Адыгеим и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат партием и Тхьама­тэу Д. А. Медведевым иобщественнэ приемнэ цIыфхэр щыригъэблэгъагъэх. Партиер зызэхащагъэр илъэс 22-рэ зэрэхъурэм фэгъэхьы­гъэу ар рекIокIыгъ.

Къалэу Мыекъуапэ, Тэхъутэмыкъое ыкIи Кощхьэблэ районхэм ащыпсэу­хэрэм зыгъэгумэкIырэ IофыгъохэмкIэ ЛIышъхьэм зыкъыфагъэзагъ. АшъхьэкIэ ягумэкIыгъохэм нэмыкIэу, общест­веннэ мэхьанэ зиIэ IофыгъохэмкIи зэшIохыгъэн фаеу алъытэхэрэри ащ къырахьылIагъэх. Адыгэ Республи­кэм и ЛIышъхьэ и УплъэкIокIо гъэIо­ры­шIапIэ ипащэу Бузэрэ Игорь мы зэIукIэгъум щыIагъ. Iофыгъоу къаIэ­тыгъэхэмкIэ министерствэ зэфэшъ­хьафхэм, чIыпIэхэм япащэхэм зэхэ­фын­хэр къашIыгъэх.

Къалэу Мыекъуапэ щыпсэурэ бзы­лъ­­фы­гъэр къыкIэлъэIугъ фэтэрыбэу зэхэт унэу зышъхьэ жьыбгъэм ыгъэфы­­къуа­гъэр зыпкъ рагъэуцожьы­нэу. Мы унэр игъэкIотыгъэ гъэцэкIэ­жьын зэрашIылIэн фаеу щытхэм ащыщ, ау пIалъэр джыри къэсыгъэгоп.

КъумпIыл Мурат Мыекъуапэ ипащэу Геннадий Митрофановым ыкIи республикэм псэолъэшIынымкIэ и Министерствэ илIыкIохэм пшъэрылъ афишIыгъ а унэм изытет зэра­гъэлъэгъунэу ыкIи цIыфхэм къаIэтыгъэ Iофыгъор псынкIэу зэшIуахынэу. Ащ нэмыкIэу АР-м и ЛIышъхьэ илъэсэу къихьащтым игъэкIотыгъэ гъэцэкIэжьын Iофхэр а унэм рашIылIэнхэу пшъэрылъ къафигъэуцугъ. ИскусствэхэмкIэ кIэлэцIыкIу еджа­пIэу Кощхьаблэ дэтым щезыгъа­джэ­хэрэм ащыщ бзылъфыгъэм адыгэ пщынэ еджапIэм къыфэщэфыгъэн зэрэфаем иIофыгъокIэ ЛIышъхьэм зыкъы­фигъэ­загъ. АР-м культурэмкIэ иминистрэу Аулъэ Юрэ илъэсыкIэр къимыхьэзэ къызкIэлъэIугъэхэр афигъэцэкIэнэу АР-м и ЛIышъхьэ пшъэрылъ фишIыгъ. Ащ нэмыкIэу 2024-рэ илъэсым сомэ мин 800 еджапIэм къыфыхагъэкIыщт Iэмэ-псымэхэр ащэфынхэм ыкIи унашъхьэр агъэцэкIэжьыным апае.

Къэлэ гъэпсыкIэ зиIэ псэупIэу Яблоновскэм дэсхэм ащыщхэу мы зэIукIэгъум къекIолIагъэхэм республи­кэм ипащэхэм япсэупIэ анаIэ къызэ­рэты­рагъэтырэм пае зэрафэразэхэр къаIуагъ: мы аужырэ илъэсхэм гъэсэны­гъэм, псауныгъэм икъэухъумэн, культу­рэм, гъогухэм яшIынрэ ягъэцэкIэжьынрэ алъэныкъокIэ Iофыгъуабэ зэшIохыгъэ хъугъэ. Ахэр къызыкIэлъэIугъэхэр урамэу СвободнэмкIэ ощхыпс илъэдапIэхэр гъэтэ­рэзыгъэнхэр ыкIи гъогухэр гъэцэ­кIэжьыгъэнхэр ары.

КъумпIыл Мурат Тэхъутэмыкъое райо­ным ипащэу Шъэо Аскэр пшъэрылъ фишIыгъ илъэсэу къихьащтым зэшIуахын фаехэм а псэуалъэр ахагъэхьанэу. Ащ къызэрэхигъэщыгъэмкIэ, Яблоновскэм хэхъоныгъэ егъэшIыгъэным епхыгъэ Iоф­шIэнэу лъэныкъуабэ къызэлъызыубытырэр лъагъэкIотэщт.

«НепэкIэ къалэм лъыкIегъахьэ зы­фэпIон плъэкIыщт псэупIэр уахътэм нахь диштэу, зэтегъэпсыхьагъэу зэрэхъущтым ренэу тыдэлажьэ. ЗэкIэлъыкIокIэ гъэнэфагъэ иIэу, цIыфхэр гумэкIыгъо хэтымыгъафэхэу а Iофхэр зэшIохыгъэ зэрэхъущтхэм тынаIэ тетэгъэты. Джыдэдэм еджапIэ ятэгъэшIы, илъэсэу къихьащтым псауныгъэм игъэпытэн фытегъэпсыхьэгъэ псэолъитIу, парк шъо­лъырхэр дгъэпсыщтых. Илъэсыбэм къакIоцI зэтырихьэгъэ, зэшIомыхыгъэ Iофыгъохэр зэрищыкIагъэм тетэу гъэцэ­кIагъэ хъунхэм, цIыфхэм ящыIакIэ зыкъыIэтыным ренэу тынаIэ нахь зэратедгъэтыщтым тыдэлэжьэн фае», — къыIуагъ АР-м и ЛIышъхьэ.

Мыекъуапэ щыпсэурэ бзылъфыгъэм илъэIу зыфэгъэхьыгъагъэр гъогухэм яшIын. Урамэу Крыловым ыцIэкIэ щытым (урамэу Госпитальнэм къыщыублагъэу Кубанскэм нэсэу) мыжъо-пшэхъо зэхэлъ зытелъ игъогу Iахь гъэцэкIэжьыгъэн фае.

КъумпIыл Мурат мэрием пшъэрылъ фишIыгъ мы мазэм гъогум епхыгъэ Iофыгъор тэрэзэу зэшIохыгъэнэу ыкIи зигугъу къашIыгъэ гъогу Iахьыр асфальткIэ агъэпкIэнэу. ХоккеимкIэ кIэлэцIыкIу купэу Къыблэ федеральнэ шъолъырымрэ Темыр-Кавказ федеральнэ шъолъырымрэ я Кубок икъыдэхын хэлэжьэщтым мылъкукIэ IэпыIэгъу къыфэхъунхэм иIофыгъо къыIэ­тыгъ Мыекъуапэ щыщ бзылъфыгъэм. Республикэм и ЛIышъхьэ Адыгэ Респуб­ликэм физическэ культурэмкIэ ыкIи спортымкIэ и Комитет пшъэрылъ фишIыгъ ахъщэу ащ пэIухьащтыр къафыхигъэкIынэу.

«ЗэлъыIэсыкIэ амалхэр зэкIэ — мыщ хэхьэх социальнэ хъытыухэр, цIыфхэм язэхахьэхэр, зэIукIэгъоу адысиIэхэрэр – тэгъэфедэх цIыфхэр зыфэныкъохэр, зыгъэгумэкIыхэрэр икъоу къытлъы­Iэ­сынхэм пае. Къулыкъухэм, къалэхэм ыкIи районхэм япащэхэм пшъэрылъ афэсэшIы цIыфхэр зыгъэгумэкIырэ IофыгъохэмкIэ теурыкIуагъэ къызхамы­гъэфэнэу», — къыIуагъ АР-м и ЛIышъхьэ. АР-м и ЛIышъхьэ ипресс-къулыкъу