ЯшIэжь агъэлъапIэ
Тикъэралыгъо ыкIи ащ игъунапкъэхэм ашIокIэу ащыкIогъэ зэо зэпэуцужьхэм ащыфэхыгъэ дзэкIолIхэм яшIэжь гъэлъэпIэгъэным мы мафэр епхыгъ. Сыд фэдэрэ лъэхъани, джы хэушъхьафыкIыгъэ дзэ операциер зыщыкIорэми, мы мафэм имэхьанэ къеIыхырэп, нахь зыкъеIэты.
[caption id="attachment_142522" align="aligncenter" width="800"] ЗэIухыгъэ къэбарлъыгъэIэс амалхэр.[/caption]
2014-рэ илъэсым къыщегъэжьагъэу тыгъэгъазэм и 3-р АмышIэрэ ДзэкIолIым и Мафэу Урысыем щыхагъэунэфыкIы. Тыгъэгъазэм и 3-р ошIэ-дэмышIэу къыхахыгъэп. Мы мафэм, 1966-рэ илъэсым, Москва пэмычыжьэу нэмыцыдзэхэр зыщызэхагъэтэкъуагъэхэр илъэс 25-рэ зэрэхъурэр зыщыхагъэунэфыкIыгъэм, амыгъэунэфыгъэ дзэкIолIым ихьэдэ сапэ Кремлым идэпкъ лъапсэ щагъэтIылъыжьыгъ. ЗиIахьыл гупсэ зыщыфэхыгъэр е зыщагъэтIылъыгъэр зымышIэхэрэм шъхьащэ зыщафашIырэ чIыпIэу мы саугъэтыр хъугъэ. АмышIэрэ ДзэкIолIым и Мафэ Хэгъэгу зэошхом щыфэхыгъэхэм яшIэжь изакъоп агъэлъапIэрэр, нэмыкI заохэм ыкIи зэпэуцужьхэм ахэкIодагъэхэу зикъэбар амышIэхэрэри ары.
— ЗэлъашIэрэ урыс полководцэу Александр Суворовым «Аужырэ дзэкIолIым ихьадэ амыгъэтIылъыжьэу, заор ухыгъэ хъущтэп» зэриIогъагъэм тырыгъуазэзэ лъыхъон Iофтхьабзэхэр ретэгъэкIокIых, — къыIуагъ лъыхъон-патриотическэ клубэу «ШIэжь» зыфиIорэм ипащэу Владимир Сахно.
ШIэжь мафэм къыдыхэлъытагъэу патриотическэ Iофтхьэбзэ зэфэшъхьафхэр Адыгеим щызэхащэх. Ахэм якIэщакIох Урысые общественнэ движениеу «Народный фронтым» ишъолъыр отделениеу Адыгэ Республикэм щыIэр, Урысыем икъэралыгъо фондэу «Хэгъэгум иухъумакIохэр» зыфиIорэм ишъолъыр къутамэ, гъэсэныгъэм иучреждениехэр, лъыхъон отрядхэр, дзэкIолI объединениехэр. Муниципальнэ образованиехэм къызэраIуагъэмкIэ, «шIэжьым исыхьатхэу» зэо зэфэшъхьафхэм яветеранхэр, общественнэ организациехэм ялIыкIохэр къызэрагъэблэгъагъэхэр тхьамафэм къыкIоцI еджапIэхэм ащыкIуагъэх. НыбжьыкIэхэм яхэгъэгу шIу алъэгъунымкIэ, якъэралыгъо рыгушхонхэмкIэ, Урысыем иблэкIыгъэ лъытэныгъэ фашIынымкIэ, дзэ ыкIи граждан пшъэдэкIыжьэу яIэр нахь куоу зэхашIыкIынымкIэ, ЛIыхъужъхэм яшIэжь къызэтегъэнэгъэнымкIэ мыщ фэдэ сыхьатхэм мэхьанэшхо яI.