъугу къэдгъэкIыжьын, къэгъэлъэгъон-форумэу «Урысыер» зыфиIорэр мэлылъфэ­гъум и 12-м нэс кIощт. Къэралыгъом ис лъэпкъ пстэумэ язэмылIэужыгъуагъэ, якультурнэ ыкIи гу­шъхьэбаиныгъэ, шъолъырхэм хэхъоныгъэу ашIыхэрэр къэгъэ­лъэгъогъэнхэр ащ ипшъэрылъ.

Анцокъо Ирин.