Мультфильм къыдагъэкIыщт
Адыгеим щыщ тхэкIо ныбжьыкIэу Славяна Бушневам мысатыу автоном организациеу «Черкес Медиаплатформа» зыфиIорэр игъусэу ащ итхылъхэм атехыгъэ мультфильм къыдагъэкIыщт. Пшъэшъэжъыер ныбжьыкI нахь мышIэми, тхэнымкIэ гъэхъэгъэшIухэр ышIынхэу игъо ифагъ, лъэпкъ литературнэ шIухьафтынэу «Илъэсым итхакIу» зыфиIорэр щэгъогогъо къыфагъэшъошагъ.
Славяна Бушневам ицIыкIугъом къыщегъэжьагъэу тхэныр икIас. Итхылъхэм пIуныгъэ-гъэсэныгъэ мэхьанэ апхырыщыгъ. Ныбджэгъуныгъэм, зэдеIэжьыным, лъэпкъ зэфэшъхьафхэм зэгурыIоныгъэ азыфагу илъыным фещэх. Адыгеим ичIыопс ухэтэу къэпкIухьэрэм фэдэу къыпщегъэхъу. Кавказым щыпсэурэ зэныбджэгъухэу Горик, Егорик ыкIи ос цIыфэу «Снежик» чIыпIэ гъэшIэгъонхэм арэфэх. Ахэм яIушыгъэ, ягулъытэныгъэ ыкIи гукIэгъоу ахэлъым яшIуагъэкIэ зэкIэми зэлъашIэщтых.
Славяна Бушневам итхылъхэм къахэхыгъэ пычыгъохэр Урысыем ыкIи IэкIыбым къащыдагъэкIырэ журналхэм къадэхьагъэх, джащ фэдэу УФ-м щыпсэурэ лъэпкъ зэфэшъхьафхэм абзэхэм аралъхьагъэу, аудиопшысэ шIыгъэу къащыдэкIыгъэх.
— КIэлэцIыкIухэм апае стхыгъэхэр мультфильм зэрашIыщтыр лъэшэу сигуапэ хъугъэ. «Черкес Медиаплатформэм» ар щытетэхы. Организацием хэушъхьафыкIыгъэ студие иIэу Iоф щытэшIэ. ЫпэкIэ мыщ фэдэ IофшIэн згъэцэкIагъэу хъугъэп, сценариер сшIогъэшIэгъонэу зэхэсэгъэуцо. Художественнэ произведениер икIэрыкIэу стхыжьыгъэ, мультфильмым ишапхъэхэм арыслъхьагъ, — еIо тхэкIо ныбжьыкIэм.
«илъэситIукIэ узэкIэIэбэжьмэ Славя- нэ ежь-ежьырэу тыкъыгъотыгъ. Ар сабыйхэм афэтхэ, дунэе мэхьанэ зиIэ зэнэкъокъухэм ахэлажьэ, хагъэунэфыкIырэ чIыпIэхэр мызэу, мытIоу къыхьыгъэх. ДжырэкIэ анахь шъхьаIэр ащ исценарий техыгъэу, апэрэ мультфильмэу такъикъи 5-6 хъущтыр къыдэдгъэкIыныр ары. Тэри тызкIырыплъыжьынэу, зыгорэм шIогъэшIэгъонымэ тыуплъэкIунэу ащ амал къытитыщт. Тыкъэзыгъэуцурэр ахъщэ имыкъур ары. АщкIэ IэпыIэгъу къытфэхъущтхэм талъэхъу», — еIо «Черкес Медиаплатформэм» ипащэу ЛIыхъукIэ Айдэмыр.
Мультфильмым икъыдэгъэкIынкIэ IэпыIэгъу къафэхъун замыгъотыкIэ, къэралыгъо грантхэм якъыдэхын хэлэжьэнхэ ямурад. Арышъ, зэдэлэжьэныгъэм шIуагъэ къытынэу лъэныкъуитIури щэгугъы.
ЗэрагъэнафэрэмкIэ, мультфильмыр Адыгэ Республикэм, Къэрэщэе-Щэрджэсым, Къэбэртэе-Бэлъкъарым, Краснодар ыкIи Ставропольскэ крайхэм, Темыр Осетием — Аланием къащагъэлъэгъощт. Ащ хэтхэр адыгабзэкIи, урысыбзэкIи къэгущыIэщтых.
ДЕЛЭКЪО Анет, Анцокъо Ирин. Сурэтхэр: Славяна Бушневам ихъарзынэщ.