Адыгэ нысэщэ джэгу егъэхьазыры
АР-м и Къэралыгъо академическэ ансамблэу «Налмэсым» республикэм щыпсэухэрэм апае IофшIэгъакIэ егъэхьазыры.
[caption id="attachment_142503" align="aligncenter" width="800"] «Налмэсыр».[/caption]«Адыгэ нысэщэ джэгу» зыфиIорэ хореографическэ спектаклыр тыгъэгъазэм и 5-м пчыхьэм сыхьатр 7-м АР-м и Къэралыгъо филармоние къыщигъэлъэгъощт.
Ащ игъэхьазырын хэлэжьагъэх тарихълэжьхэр, сурэтышIхэр, филологхэр, хореографхэр, мультипликаторхэр, музыкантхэр — пстэумкIи нэбгыри 100-м ехъу. Спектаклыр УФ-м культурэмкIэ и Министерствэ икъэралыгъо тын къыдыхэлъытэгъэ ахъщэу лъэпкъ искусствэм ылъэныкъокIэ проектхэм ягъэцэкIэн тегъэпсыхьагъэмкIэ агъэуцу.
Урысыем щыпсэурэ лъэпкъ макIэхэм якультурнэ кIэн къызэтегъэнэгъэным проектыр фэлажьэ, лIэужыкIэхэр адыгэ хабзэм тетэу пIугъэнхэм, ятарихъ, ялъэпкъ, абзэ язэгъэшIэн иIофыгъохэр къызэлъеубытых. Лъэпкъ шэн-хабзэхэм зягъэужьыжьыгъэным, пIуныгъэ тэрэз кIэлэцIыкIухэм ягъэгъотыгъэным фэлажьэ.
«Адыгэ нысэщэ джэгу» зыфиIорэ хореографическэ спектаклым къэшъо шъуашэм илъэу адыгэ лъэпкъым икультурэ, ишэн-хабзэхэм нэIуасэ уафешIы. Непэрэ культурэм адыгэ нысэщэ джэгу хабзэхэр зэрэщызэрахьэхэрэр ащ къыщыгъэлъэгъогъэщт. Спектаклыр адыгабзэкIэ кIощт, урысыбзэкIэ зэдзэкIыгъэщт.
Анцокъо Ирин.