«КIалэм ылъэгъурэр ищыс» аIо адыгэхэм. Ащ елъытыгъэу, пIуныгъэ-гъэсэныгъэ тэрэз ныбжьыкIэхэм агъотынымкIэ, щы­Iэныгъэм чIыпIэ щыряIэ хъунымкIэ гъэсэпэ-ушъый шъабэм мэхьанэшхо иI.

Мы лъэныкъомкIэ лъэшэу зишIуагъэ къакIохэрэм ащыщых цIыф гъэшIэгъонхэр зыхагъэлэжьэрэ Iофтхьэбзэ зэфэшъхьафхэу АР-м и Лъэпкъ тхылъеджапIэ щызэхащэхэрэр. ШэкIогъум и 29-м «Пушкинскэ картэмкIэ» ащ творческэ зэIукIэгъоу щыкIуагъэм къырагъэблэгъагъ бзылъфыгъэ чъэпхъыгъэу, творчествэр зигунэсэу, мы уахътэм унагъом ыкIи творчествэм затезыгуащэу поселкэу Инэм щыпсэурэ Ахэджэго Маринэ. Бзылъфыгъэм усэным зыщеушэты, композиторхэм ясатырэ къыхэуцогъакIэу ЖэнэлI Светэрэ ежьыр­рэ зэдэлажьэх, ежь къызэриIуагъэмкIэ, орэдышъохэм гущыIэхэр къякIоу къафегъоты. БзылъфыгъитIум ятворчествэ агу рихьэу къаIо АР-м ыкIи Пшызэ язаслуженнэ артисткэу Лъэцэр Риммэ, АР-м инароднэ артисткэу Кушъэкъо Симэ, адыгэ орэдыIоу, эстраднэ орэдымкIэ лъэпкъ студиеу «Къамылым» иартисткэу, Шъэумэн Хьазрэт ыкIи АР-м и ЛIышъхьэу КъумпIыл Мурат яшIухьафтынхэр къэзылэжьыгъэу ХьакIэцIыкIу Майе.

Маринэ усэнымкIэ нахь зызигъэзагъэр мы аужырэ илъэс зыщыплIыр ары, икIэлэгъу-ныбжьыкIэгъуми зыгорэхэр ытхыгъагъэх, ау нэмыкI щыIэныгъэ лъэ­ныкъуабэмкIэ зигъази, усэным кIэрыкIыгъагъ.

Ахэджэго Маринэ теубытагъэ хэлъэу еIо: «Сэ сфэмытхыни, сфэмыукIочIыни творчествэмкIэ щыIэп…» Ау джырэкIэ бзылъфыгъэм хэутыгъэ усэхэр, усэхэр дэтэу тхылъ къыдигъэкIыгъэп. Общест­веннэ щыIакIэм ар чанэу хэлажьэ, АР-м культурэмкIэ и Министерствэ, общественнэ организациеу «Адыгэ Хасэм», Лъэпкъ тхылъеджапIэм ярэзэныгъэ тхылъхэмкIэ ыкIи 2020-рэ илъэсым тхылъым ишъолъыр фестивалэу зэхащэгъагъэм «Молодые лирики» зыфиIорэ лъэныкъомкIэ хагъэунэфыкIыгъ.

Жэнэ Къырымызэ ыцIэкIэ 2022-рэ илъэсым кIэлэцIыкIу произведениехэмкIэ зэхащэгъэ Дунэе зэнэкъокъум «Проза и поэзия» зыфиIорэ лъэныкъомкIэ хэлэжьагъ, шIухьафтынитIу къыратыгъ. Бзылъфыгъэм итворчествэ анахьэу зыщыплъэгъун плъэкIыщтыр интернет нэкIубгъохэр ары.

ЗэIукIэгъум хэлэжьагъэх Ахэджэго Маринэ иIахьылхэр, иунэкъощхэр, итворчествэ щыгъуазэхэ журналисткэу ТIэшъу Светланэ, шIэныгъэлэжьэу Агъыр­жьа­нэкъо Симхъан, музколледжым иотделение ипащэу Ацумыжъ Сарэ ыкIи ащ ригъаджэхэрэр.

Мыхэр Маринэ иусэхэу «Сихэку», «Была война», «Моя Адыгея» зыфиIохэрэм къяджагъэх, гущыIэ фабэхэр усакIом къыфаIуагъ, усэным зыщызыушэтырэ Марини IурыIупчъэхэр къыIуа­гъэх ыкIи иусэхэм ащыщ къеджагъ.

Творческэ зэIукIэгъур зэрищагъ ыкIи Маринэ иусэхэр ыгу зэрэрихьыхэрэр, ар гугъэпIэ инхэр къэзытырэ цIыф Iушэу зэрэщытыр кIигъэтхъыгъ тхылъеджапIэм иIофышIэу Кучмэз Аминэт. Апэрэу мыщ фэдэ мэфэкIыр респуб­ликэ Лъэпкъ тхылъеджапIэм зыщыфызэхащэгъэ Ахэджэго Марини, къыфэ­кIуагъэхэми ягуапэ хъугъэ.

Адыгэ телевидением иIофышIэу Ахэ­джэго Рузанэ гущыIэр ыштагъ ыкIи ялIа­къо цIыф дэгъубэ — Ахэджэго Щэбанэ (музучилищым идиректорыгъ), зэ­лъашIэрэ апэрэ адыгэ режиссерэу Ахэджэго Мэджыдэ, ащ ыпхъоу Ахэ­джэго Лие — къызэрэхэкIыгъэхэр, нэмыкI гъэ­сэгъэ-еджэгъабэ зэряIэр кIигъэт­хъыгъ. Маринэ ахэм ялъэуж лъигъэкIуатэу, творчествэм зызэрэфигъэзагъэр ыкIи ар къызэрэдэхъущтыр къыIуагъ, фэгу­шIуагъ.

Ахэджэго Маринэ Нурбый ыпхъур къуаджэу Псэйтыку тыгъэгъазэм и 18-м 1979-рэ илъэсым къыщыхъугъ. 1996-рэ илъэсым Псэйтыку гурыт еджапIэр къы­ухи, Краснодар дэт институтым юрист сэнэхьатыр щызэригъэгъотыгъ. 2002-рэ илъэсым къыщегъэжьагъэу юристэу къалэу Краснодар Iоф щишIагъ.

2010 — 2013-рэ илъэсхэм кIэлэпIоу ыкIи унэе кIэлэцIыкIу IыгъыпIэм ипащэ иIэпыIэгъоу щытыгъ. Джырэ уахътэм зыфэгъэзагъэр иунагъу ыкIи творчествэр ары.

ЗэIукIэгъур цIыф гъашIэ пэпчъ щыIэныгъэм щыщ зэрэхъурэр уанэIу къыкIигъэуцоу гъэпсыгъагъэ. ЦIыфыр къэзыIэтэу, зыгъэлъэшэу, цIэрыIо зышIырэр гуетыныгъэ инэу Iофым фыриIэр ары, «Гъогу маф!» фэтэIо.

Дзэукъожь Нуриет. Сурэтхэр: Лъэпкъ тхылъеджапIэр. .