Нэбгырищ финалым ихьагъ
Адыгеим икIыгъэ кIэлэегъэджэ нэбгырищ зэнэкъокъоу «Флагманы образования» зыфиIорэм ифинал ихьагъэх. Лъэпкъ проектэу «Гъэсэныгъэм» ифедеральнэ проектэу «Социальные лифты для каждого» зыфиIорэм къыдыхэлъытагъэу Урысые Федерацием просвещениемкIэ и Министерствэ яIэпыIэгъоу ар зэхащагъ.
УФ-м просвещениемкIэ и Министерствэ ипресс-къулыкъу къызэритырэмкIэ, пэIудзыгъэ шIыкIэм тетэу гъэсэныгъэм ылъэныкъокIэ гъэIорышIэкIо 14195-рэ ыкIи кIэлэегъэджэ 57635-рэ ащ хэлэжьагъэх. Ахэм ащыщэу анахь баллыбэ къизыхыгъэ нэбгырэ 2183-р очнэ шIыкIэм тетэу кIогъэ шъолъыр финалныкъом, нэужым 265-р финалым ихьагъэх.
Мыекъопэ районым гъэсэныгъэмкIэ и Гупчэу N 2-м егъэджэн-пIуныгъэ лъэныкъомкIэ пащэм игуадзэу Наталья Досаевар, мы гупчэ дэдэм географиемкIэ ыкIи биологиемкIэ кIэлэегъаджэу Екатерина Тарасовар, Адыгэ республикэ гимназием физикэмкIэ икIэлэегъаджэу Инна Желноваковар финалым нэсыгъэх.
Гъэсэныгъэ программэ гъэшIэгъон зэнэкъокъум хэлажьэхэрэм афызэхащагъ. Апэрэ мафэм гъэсэныгъэм хэхъоныгъэхэр ышIынхэм ыкIи гумэкIыгъохэр дэгъэзыжьыгъэнхэм афэгъэхьыгъэ Iофтхьабзэхэр щыIагъэх. ПIуныгъэм епхыгъэ къэралыгъо политикэу щыIэр къафаIотагъ, лекциехэм къафяджагъэх. КIэлэегъаджэхэм яIофшIэн фэгъэхьыгъэ лъэтегъэуцомкIэ аухыгъ. ЯтIонэрэ мафэм экспертхэм Iоф адашIагъ. Ящэнэрэм зэнэкъокъум хэлажьэхэрэр зэгъусэхэу джырэ лъэхъаным Iоф зэрэпшIэщтым фэгъэхьыгъэу проектхэр зэхагъэуцуагъэх, ВДНХ-м щыIэ дунэе къэгъэлъэгъон-форумэу «Урысыер» зыфиIорэм яплIэнэрэ мафэм рагъэблэгъагъэх. Зэнэкъокъум иаужырэ мафэ гъэсэныгъэм исистемэ IэпэчIэгъэнэ IофышIэхэр иIэнхэм фэгъэхьыгъагъ. ГъэсэныгъэмкIэ министрэхэу УФ-м исубъектхэм къарыкIыгъэхэр, апшъэрэ еджапIэхэм яректорхэр ащ хэлэжьа- гъэх.
Сурэтхэр: проектым ипресс-къулыкъу