Комиссиехэр амыштэжьынхэу
ПсэупIэ-коммунальнэ фэIо-фашIэхэм ауасэ зытырэ пэпчъ ешIэ ащ ипроцент горэм фэдиз комиссиеу зэрэтехъорэр.
ЦIыфым ар зыщитырэ чIыпIэм, банкыр е почтэр арымэ, нэмыкI агентствэмэ, шIыкIэу ыгъэфедэрэм елъытыгъэу, процент ныкъом щегъэжьагъэу тIум нэсэу Iахы.
2024-рэ илъэсым ащ зэхъокIыныгъэшIухэр фэхъунхэу гугъапIэ щыI. УФ-м и Президентэу Владимир Путиным пшъэрылъ афишIыгъэу псэупIэ-коммунальнэ фэIо-фашIэхэм ауасэ комиссиехэр хамыгъэхъожьынхэм фэгъэхьыгъэ хэбзэгъэуцугъэм ипроект агъэхьазыри, УФ-м и Къэралыгъо Думэ апэрэ еджэгъумкIэ ыштагъ.
Ащ и Тхьаматэу Вячеслав Володиным къызэриIуагъэмкIэ, нэужым законопроектым УФ-м и Правительствэ щытегущыIагъэх, ятIонэрэ еджэгъум ар фагъэхьазыры. ИлъэсыкIэм законым кIуачIэ иIэ хъуным фэшI апшъэ ашIыгъэ Iофыгъохэм ащыщэу тыгъэгъэзэ мазэм тегущыIэнхэшъ, аштэн гухэлъ яI.
Джащ фэдэу банкхэм япащэхэри законопроектым нэIуасэ фашIыгъэх. Ахэм комиссиехэр амыштэжьыхэ зыхъукIэ зэрар ашIыщт. Арэу щытми, финанс илъэсыр мыдэеу зэраухырэм, мымакIэу хахъохэр зэряIэхэм къакIигъэтхъызэ, а хэбзэгъэуцугъэм иягъэ къэмыкIощтэу Къэралыгъо Думэм и Тхьаматэ ылъытагъ.
— Iофышхоу тшIэрэм мыр изы кIэух. Мыщ зэкIэми мэхьанэ етэты, сыда пIомэ депутатхэр кIэщакIо фэхъугъэх, Президентым къыддыригъашти, ар агъэцэкIэнэу пшъэрылъ къышIыгъ, — къыIуагъ Вячеслав Володиным.
Къихьащт мазэм хэбзэгъэуцугъэр УФ-м и Къэралыгъо Думэ зиштэкIэ, 2024-рэ илъэсым ищылэ мазэ и 1-м къыщыублагъэу псэупIэ-коммунальнэ фэIо-фашIэхэм ауасэ комиссиехэр хагъэхъонхэ фитыжьыщтхэп.