Адыгеим гъэсэныгъэмкIэ иIофышIэ гъэшIуагъэу Хьазэщы­къо Юныс ыныбжь илъэс 80 зэрэхъурэр тыгъэгъа­зэм хегъэунэфыкIы.

Юныс 1943-рэ илъэсым къуаджэу Къунчыкъохьаблэ къыщыхъугъ. 1969-рэ илъэсым Адыгэ къэралыгъо кIэлэегъэджэ институтыр къыухыгъ, ичылэ дэт гурыт еджапIэм хьисапымрэ физикэмрэ илъэс­рэ ащыригъэхьыгъ. Нэужым Мыекъуапэ къэкIожьи сэнэхьат зэфэшъхьафхэм защафагъасэхэрэ техническэ училищхэм япащэу илъэс 20-рэ Iоф ышIагъ. Редукто­рышI заводым ипащэ игуадзэу, аужырэ илъэсхэм АКъУ-м и Мыекъопэ къэралы­гъо гуманитар-техническэ колле­джым изаочнэ отделение ипащэу лэжьагъ.

Юныс зыфэгъэзэгъэ IофшIэныр сыдигъуи дэгъоу ыгъэцэкIагъ. Шъыпкъэ, уишIэныгъэ бгъэфедэзэ, уиIофшIэгъухэм цыхьэ къызэрэпфашIырэр къэбгъэшъыпкъэжьызэ улажьэ зыхъукIэ, зэшIомыхын щыIэп.

Юнысрэ ишъхьэгъусэу Аминэтрэ илъэс 57-рэ хъугъэу зы щыIэныгъэ ­гъо­гу рэкIох. Тэмарэ илъэс 40-рэ хьисапыр еджапIэм щаригъэхьыгъ. Ар зипредмет дэгъоу зышIэрэ кIэлэегъаджэхэм ащыщыгъ, АР-м гъэсэныгъэмкIэ иIо­фышIэ гъэшIуагъ. ЗыкI къэралыгъо ушэтынхэм кIэлэеджакIохэр илъэсыбэрэ фигъэхьазырыгъэх.

Япшъашъэу Светэ Налщык дэт еджапIэхэм ащыщым ипащ. Иринэ хьисапымрэ программированиемрэкIэ Мые­къопэ къэралыгъо гуманитар-техническэ колледжым икIэлэегъадж. Япхъорэлъ- фэу Бэлэ аспирантурэр къыухыгъэу я 35-рэ колледжым щэлажьэ. Мы унагъор — кIэлэегъэджэ унагъу.

«КIэлэегъаджэр — сэнэхьат къодыеп, ащ укъыфэхъун фае, — еIо Юныс. —ЕджапIэм къычIэкIыгъэ кIэлэ ныбжьыкIэр ебгъэджэным, ар бгъэсэным, щыIэныгъэм фэбгъэхьазырыным апае зэпымыоу Iоф зыдэпшIэжьыныр пшъэрылъ шъхьаIэу щыт. НыбжьыкIэхэм сэнэхьатэу къыхахыщтым егупшысэнхэ фае.

Ащ елъытыгъ щыIэныгъэм чIыпIэу щаубытыщтыр. СищыIэныгъэкIэ сызэрыкIэгъо­жьырэ музыкальнэ Iэмэ-псымэхэр зэ­ры­сымыгъэфедагъэр ары. Пщынэр, гитарэр лъэшэу сикIасэх, ау ахэмкIэ сэнаущыгъэ зэрэсхэлъыр къэзгъэлъэгъуагъэп. УиIэпэIэсэныгъэхэр щыIэныгъэм щыбгъэфедэнхэ фае».

УкIэлэегъэджэныр, коллектив иным урипэщэныр псынкIэп. Ау уиIофшIэн шIу плъэгъоу, къыбгот цIыфхэм шъхьэкIэ­фэныгъэ афэпшIэу улажьэмэ, къыбдэмыхъун ыкIи зэшIомыхын щыIэп. А пшъэрылъыр Хьазэщыкъо Юныс дэгъоу ыгъэцэкIагъ.

Лъэпшъыкъо Фатим.