Нэбгыри 115-рэ ахэлэжьагъ
Программэу «Урысыем инеущырэ маф» зыфиIорэм игъэцэкIэн къыдыхэлъытагъэу теннис цIыкIумкIэ зэнэкъокъуитIу Мыекъуапэ щырагъэкIокIыгъ.
Апэрэ мафэм зэхащэгъэ зэнэкъокъум илъэси 6 – 16 зыныбжьхэр хэлэжьагъэх. Адыгеим имызакъоу, Краснодар краим ичIыпIэ зэфэшъхьафхэм къарыкIыгъэ лIыкIохэм заушэтыгъ. Ахэр зэкIэмкIи нэбгыри 115-рэ хъущтыгъэх – кIэлэ 64-рэ ыкIи пшъэшъэ 51-рэ.
Адыгеим итеннисистхэм медалищ къахьыгъ. Теуцожь районымкIэ къуаджэу Нэшъукъуае щыщ Чэтэо Альбинэ текIоныгъэр къыдихыгъ. Кощхьэблэ районым ипсэупIэу Вольнэр къэзыгъэлъэгъогъэхэ Даниил Кузнецовымрэ Дмитрий Газарянрэ хагъэунэфыкIырэ чIыпIэхэр къафагъэшъошагъэх.
ЯтIонэрэ мафэм кIогъэ зэнэкъокъум республикэм испортсменхэр ары хэлэжьагъэхэр. Мыекъуапэрэ Теуцожь районымрэ ялIыкIохэр нахь къахэщыгъэх. Аныбжь елъытыгъэу ахэр гощыгъагъэх.
Апэрэ купым хагъэунэфыкIырэ чIыпIищыр къыщыдахыгъ спорт еджапIэу С.М. Джэнчатэм ыцIэ зыхьырэм илIыкIохэм. Тренерэу Р. Бзагом ыгъэсэрэ Артем Вариводиныр, Адам Матюшиныр ыкIи Бзаго Дамир анахь лъэшыгъэх. Теуцожь районым къикIыгъэхэ Чэтаохэу Альбинэрэ Аринэрэ ыкIи Блэгъожъ Динарэ апэрэ чIыпIищыр къахьыгъ. Ахэм ятренер Б.А КIыкIыр. Кощхьэблэ ыкIи Тэхъутэмыкъое районхэм яспортсменхэм текIоныгъэ зырыз яI.
Апэрэ чIыпIитфыр къыдэзыхыгъэхэм шIухьафтынхэр афашIыгъэх, анахь дэгъухэм ащ игъусэу щытхъу тхылъхэр ыкIи медальхэр афагъэшъошагъэх.