Джырэ уахътэмкIэ апшъэрэ Iоф
Мэзих хъугъэ къэралыгъо фондэу «Хэгъэгум иухъумакIохэр» зыфиIорэр зызэхащагъэр.
[caption id="attachment_142613" align="aligncenter" width="800"] М. Гордышов.[/caption]
УФ-м и Президентэу Владимир Путиным иунашъокIэ ар шъолъырхэм зэкIэми ащагъэпсыгъ хэушъхьафыкIыгъэ дзэ операцием хэлажьэхэрэмрэ ахэм яунагъохэмрэ IэпыIэгъу ягъэгъотыгъэным фэшI.
Мы IофшIэныр республикэм зэрэщызэхэщагъэм ежь ышъхьэкIэ лъэплъэ Адыгеим и ЛIышъхьэу КъумпIыл Мурат. Тишъолъыр ипащэ Адыгеим фондым икъутамэу итым зыщэIэм ыуплъэкIугъ ащ Iоф зэришIэрэр, къекIолIагъэхэм гущыIэгъу афэхъугъ, фэIо-фашIэхэр икъоу ыкIи тэрэзэу арагъэгъотымэ, амалэу аIэкIагъахьэхэрэр зэрифэшъуашэу агъэпсэуалъэхэмэ, зэригъэшIагъ. Мы зэпстэури зэшIуахынхэм фэшI Мыекъуапэ игупчэ чIыпIэ къащыфыхахыгъ, унэу къутамэр зычIэтыщтыр зэтырагъэпсыхьагъ — рагъэблагъэхэфэ зыщежэщтхэ чIыпIэхэр, егъэблэгъапIэхэр, зэхэсхэу зыщыгущыIэшъущтхэр, кIэлэцIыкIухэм апае къогъупэр агъэпсыгъэх. Юридическэ, психологическэ, социальнэ-медицинэ IэпыIэгъу зыщагъотышъущт унэ хэхыгъэхэр лъэныкъо зэфэшъхьафхэм атегъэпсыхьагъэхэу мыщ къыщызэIуахыгъэх, хэгъозэжьын ыкIи зэтегъэуцожьын фэIофашIэхэми ателъытагъэхэр хэтых.
[caption id="attachment_142614" align="aligncenter" width="800"]
М. Гордышов.[/caption]
«Мэхьанэшхо иI мыщ IофшIэныр зэрэщыжъотым. КъекIуалIэхэрэм игъэкIотыгъэу адэлажьэх, пстэуми ашIэ зызфэбгъэзэн фаер, IэпыIэгъуи агъоты. Илъэсныкъом IофшIэныр щызэхэтщэшъугъ лъэныкъо зэмылIэужыгъохэмкIэ бгъу пстэури къызэлъиубытэу гумэкIыгъоу къэхъухэрэр дэдгъэзыжьынхэ тлъэкIынэу ыкIи нэбгырэ пэпчъ IэпыIэгъу едгъэгъотынэу», — къыIуагъ КъумпIыл Мурат.
Къэралыгъо фондым икъутамэ ипащэу ПIатIыкъо Аслъан къызэрэхигъэщыгъэмкIэ, хэушъхьафыкIыгъэ дзэ операцием хэлажьэхэу, ащ иветеранхэу ыкIи мыхэм яунагъохэм ащыщхэу мэзихым IэпыIэгъу зэрагъэгъотыгъэхэм япчъагъэ 1100-рэ мэхъу. Социальнэ Iоф гъэзекIуакIохэм упчIэ 1800-рэ фэдиз къаIэкIэхьагъ, гумэкIыгъохэм япроцент 75-м ехъу зэшIуахыгъах. Джащ фэдэу хэушъхьафыкIыгъэ дзэ операцием иветеранхэр общественнэ Iофыгъохэм ахэгъэлэжьэгъэнхэми фондыр игъэкIотыгъэу дэлажьэ. Ащ патриотическэ пIуныгъэмкIэ амалыкIэхэр къетых.
Къэралыгъо хэбзэ IофышIэхэм, общественнэ IофшIэнхэм апылъхэм ыкIи волонтерхэм язэдэлэжьэныгъэ агъэпытэзэ IофшIэнэу зэшIуахырэм хагъэхъозэпытынэу КъумпIыл Мурат пшъэрылъ афишIыгъ.
«ТидзэкIолIхэр мэбанэфэхэ ахэм яунагъохэм, яIахьылхэм тэ тынаIэ атедгъэтын фае. Мы IофшIэныр тэркIэ апшъэу щыт!» — къыIуагъ Адыгеим и ЛIышъхьэ.