Адыгеим и ЛIышъхьэу КъумпIыл Мурат зипсауныгъэкIэ щыкIагъэ зиIэхэм атегъэпсыхьэгъэ зэнэкъокъум щатекIуагъэхэм, чемпионатэу «Абилимпикс» ипризерхэр зыгъэхьазырыгъэ экспертхэм къафагъэшъошэгъэ шIухьафтынхэмрэ дипломхэмрэ АР-м и Правительствэ зычIэт унэм щаритыжьыгъэх.

Гъэхъагъэхэр зышIыгъэхэм КъумпIыл Мурат афэгушIуагъ ыкIи шъолъыр об­щест­веннэ организациехэу зипсауныгъэ пыч фэхъугъэхэм яфитыныгъэхэм якъэу­хъумэнкIэ Iофыбэ зэшIозыхыхэрэм зэра­фэ­разэр къыIуагъ.

«Зипсауныгъэ пыч фэхъугъэ нэбгырэ мин 31,5-м ехъу джыдэдэм Адыгеим щэпсэу. Къэралыгъоми, ячIыпIэгъухэми яIэпыIэгъу ягукIэгъу ахэм зэхашIэным мэхьа­нэшхо иI. Лъэныкъуабэ ащ къызэ­лъеубыты: Iэзэгъу уцхэр аIэкIэгъэхьэ­гъэнхэм къыщегъэжагъэу IофшIэн къафэгъотыгъэным нэсыжьэу», — къы­Iуагъ КъумпIыл Мурат.

Мыхэм ящыIэкIэ-псэукIэ нахь зэте­гъэпсыхьэгъэным пае федеральнэ, рес­пуб­ликэ мылъкоу къатIупщырэми, мысатыу организациехэу социальнэ Iофтхьабзэхэр зезыхьэхэрэми грант IэпыIэгъоу аратырэм ахэхъуагъ.

«Зипсауныгъэ пыч фэхъугъэхэм япсэу­кIэ нахьышIу шIыгъэным тынаIэ тедгъэ­тыщт. Ахэм амалэу яIэр икъоу агъэфедэн алъэкIынымкIэ къыттефэрэр зэкIэ афэт­шIэн фае», — къыIуагъ КъумпIыл Мурат.

2023-рэ илъэсымкIэ шIухьафтынхэр афэгъэшъошагъэмэ хъунэу нэбгырэ 30-мэ ятхылъхэр къаIэкIагъэхьэгъагъэх. Ахэм ащыщэу нэбгыри 10-мэ текIоныгъэр къыдахыгъ.

Гъэсэныгъэмрэ шIэныгъэмрэ алъэны­къокIэ гъэхъагъэхэр зэрашIыгъэхэм фэшI Мыекъопэ районым щыщхэу Анаста­сия Курковамрэ Мария Селивановамрэ шIухьафтынхэр афагъэшъошагъэх. Литера­турэмрэ искусствэмрэ алъэныкъокIэ текIоныгъэ къыдахыгъ Мыекъуапэ щыщ ЖакIэмыкъо Ислъам, Ирина Желябинам, Джэджэ районым щыщ Кира Кулигинам.

Техническэ, народнэ творчествэмкIэ Тэхъутэмыкъое районым щыщ Сергей Шперовыр атекIуагъ. Физическэ культурэмрэ спортымрэкIэ текIоныгъэ къыдахыгъ Адыгэкъалэ щыщ БжьэшIо Шыхьам, Хъунэго Санят, Мыекъуапэ дэс Юрий Курочкиным. Общественнэ IофшIэнымкIэ гъэхъагъэу ышIыгъэхэм афэшI Красногвардейскэ районым щыщ Олег Кондратенкэм шIухьафтын фагъэ­шъошагъ.

АР-м и ЛIышъхьэ чемпионатэу «Абилимпикс» щатекIуагъэхэми, ахэр зыгъэсагъэхэми тынхэр аритыжьыгъэх. 2023-рэ илъэсымкIэ Адыгеим щыщ нэбгыритIум — Богдан Одинцовымрэ Александр Лашинымрэ тыжьын ыкIи джэрз медальхэр къахьыгъ. Ахэр зыгъэхьазырыгъэ экспертхэми АР-м и ЛIышъхьэ ирэзэныгъэ тхылъхэр ара­тыжьыгъэх. Ахэр дэеу зэхэзыхырэ, зылъэ­гъурэ кIэлэцIыкIухэм я Адыгэ рес­пуб­ликэ еджэпIэ-интернат икIэлэ­егъаджэу Татьяна Величкорэ Мыекъопэ индустриальнэ техникумым икIэлэ­егъаджэу Ольга Цыганковамрэ ары.

АР-м и ЛIышъхьэ ипресс-къулыкъу