АР-м инахьыжъ­хэм я Совет зичэзыу зэхэсыгъо шэкIогъум и 30-м иIагъ.

Зыныбжь имыкъугъэхэм зэрахьэрэ бзэ­джэ­шIагъэхэр нахь макIэ шIыгъэнхэм, ахэр гъогу пхэндж техьанхэм лъапсэу фэхъурэм ыкIи хэушъхьафыкIыгъэ дзэ операциер зыщыкIорэ лъэхъаным ащ епхыгъэ къэбар нэпцIэу зекIохэрэм ныбжьыкIэхэр ащыухъумэгъэнхэм ар афэгъэхьыгъагъ. Iофтхьабзэр зэрищагъ Советым итхьаматэу ГъукIэлI Нурбый.

Зэхэсыгъом хэлэжьагъэх Урысыем IофшIэнымкIэ и ЛIыхъужъэу, Адыгэ, Къэбэртэе-Бэлъкъар, Къэрэщэе-Щэрджэс республикэхэм ялъэпкъ тхакIоу МэщбэшIэ Исхьакъ, АР-м хэгъэгу кIоцI IофхэмкIэ иминистрэу Олег Безсмельницыныр, лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, къулыкъу зэфэшъ­хьафхэм ялIыкIохэр.

Нахьыжъхэм я Совет итхьаматэ ипэублэ псалъэ къызэрэщыхигъэщыгъэмкIэ, Iатэхъохэу бзэджэшIагъэ зезыхьэхэрэм аныбжь илъэс 11-м къыщежьэ хъугъэ ыкIи ащ иIофыгъо зэрэдэунаеу егъэгу­мэкIы. Мы ныбжь щынагъом къыщегъэ­жьагъэу унаIэ нахь лъэшэу атетын фае.

— Зыныбжь имыкъугъэхэм зэрахьэрэ бзэджэшIагъэхэм япчъагъэ уигъэгумэ­кIынэу щыт, гъогу пхэндж техьэхэрэм аныбжь мэкIэ дэд. Урысыем и Следст­веннэ комитет ипащэу Александр Бастры­киным «Урысые гъэзетым» дишIы­гъэ зэдэгущыIэгъум къызэрэщыIорэмкIэ, нэбгырэ 4700-мэ алъэныкъокIэ уголовнэ Iофхэр къызэIуахынхэ алъэкIыгъэп аныбжь зэримыкъугъэм къыхэкIыкIэ. Аныбжь имыкъугъэми, уголовнэ пшъэдэкIыжь зыфарагъэхьын фэе бзэ­джэ­шIагъэ зезыхьэгъэ нэбгырэ 10627-м алъэныкъокIэ уголовнэ Iоф 8243-рэ къызэIуахыгъ. Нахьыбэр зыфэгъэхьыгъэр тыгъон ыкIи хъункIэн бзэджэшIагъэх. Джащ фэдэу къэбар-телекоммуникационнэ амалхэр къызфагъэфедэхэзэ хэбзэ­укъоныгъэу зэрахьэрэр макIэп. Рес­публикэми мы лъэныкъомкIэ Iофхэм язытет Урысыем фэмыдэми, бзэджэшIа­гъэхэр щэхъух. Мыхэм япчъагъэ нахь макIэ шIыгъэныр, ежь Iэтахъохэм алъэ­ныкъо­кIэ зэрахьэрэ хэбзэукъоныгъэхэри тэ, нахьыжъхэм, тинэплъэгъу идгъэкIы хъущтэп. Мы уахътэм Iофыгъо шъхьаIэу къэуцу­хэрэм ащыщ Урысыем «имыныб­джэгъу» хэгъэгухэм яхэушъхьафыкIыгъэ къулыкъухэм технологие зэфэшъхьафхэр къызфагъэфедэхэзэ террористическэ ыкIи экстремистскэ нэшанэ зиIэ зэхахьэ­хэр зэрэзэхащэхэрэр, къэбар нэпцIхэр зэрагъэIухэрэр. Амал зэриIэкIэ тиныбжьы­кIэхэр ахэм ащытыухъумэнхэ фае, — хигъэунэфыкIыгъ ГъукIэлI Нурбый.

Зыныбжь имыкъугъэхэм яIофхэмкIэ ыкIи яфитыныгъэхэр къэухъумэгъэнхэмкIэ республикэм Комиссие щызэхэщагъ. Ащ иIофшIэн ыкIи Iэтахъохэм алъэныкъокIэ гумэкIыгъоу къэуцухэрэм язэшIохын Адыгеим и ЛIышъхьэу КъумпIыл Мурат лъэшэу ынаIэ атырегъэты. Джащ фэд, хэбзэукъоныгъэхэм афэгъэзэгъэ къу­лыкъу­хэр ягъусэхэу гъэсэныгъэмрэ шIэны­гъэмрэкIэ Министерствэм иIофышIэ­хэм Iэтахъохэу хабзэр зыукъохэрэм е бзэджашIэхэм ахэщагъэ хъухэрэм IофшIэн гъэнэфагъэ адызэрахьэ, учетым хэт кIэлэеджакIохэм алъэплъэх. Респуб­ликэм ипэшIорыгъэшъ учет зы­ныбжь имыкъугъэ нэбгыри 175-рэ, зипшъэрылъхэр икъоу зымыгъэцэкIэрэ ны-тыхэу 184-рэ хэтых.

Нахьыжъхэм я Совет хэтхэм зэра­лъытэрэмкIэ, зэкIэ къызщежьэрэр сабыир къызэрыхъухьэрэ унагъор ыкIи нэужым къэзыуцухьэрэ цIыфхэр, гъусэ зыфэхъу­хэрэр ары. ЩыIэкIэ-псэукIэ тэрэзым кIэлэцIыкIухэр хэщэгъэнхэм, ащкIэ зигъо Iофыгъохэр ахэм афэгъэзэгъэ къулыкъу­хэм адызэшIуахынхэм мэхьанэ иIэу алъытагъ.

Министрэу Олег Безсмельницыныр Iофыгъоу къаIэтыгъэхэм алъэныкъокIэ IофшIэнэу зэрахьэрэм къытегущыIэзэ, щысэ гъэнэфагъэхэр къыхьыгъэх. ТапэкIэ Адыгеим инахьыжъхэм я Советрэ министерствэмрэ язэдэлэжьэныгъэ зэрагъэпытэщтыр къыхигъэщыгъ.

Зэхэсыгъом къыщыгущыIагъэхэм зэрэхагъэунэфыкIыгъэмкIэ, ныбжьыкIэхэр шъон пытэхэм, наркотикхэм ащыухъу­мэгъэнхэмкIэ пстэуми яамал рахьылIэн, шIыкIэхэр къызэдыхахынхэ фае.

Iэтахъохэм зэрахьэрэ бзэджэшIагъэхэм яIофыгъо къалэхэм ыкIи район къоджэ псэупIэхэм яцIыф зэхахьэхэм щахаплъэ­хэмэ ишIуагъэ къэкIощтэу къыхагъэщыгъ.

Нахьыжъхэм я Совет къыщаIэтыгъэ Iофыгъохэм атегъэпсыхьэгъэ унашъохэр аштагъэх. ТапэкIэ ахэм язэшIохын дэлэжьэщтых.

НэкIубгъор зыгъэхьазырыгъэр IЭШЪЫНЭ Сусан. Сурэтыр: IЭШЪЫНЭ Аслъан.