Адыгеим гидрометеорологиемкIэ и Гупчэ къызэрэща­IуагъэмкIэ, хабзэ зэрэхъугъэу, тыгъэгъазэм зыпкъиты­ныгъэ иIэщтэп, пщагъор къебэкIыщт ыкIи ощх-ос цIынэ зэхэлъыр щыIэщт.

Ау бэп ащ фэдэ мафэу къыхэкIыщтыр. Мэхьанэшхо зиIэ мафэу тыгъэгъазэм и 22-м «день зимнего солнцестояния» раIо. ИлъэсымкIэ а мафэр зэкIэмэ анахь кIаку ыкIи чэщыр анахь кIыхь.

— Илъэсыбэ хъугъэу уплъэкIунэу тшIыгъэхэм язэфэхьысыжьхэм къызэрагъэлъэгъуагъэмкIэ, АдыгеимкIэ ты­гъэгъазэм мэфэ чъыIэ дэдэхэр, градус 15 — 20 щыIэу къыхэкIыгъ, ащ дакIоу фабэри градус 15 — 20-м ехъоу хъугъэ. 1999-рэ илъэсым тыгъэгъэзэ мазэм фа­бэр градус 26-м нэсэу хъугъэ. Анахь чъыIэу градус 23-рэ зыщагъэунэфы­гъагъэр 1964-рэ илъэсыр ары, — къы- ­Iуагъ гидрометеорологиемкIэ ыкIи ты­къэзыуцухьэрэ дунаим имониторингкIэ Гупчэм ипащэу Александр Митровым.

ГурытымкIэ мы мазэм температурэр ыкIи ощх-осэу къехыщтыр шапхъэхэм анахьыбэщт. КъызыщыучъыIырэ уахътэм мылыр чъыгхэм ыкIи электрорыкIуапIэхэм апишIыхьащт.

Апэрэ мэфипшIыр. Чэщым фабэр градуси 5 — 10  -м фэдизыщт, къыхэ­кIыщт чъыIэр градуси 5-м зыщынэ­сыщтхэри. Мафэм фабэр градус 17 — 22-рэ щыIэу къыхэкIыщт.

ЯтIонэрэ мэфипшIыр. Чэщхэр градуси 8-м нэсэу чъыIэщтых, мафэхэм фабэр градуси 5 — 10 -м кIэхьащт.

Ящэнэрэ мэфипшIыр. Тыгъэгъазэм икIэухым ом изытет зэхъокIыщтэп, чэщым чъыIэр градус 4-м, мафэм градуси 2 — 7-м анэсыщт.

Тыгъэгъазэм псыхъохэм адэт псыр шапхъэхэм атетыщт, къызщигъэжъурэ уахътэм ыкIи лъэшэу къызещхыкIэ, къы­дэкIоещт.

Мазэм иапэрэ мэфипшIым бжыхьасэхэм макIэу ахэхъощт. Мэкъумэщ культурэхэм чъыIэр къягоощтэп.

КIАРЭ Фатим.