«ЛIыхъужъэу цIыфыр къэхъурэп» зыIохэрэр щыIэх. Арэу щытми, ащ фэдэхэр зэрэщыIэхэр уахътэм къыгъэлъэгъуагъ.

[caption id="attachment_142659" align="aligncenter" width="800"] А. Кобж[/caption]

Тхылъхэм, гъэзетхэм къары­хьэхэрэр, кинофильмхэм къагъэлъагъохэрэр арэп зигугъу тшIыхэрэр, къытхэтхэу, щыIэныгъэм тапэ къыщифэхэрэр ары. ГущыIэм пае, хэбзэухъу­мэкIо къулыкъухэм ясатырхэм ахэтых. ГухэкIыми, ахэм къулыкъу ыхьызэ зыпсэ зыгъэтIы­лъыгъэу бэ къахэкIырэр.

… 2005-рэ илъэсым игъэтхапэ и 25-р къуаджэу ШэхэкIэй къыщыхъугъэ тхьамыкIагъомкIэ зэкIэми агу къинагъ. УIэшыгъэ бзэджашIэу кIэзытхъужьыгъэм а мафэм нэбгыритIу екIод­ылIагъ. ПсэупIэм километрэ заулэкIэ пэIудзыгъэ мэзым къыщыхъу­гъэм икъэбар пчыхьэм сыхьатыр 4-хэм адэжь милицием къызлъы­Iэсыгъэр. ГумэкIыгъом хидзэгъэ къоджэдэсэу къэзэрэугъоигъэ­хэм ар зэрэхъугъэм бэп хашIыкIыщтыгъэр. Ау милицием, ОМОН-м ахэтхэу ШэхэкIэй къэ­кIуагъэхэм мэзым зызыхатакъом, Iофыр къызэрыкIоу зэрэщымытыр къагурыIуагъ.

[caption id="attachment_142660" align="aligncenter" width="800"] З. Къун[/caption]

Бэшхо темышIагъэу къэбар шъыпкъэр къалъыIэсыгъ. Зыщыщ амышIэрэ уIэшыгъэ хъулъфы­гъэу дзэкIолIхэр къамышIэнхэм пае зыщалъэрэ щыгъынхэм афэдэ зыщыгъым Шъачэ имэзпэситIум­рэ къоджэдэсхэм ащыщ горэмрэ IашэкIэ къяуагъ. Ахэм ащыщ къыукIыгъэмэ е къыуIагъэмэ следственнэ частым иIофышIэ­хэр къызэкIожьхэр ары ныIэп нафэ къызыхъугъэр. Ахэм къы­зэраIуагъэмкIэ, мэзпэсхэм къа­гъэгъунэрэ Iахьхэр къауплъэкIугъэхэу ядэжь къэкIожьхэзэ, автоматкIэ уIэшыгъэ хъулъфыгъэр алъэгъугъ. Ар зыщыщыр зэригъэшIэнэу поселкэу Шэхапэ щыщ

Хъущт Мэдин ыуж ихьагъ, IэпыIэгъу ащ фэхъунэу ШэхэкIэй щыщ Кобж Аскэрбыйи ежьагъ. ТIури бзэджашIэм къыукIыгъэх.

ЧIыпIэр ыкIи хэкIодагъэхэр къызызэпаплъыхьэхэм, къяуагъэр щэрыоным зэрэфэIазэр къэнэфагъ. БзэджашIэр Калашниковым иавтоматкIэ къауи, блэмыоу ашъхьэхэм къатыригъэфагъ. ШэкIо Iашэу ыукIыгъэ­хэм аIыгъыгъэхэр зыдиштэхи, хэхьажьыгъ. Мэзпэсэу яавтомобиль дэжь къыIунэгъагъэр ары милицием макъэ езыгъэIугъэр.

[caption id="attachment_142661" align="aligncenter" width="800"] В. Попов[/caption]

БзэджашIэм лъыхъунхэу ыуж ихьагъэх, вертолетхэм анэсы­жьэу ащ къыхагъэлажьэщтыгъ. ЯтIонэрэ мафэм, гъэтхапэм и 26-м, ПсышIопэ районым ипоселкэу Вардане ыгъунэкIэ щыIэ унэхэм ащыщ ралъэгъуагъэу къараIуи зэкIохэм, ащ бзэджа­шIэр исэу къычIэкIыгъ. Iа­шэкIэ къяожьзэ оперуполномоченнэу, старшэ лейтенантэу Къунэ Заур джа чIыпIэм щыхэкIодагъ, лейтенантэу Владимир Поповым уIэгъэ хьылъэу къытырищагъ­эм апкъ къикIэу сымэджэщым ыпсэ щитыгъ. БзэджашIэри унэм раукIыхьагъ.

Ащ фэдиз цIыфыр зыIэкIэкIодагъэр ПсышIопэ районым ит псэупIэу Солох-Аул щыщэу, аужырэ илъэсхэм Хосте Iоф щызышIэщтыгъэ Григорий Дегелевыр ары. НахьыпэкIэ «спецназым» хэтыгъ, дзэкIолI анахь дэгъоу, «элитнэкIэ» алъы­тэрэ отрядым хэтхэр къызэрэхагъэщырэ тамыгъэу «Краповый берет» зыфаIорэр зиIэхэм ащыщыгъ, снайперыгъ, «Iэшэ чъыIэкIэ» заджэхэрэмкIэ узэрэзэощтым хэшIыкIышхо фыриIагъ, «чIыпIэ плъырхэм» къулыкъу ащихьыгъ.

Хэгъэгу кIоцI IофхэмкIэ Гъэ­IорышIапIэм ипресс-къулыкъу а лъэхъаным къызэритыгъагъэмкIэ, 2004-рэ илъэсым автомобилэу ВАЗ-2111-м исхэм IашэкIэ ахауи, нэбгыритIур ыукIыгъэу, зыр ыуIагъэу милициер лъыхъу­щтыгъ.

[caption id="attachment_142662" align="aligncenter" width="800"] М. Хъущт[/caption]

Бэрэ мэзым зыщигъэбылъэу хэтыгъ. Дэгъоу псыхьэгъагъ, чIыпIэр ышIэщтыгъ, ухьазырыныгъэ дэгъу зэриIагъэр нафэ, ау псаоу закъыIэкIигъэхьан ыгу хэлъыгъэп. Мэзпэсхэр ыуж зехьэхэм, зэрэлъыхъухэрэр ешIэти, ахэр милицием иIофышIэхэу къыщыхъуи, къяуагъ. Зызщигъэбылъыщтыгъэ унэр къызалъыхъум Калашниковым иавтомат, ащ ищыкIэгъэ щэхэр, штык-шъэжъые, гранатищ, кIэрахъо ыкIи дзэкIолIхэм зызэрагъэбылъырэ щыгъынхэр къырагъотагъэх.

Адыгэ Республикэм и Кощ­хьэблэ район щыщ Къунэ Заурэу илъэс 26-рэ нахьыбэ зымыныбжьыгъэр, лIыбланэу зэкIэмэ апэ бзэджашIэу нэбгырих зыукIыгъэм пэуцужьыгъагъ. Ар къызщыхъугъэ къуаджэу Блащэпсынэ щагъэтIылъыжьыгъ.

Урысые Федерацием хэгъэгу кIоцI IофхэмкIэ и Министерствэ и Суворовскэ училищэу къалэу Новочеркасскэ дэтыр, етIанэ Краснодар июридическэ институт къыухыгъэхэу Кощхьэблэ районым, къалэу Мыекъуапэ яуголовнэ розыскхэм къулыкъу ащихьыгъ, нэужым Шъачэ зыкъыгъэзэжьыгъагъ.

Къунэ Заур ыцIэ къуаджэм иурамхэм ащыщ фаусыгъ. А илъэс дэдэм еджапIэу зыщеджа­гъэм шIэжь пхъэмбгъу къыщыфызэIуахыгъ.

Владимир Поповым илъэс 27-рэ ыныбжьыгъэр. Дзэ къулыкъу ужым апшъэрэ юридическэ гъэсэныгъэ зэригъэгъоти, хэгъэгу кIоцI IофхэмкIэ Шъачэ и ГъэIорышIапIэ стажерэу щыригъэжьэгъагъ, нэужым уголовнэ розыскым щылэжьагъ. Ар лIыхъужъхэм я Аллееу къалэм икъэхалъэ щагъэпсыгъэм щагъэ­тIылъыгъ.

Къунэ Зауррэ Владимир Поповымрэ лIыблэнагъэу зэрахьагъэм пае щымыIэжьхэу ЛIы­хъужъныгъэм иорден къафагъэ­шъошагъ, УВД-м иличнэ состав егъашIэм хэтынхэу хатхагъэх.

Хъущт Мэдини милицием хэтыгъэу, отставкэм зэкIом Шъачэ ичIыопс заказник имэз­пэсыгъ. Кобж Аскэрбый Адыгэ къэралыгъо университетыр къыухыгъэу Тыгъэмыпсэ испорт еджапIэ ипэщагъ. Ахэр а зы мафэм, 2005-рэ илъэсым игъэт­хапэ и 27-м, зыщыщхэ Шэхапэрэ ШэхэкIэйрэ ащагъэтIылъы­жьыгъэх. ТIуми унагъохэр, сабыйхэр къакIэныгъэх. Мэдин загъэтIылъыжьыгъэ мафэм ыныбжь илъэс 50 хъунэу щытыгъ…

НЫБЭ Анзор. Сурэтхэр: хэгъэгу кIоцI Iоф­хэмкIэ Шъачэ и ГъэIорышIапI.