УФ-м зыкъэухъумэжьынымкIэ и Министерствэ зэхищэгъэ теле­лъэмыдж Мыекъопэ къэралыгъо технологическэ универ­си­тетым щыкIуагъ. Ащ ишIуагъэкIэ апшъэрэ еджапIэм истудентхэу академическэ зыгъэпсэфыгъо зыштэхи, хэушъхьафы­кIыгъэ дзэ операцием хэлажьэхэрэм яIахьыл-гупсэхэр алъэгъунхэ, адэгущыIэнхэ амал яIагъ. Мыщ фэдэ шIыкIэр Адыгеим апэрэу щагъэфедагъ.

Iофтхьабзэм хэлэжьагъэх Къыблэ дзэ шъолъырым изэхэт стратегическэ командование иинспектор куп хэт генерал-­майорэу Александр Дорофе­евыр, республикэ дзэ комиссариатым иотдел ипащэу Одэжьдэкъо Руслъан, Урысые дзэ-пат­риотическэ общественнэ движениеу «ЮНАРМИЯ» зыфиIорэм ишъолъыр къутамэу АР-м щыIэм ипащэу Джарымэкъо Аз­мэт, апшъэрэ еджапIэм иректорэу Къуижъ Саидэ, ащ икIэлэ­егъаджэхэр, студентхэр, дзэкъу­лыкъушIэхэм яIахьылхэр.

ХэушъхьафыкIыгъэ дзэ опе­ра­цием щыIэ частьхэм яподразделениехэмрэ республикэ дзэ комиссариатымрэ зэдагъэ­псыгъэ пэIудзыгъэ зэпхыныгъэ шIы­кIэр агъэфедэзэ, дзэкъулыкъушIэ-студентхэр къэгущыIа­гъэх. Ахэм яжэу щысыгъэхэ ягу­псэхэр, яныбджэгъоу къадеджэхэрэр къызщытэджыкIыгъэх. ГушIуагъори, нэпсхэри зыхэтыгъэ зэIукIэгъур фэбагъэ хэлъэу рекIокIыгъ. Зидзэ пшъэ­рылъхэр зыгъэцэкIэхэрэ тиныбжьыкIэхэм зэряжэхэрэр, ТекIоныгъэр яеу къызэрэкIожьыщтхэм яцыхьэ зэрэтелъыр къэгущыIэгъэ пстэуми къыхагъэщыгъ.

Апшъэрэ еджапIэм иректорэу Къуижъ Саидэ къызэриIуагъэмкIэ, университетым щеджэрэ нэбгыри 114-рэ мы уахътэм хэу­шъхьафыкIыгъэ дзэ операци­ем хэлажьэх. Ахэр ыкIи яунагъохэр зэращымыгъупшэхэрэр, Iэпы­Iэгъу зэрафэхъухэрэр ащ къы­Iуагъ.

Телелъэмыджым иамалкIэ дзэ­къулыкъушIэ-студент нэбгыри 6 къэгущыIэн зылъэкIыгъэр. Я 238-рэ гвардейскэ артиллерийскэ бригадэм имладшэ сер­жантэу Андрей Пимахиныр ахэм зэу ащыщ. Мыекъопэ къэра­лыгъо технологическэ университетым икъутамэу Яблоновскэм щыIэм иапэрэ курс ще­джэзэ академическэ зыгъэпсэфыгъо ышти, 2022-рэ илъэсым чъэпыогъум къыщегъэжьагъэу дзэ операцием хэлажьэ.

Запорожскэ лъэныкъом щыIэ дзэ купхэм ахэтых рядовойхэу ЯхъулIэ Аслъанрэ (факультетэу «Прикладная мате­мати­ка» зыфиIорэм ия 4-рэ курс ис) Муслим Ачхановымрэ (я 3-рэ кур­сым ис, юрист сэнэ­хьатым фе­джэ). Муслим икIыгъэ илъэсым ишэкIогъу мазэ, Аслъан 2023-рэ илъэсым икъи­хьагъум кIуагъэх. «Вербового» ыкIи «Работино» зыфиIорэ районхэм адэжь мыхэр зыхэтхэ гвардейскэ дзэхэм украинэ нео­нацистхэр ащызэкIафэнхэ алъэ­кIыгъ.

Таллинскэ артиллерийскэ бригадэм хэтых рядовоеу Константин Гусаровымрэ (Позд­няковыр) ефрейторэу Руслан Агарковымрэ.

ЗэдэгущыIэгъу занкIэр окIофэ, лIыхъужъныгъэу, лIыблэ­нагъэу зэрахьагъэхэм ыкIи щытхъу хэлъэу ядзэ пшъэрылъхэр зэрагъэцакIэхэрэм афэшI тикIалэхэм къалэжьыгъэ медальхэр якомандирхэм къаратыжьыгъэх.

ЛIыхъужъныгъэм иорден къы­зэратыгъэ младшэ сержантэу Андрей Пимахиныр илъэситIум ежьагъ хэушъхьафыкIыгъэ дзэ операцием зыхэлажьэрэр. УIэгъэ хьылъэ къытыращи ипсауныгъэ зыпкъ зырегъэуцожьым, къулыкъушIэхэм ахэхьажьыгъ. Ащ ишъхьэгъусэу Софье гущыIэгъу тызыфэхъугъэхэм ащыщ.

— Андрейрэ сэрырэ пшъэшъэ­жъые цIыкIу зэдэтэпIу. ИкIыгъэ илъэ­сым ишышъхьэIум ар къэ­хъугъ, мазэ зэрэтешIэу гуфакIоу ежьыр кIуагъэ. Ащ ыпэкIи зэзэ­гъы­ныгъэкIэ къулыкъур ыхьы- нэу фэягъ, ау сабыир къэхъуфэ ежагъ. Мобилизациер зыра­гъа­жьэм, ыбгъукIэ щытэу яплъы­нэу фэягъэп. Сэ сизакъоп, унэм ис­хэр зэкIэ Андрей ежэх: янэ­ятэхэри, ыши, ипшъашъи. Ар тэркIэ ЛIыхъужъ шъыпкъ, — хигъэунэфыкIыгъ Софье.

ЯхъулIэ Аслъан иIахьылхэри Iофтхьабзэм къекIолIагъэх. Ащ ышыпхъоу Сусанэ иеплъыкIэ­хэмкIэ къыддэгощагъ:

— ТшынахьыкIэ кIэлэ ныбжьыкI, джыри унагъо ышIэнэу игъо ифагъэп. ХэушъхьафыкIыгъэ дзэ операциер рагъажьи, Хэгъэгум IэпыIэгъу ищыкIагъэ зэхъум щысын ыдагъэп, зэзэгъыныгъэм кIатхи, ащ кIуагъэ. Унашъоу ащ ышIыгъэм зэкIэми дедгъэштагъ. Лъэшэу тыфэгумэкIы, тежэ. Игъэхъагъэхэр непэ къызэрэхагъэщыгъэр ошIэ-дэмышIагъэ тфэхъугъ, ар теле­лъэмыджым нэрылъэгъу къытфишIыгъ. Аслъан къауIэнэу игъо ифагъ, госпиталым мэзитIурэ тыщеIэзагъэх. Зыпкъ зэриуцо­жьэу ыгъэзэжьыгъ. Тыгъэгъазэм ыкIэхэм адэжь ар зыгъэпсэ­фыгъом къэкIонэу тежэ.

Къалэу Грознэм къикIыхи, Муслим Ачхановым янэрэ ышыпхъурэ къэкIуагъэх. ПэIудзыгъэ шIыкIэм тет нахь мышIэми, якIалэ зэралъэгъугъэм ахэр ры­разэх. ИкIыгъэ илъэсым ишэ­кIогъу мазэ къыщегъэжьагъэу зэ нахь алъэгъунэу хъугъэп, ари уIагъэ телъэу къызэкIо- жьыр ары.

— Телелъэмыджыр зэхэзыщэгъэ пстэуми лъэшэу тафэраз, — еIо Муслим ышыпхъоу Хедэ. — Ащ иамалкIэ сшы зэдгъэлъэгъун, зэхэтхын тлъэ­кIыгъ. ТилIыхъужъ къызэрэ­кIо­жьы­щтым тежэ, ТекIоныгъэр къызэрэдахыщтым тицыхьэ телъ.

Мыщ фэдэ телелъэмыджхэр зэрэкъэралыгъоу ащырагъэ­кIо­кIынхэр хабзэ хъугъэ. Мыекъо­пэ къэралыгъо технологическэ университетыр чIыпIэ афэхъуи, АдыгеимкIэ апэрэу зэхащэгъэ зэдэгущыIэгъу занкIэм джыри къыкIэлъыкIонэу зэрэщыгугъы­хэрэр ащ хэлэжьагъэхэм къыха­гъэщыгъ.

Iэшъынэ Сусан. Сурэтхэр: Артур Лаутен­шлегер.