Джары «Бэщ фыжьым» и Дунэе мафэ мэхьэнэ шъхьаIэу иIэр, ар зэрыгъуазэрэр. 1987-рэ илъэсым къыщегъэжьагъэу мы мафэр Урысыем щыхагъэунэфыкIы.

Бэщ фыжьыр зымылъэгъухэрэм ятамыгъэ къодыеп, мыр яIэмэ-псым, анэхэм ачIыпI. ЛъэсрыкIо гъогум е нэмыкI лъэгапIэхэм бэщымкIэ затеохэкIэ, ащ пыIукIырэ макъэмкIэ къапыщылъыр зэрапэчыжьэр, зэлъэпэонхэ алъэкIыщт пкъыгъохэр къашIэх. Псауныгъэр къэу­хъумэгъэнымкIэ Дунэе организацием къызэритырэмкIэ, хьафизэ нэбгырэ миллион 39-рэ фэдиз ыкIи дэеу зылъэ­гъурэ миллион 246-рэ дунаим щэпсэу.

Илъэс къэс, хабзэ зэрэхъугъэу, чъэ­пыогъум и 15-м къыщегъэжьагъэу шэ­кIогъум и 15-м нэс зымылъэгъухэрэр зыхэлэжьэхэрэ Iофтхьабзэхэр рагъэ­кIокIых. Ахэм япшъэрылъ шъхьаIэр дунэе нэфым идэхагъэ зымылъэгъурэ хьафизэхэм яIофыгъохэм общественностым ынаIэ атырегъэдзэгъэныр ыкIи ящыкIэгъэ IэпыIэгъур аригъэгъотыныр ары. Ащ къыпкъырыкIыхэзэ зэIукIэгъухэр, лекциехэр, семинархэр, творческэ фестивальхэр, спорт зэнэкъокъухэр зэхащэх. Ахэм яшIуагъэкIэ сэкъатныгъэ зиIэхэр щыIэныгъэм хагъэгъуазэх, ягушъхьэбаиныгъэ хагъахъо.

Мыекъуапэ ыкIи Адыгэкъалэ, Мые­къопэ, Кощхьэблэ, Тэхъутэмыкъое районхэм марафонхэр ащыкIуагъэх. Ащ хэлэжьагъэх шъолъыр отделением иIоф­шIэн пэIуигъэхьащт шIушIэ IэпыIэгъу къязытыгъэхэр. Организацием иобщест­веннэ щыIэныгъэ чанэу хэлажьэхэрэр ыкIи хьафизэхэм я Урысые обществэ иветеранхэр къыхэдгъэщынхэр атефэ. КIуачIэу, амалэу яIэмкIэ щыIэныгъэм зэрэхэтхэмкIэ нэмыкIхэм ахэр щысэ афэхъух. МэфэкI концертхэм творческэ куп зэфэшъхьафхэр хэлэжьагъэх.

Сэкъатныгъэ зиIэхэу зипсауныгъэ амалхэр зэщыкъуагъэхэм ыкIи Iофтхьабзэхэм язэхэщакIохэм IэпыIэгъу къязытыгъэ шIушIакIохэм рэзэныгъэ гущыIэхэр хьафизэхэм я Урысые обществэ и Адыгэ шъолъыр отделение афегъазэх.