Урысые Федерацием узэрикIыщтым ыкIи укъызэрихьащтым шапхъэу апылъхэм, дипломатическэ, къулыкъу ыкIи IэкIыб узэрэкIощт паспортхэм кIуачIэ ямыIэжьэу зыщалъытэщтым фэгъэхьыгъэ хэбзэгъэуцугъэм тыгъэгъазэм и 11-м кIуачIэ иIэ хъущт.

Джыдэдэм Урысыем щыпсэухэрэр шъхьафитэу къэралыгъом екIых. Шъыпкъэ, зэкIэри арэп. Уголовнэ бзэджэшIагъэ зэрихьагъэу зэгуцафэхэрэм, чIыфэхэр зытелъхэм, истыхьагъэу алъытагъэхэм, къэралыгъо е дзэ шъэфхэм ащыгъуазэхэм ащ фэдэ фитыныгъэ яIэп. Ахэм анэмыкIэу щынэгъончъэнымкIэ Федеральнэ къулыкъум иIофышIэхэм, дзэм къулыкъу щихьынэу ащагъэхэм ыкIи мобилизацием хэфагъэхэм шъхьафитэу гъунапкъэр зэпачын алъэкIыщтэп.

ШэпхъакIэхэм къызэрэдалъытэрэмкIэ, IэкIыбым узэрэкIощт паспортыр, дипломатическэр ыкIи служебнэр мытэрэзхэу алъытэщт ар зием ыцIэ, ылъэкъуацIэ, зыщыпсэурэр, къызщыхъугъэр зэблихъугъэхэмэ е ахэм япIалъэ икIыгъэмэ. Джащ фэдэу цIыфыр ушъхьагъу горэм ыпкъ къикIыкIэ Урысыем имыцIыф хъугъэмэ, гущыIэм пае, гражданствэр Iахыжьыгъэмэ, мы паспортхэм кIуачIэ ямыIэжь мэхъу.

Ащ имызакъоу, ушъхьагъу зэфэшъхьафхэм апкъ къикIэу Урысыем икIынэу фитыныгъэ зыIахыгъэм IэкIыбым зэрэкIощт паспортыр хэгъэгу кIоцI IофхэмкIэ къулыкъум, IофшIэпIэ чIыпIэ къезытыгъэм, къэралыгъо шъэфым щызыгъэгъозагъэм е хьыкум приставхэм аритын фае. IэкIыбым икIын зэрэфимытыжьыр къыз­щиIорэ тхылъыр къызыIэкIэхьагъэм ыуж мэфитф нахьыбэ темышIэзэ ар ымыгъэцакIэмэ, паспортыр мытэрэзэу алъытэщт. Фитыныгъэр къызыратыжькIэ тхылъми къырагъэгъэзэжьыщт.