Урысые политическэ партиеу «Единэ Россием» и Адыгэ шъолъыр къутамэ илъэситIум Iофэу ышIагъэр зэфихьы­сыжьыгъ. Партием и Апшъэрэ совет хэтэу, ащ ишъолъыр къутамэ и Секретарэу, Адыге­им и ЛIышъхьэу КъумпIыл Мурат я 35-рэ партийнэ конференциеу мы Iофыгъоми, илъэс благъэхэм къутамэм пшъэрылъэу иIэхэми зыщате­гущыIагъэхэм хэлэжьагъ. Конференцием джащ фэдэу хэлэ­жьагъэх АР-м и Къэралыгъо Совет – Хасэм и Тхьаматэу Владимир Нарожнэр, Къэралыгъо Думэм идепутатэу Хьасанэкъо Мурат, политсоветым хэтхэр, муни­ципальнэ образованиехэм яделегатхэр. Партием ишъолъыр гъэцэкIэкIо комитет ипащэу АфэшIэгъо Рэмэзан Iофтхьабзэр зэрищагъ.

ЗэIукIэм къекIолIагъэхэм зафигъазэзэ республикэм и ЛIышъхьэ зэрэхи­гъэунэфыкIыгъэмкIэ, блэкIыгъэ илъэсыр УрысыемкIэ къэгъэзэпIэ лъэхъанэу хъугъэ, ау IэкIыб къэралхэм урысые экономикэр зэхэгъэтэкъогъэнымкIэ ямурад къадэхъугъэп. Ащ къызэрэ­хигъэщыгъэмкIэ, ар къызхэкIыгъэр Урысыем исхэр Владимир Путиным зэрэкъоуцуагъэхэр ары. Республикэм ипащэ зэрэхигъэу­нэфыкIыгъэмкIэ, IофшIэнымкIэ лъэныкъо шъхьаIэу Урысыем и Президент Федеральнэ ЗэIукIэм фигъэхьыгъэ тхыгъэм щигъэнэфагъэр зытетыгъэм тетэу къэнэжьы.

«Тэ тиIэубытыпIэр партием ипроектхэр ары. Ахэм шIуагъэ къызэратырэр щыIэ­ныгъэм къыгъэлъэгъуагъ. Лъэпкъ проект­хэмрэ къэралыгъо программэхэмрэ атетэу республикэм щызэрахьэрэ Iоф­-т­хьаб­зэхэм ямэхьанэ ахэм нахь къаIэты. Ахэр IэубытыпIэ къызыфэтшIыхэзэ, хэгъэ­гум ипащэхэм яIэпыIэгъу къызфэд­гъэфе­дэзэ, лъэныкъохэм къащыуцурэ зигъо Iофыгъохэр зэшIотэхых, респуб­ликэм хэхъоныгъэ егъэшIыгъэнымкIэ зыпкъ итэу тылъэкIуатэ», — къыIуагъ Къум­пIыл Мурат.

ЭнергиекъэкIуапIэхэм ахэгъэхъо­гъэным, гъогухэм язытет нахьышIу шIы­гъэным, социальнэ псэуалъэхэр гъэкIэ­жьы­гъэнхэм атегъэпсыхьэгъэ пшъэрылъ­хэми Адыгеим и ЛIышъхьэ шъхьафэу къащыуцугъ.

ЗэшIохыгъэн фаехэм къатегущыIэзэ чIыпIэхэр зэтегъэпсыхьэгъэнхэм ателъытэгъэ проекти 5-мэ Iоф адашIэу зэрэрагъэжьагъэр КъумпIыл Мурат агу къыгъэкIыжьыгъ. Ахэр загъэцакIэхэкIэ, Мыекъуапи, Тэхъу­тэмыкъое районми джы­рэ шапхъэхэм а­­ди­ш­­тэрэ социальнэ псэ­олъэ зэ­те­гъэп­сы­хьагъэ­хэмрэ фэтэрыбэу зэхэт унэ­хэмрэ зы­дэтыщт­хэ мик­ро­­районхэр къадэтэ­джэщтых. Республикэм ипа­щэ къызэрэ­хигъэщы­гъэм­кIэ, энергиер аIэкIэ­гъэ­хьэгъэ­нымкIи лъэ­бэ­къукIэхэр ашIы­гъэх. Прог­раммэу социаль­нэ дога­зификацием те­гъэ­п­сы­хьагъэм ишIуагъэкIэ Iофхэр республикэм хэпшIы­кIэу щылъы­кIотагъэх. Владимир Путиным иуна­шъо­кIэ мы илъэсым къы­ще­­гъэжьагъэу гъэсэ­ныгъэмрэ псауныгъэм икъэухъумэнрэ афэгъэзэгъэ учреждени­ехэр программэм хагъэхьащтых. Ащ ишIуагъэкIэ учреждение 28-мэ ыпкIэ лъамытэу газыр къафы­пашIэщт.

Адыгеим и ЛIышъхьэ зэIукIэм зэрэ­щыхигъэунэфыкIыгъэмкIэ, партийнэ проект 25-рэ джыдэдэм республикэм щагъэцакIэ. ПроектыкIэхэми ягугъу ащ къышIыгъ. Ахэм ащыщ федеральнэ проектэу «За самбо» зыфиIоу Къэралыгъо Думэм идепутатэу, самбэмкIэ дунаим гъогогъу 11-рэ ичемпионэу Хьасанэкъо Мурат зыфэгъэзагъэр. Джащ фэдэ проектыкIэу «Женское дело Единой России» зыфиIоу социальнэ, шIушIэ, культурэ Iофтхьабзэхэм, хэушъхьафыкIыгъэ дзэ операцием хэлажьэхэрэмрэ ахэм яунагъохэм арысхэмрэ IэпыIэгъу ягъэгъотыгъэным афытегъэпсыхьагъэр. «ХэушъхьафыкIыгъэ дзэ операцием хэлажьэхэрэм IэпыIэгъу ягъэгъотыгъэныр типартие мэхьанэшхо зэритырэ Iофхэм ащыщ. ТидзэкIолIхэм лIыхъужъныгъэ зэра­хьэзэ хэгъэгур къагъэ­гъу­нэ. Ахэм тиIэпыIэгъу зэхашIэн, яунагъохэр тинэплъэгъу зэритхэр алъэгъун фае. Хэгъэгум и Президентэу Влади­мир Путинми, партиеу «Единэ Россием» и Тхьаматэу Дмитрий Медведевми джащ фэдэ пшъэрылъ къагъэуцурэр. Ахэр партием хэтхэм къя­джэх мобилизацием къыхиубытагъэхэм ыкIи ахэм яунагъохэм анаIэ атырагъэтынэу, Урысы­ем и УIэшыгъэ КIуачIэ­хэм IэпыIэгъу ягъэгъо­тыгъэнымкIэ волон­тер IофшIэныр зэхащэнэу», — къы­Iуагъ КъумпIыл Мурат.

Партиеу «Единэ Россием» хэтхэу ыкIи ахэм якъотэгъухэу шIушIэ Iофтхьабзэхэм ахэлажьэхэрэм лъэшэу зэрафэразэр Респуб­ликэм и ЛIы­шъхьэ къыIуагъ. Ады­гэ шъо­лъыр къу­тамэм дзэ­кIолIхэмрэ шъо­лъы­­р­ыкIэхэм ащы­п­сэу­хэрэмрэ апае хьылъэ тонн 400 зэ­­риугъоигъэр ыкIи зэраIэкIигъэ­хьагъэр къыхигъэ­щыгъ. Фон­дэу «Хэ­гъэгум и­­ухъу­­­ма­­­­­­кIо­хэм», биз­­­нес­­мен­хэм, общест­вен­никхэм мыщкIэ яшIо­гъэшхо къызэра­гъэкIуагъэр хигъэ­у­нэфыкIыгъ.

КъумпIыл Мурат зэIукIэгъум къызэ­рэ­щи­IуагъэмкIэ, лIыкIо къулыкъухэм ядепу­татхэм яхэдзынхэу гъэрекIо щыIагъэхэм республикэм имуниципалитети 8-мэ мандат 368-мэ ащыщэу 300-р «Единэ Россием» къащихьыгъ. Мыгъэ Мыекъуапэ инароднэ депутатхэм я Совет партийнэ спискэхэмкIэ «Единэ Россием» хэтхэм процент 61-м ехъур къащахьыгъ, зы мандат зиIэ коихэмкIэ 9-м щыщэу 8-р «Единэ Россием» илIыкIох.

«Единэ Россием» пэрытныгъэ зэри­Iыгъыр джыри республикэм зэ къыщигъэлъэгъуагъ. Ау ащ типшъэдэкIыжь зэрэхигъахъорэр тшIэн фае. IэкIыб къэралхэр тихэгъэгу къызщытеIункIэхэрэ лъэхъаным обществэр социальнэ, экономикэ зыпкъитыныгъэм зэрэфаем, хэбзэ къулыкъухэм япащэхэм нахь шIуагъэ къытэу Iоф ашIэн зэрэфаем ахэхъо. ЧIыпIэхэм къащыуцугъэ пшъэ­рылъхэм ягъэцэкIэнкIэ шапхъэхэр агъэлъэшыгъэх. Джащ пае мафэ къэс нахь псынкIэу Iоф тшIэн, кIэухышIухэр къытэу тылэжьэн фае», — къыIуагъ КъумпIыл Мурат.

Адыгеим и ЛIышъхьэ къихьащт илъэ­сым политикэ хъугъэ-шIэгъэшхоу щыIэщтым – Урысыем и Президент и­хэ­дзын зэрэщыIэщтым къыщыуцугъ. Республикэм ипащэ зэIукIэм хэлажьэ­хэрэм анаIэ тыраригъэдзагъ хэбзэгъэу­цугъэхэр амыукъохэу, щынэгъончъэу хэдзынхэр зэхэщэгъэнхэмкIэ афэлъэ­кIыщтыр зэкIэ зэрашIэн фаем.

Республикэ политсоветымрэ ащ ипрезидиумрэ ягъэкIэжьын епхыгъэ Iофхэми конференцием щахэплъагъэх, «Единэ Россием» ия XXI-рэ зэфэс иделегатхэр хадзыгъэх. Адыгеим и ЛIышъхьэу КъумпIыл Мурат пэщэныгъэ зыдызэрихьащт лIыкIо купым хагъэхьагъэх «Единэ Россием» ичIыпIэ отделение ыцIэкIэ Мыекъуапэ инароднэ депутатхэм я Совет идепутатэу, партием и Генеральнэ совет хэтэу Бэрзэдж Асиетрэ Надежда Бражниковамрэ.