Дунаим гъогогъу 11-рэ ичем­пионэу, Урысыем спортымкIэ изаслуженнэ мастерэу Хьасанэкъо Мурат ишIухьафтынхэр зэрылъ зэнэкъокъу Мыекъуапэ щыкIуагъ.

Ащ икъызэIухын фэгъэхьыгъэ мэфэкI зэхахьэм хэлэжьагъэх АР-м и Къэралыгъо Совет — Ха­сэм и Тхьаматэ игуадзэу, Уры­сы­ем и ЛIыхъужъэу Цэй Эдуард, АР-м физическэ культурэмкIэ ыкIи спортымкIэ и Комитет итхьа­матэу Дэгужъые Мурат, Урысыем спортымкIэ изаслуженнэ мастерэу Абрам Агамирян, ежь Хьасанэкъо Мурат.

Турнирым ипэублэ тиспортсмен пэрытхэм ыкIи ахэм ятренерхэм ахъщэ шIухьафтынхэр ыкIи рэзэныгъэ тхылъхэр ащаратыжьыгъэх.

Урысые зэнэкъокъум къэралыгъом ишъолъыри 10-мэ къарыкIы­гъэ спортсмен 220-м ехъумэ зы­щаушэтыгъ, ахэр 2006 — 2008-рэ илъэсым къэхъугъэх. Хабзэ зэрэ­­хъугъэу АР-м исамбистхэм гъэ­хъэгъэшIухэр ашIыгъэх, хагъэунэфыкIырIэ чIыпIэ 11 къы­дахыгъ.

Тиспортсменхэу текIоныгъэр къыдэзыхыгъэхэр: Хъот Тамирлан, Цэй Алый, Хьакъуй Эльдар, Анцо­къо Амир, Мэлыщ Аскэр. ЯтIонэрэ чIыпIэр Батмэн Амин, Хьабэхъу Салбый, Бэгъ Салым афагъэшъо­шагъэх. Ящэнэрэ хъугъэх ­Алыбэрд Муслъим, ГъукIэлI Хьазрэт, Едыдж Салым. Самбистхэм ятренерых: А. Делэкъор, А. Гъомлэшкэр, Р. Джарымэкъор, А. Джарымэкъор, А. Хьабэхъур, З. Ацумы­жъыр, Ш. Нашыр, А. Мырзэр, Б. Шъэумэныр, А. Чэтыжъыр, Хъ. ГуIэтыжьыр, М. Еутыхыр.

Апэрэ чIыпIэр къыдэзыхыгъэ тиспортсменхэр Урысыем ипервенствэ ифиналэу 2024-рэ илъэ­сым зэхащэщтым хэлэжьэщтых. Джащ фэдэу ахэм кубокхэр, щытхъу тхылъхэр, медальхэр ыкIи ахъщэ шIухьафтынхэр афагъэ­шъошагъэх.

ТикIалэхэм ыкIи ахэр зыгъасэхэрэм тафэгушIо.

Зэнэкъокъум икIэух самбэмкIэ республикэ спорт еджапIэм ипащэу Делэкъо Адам турнирым ияблэнэрэ Кубок Хьасанэкъо Му­рат ритыгъ.