Предмет зэфэшъхьафхэмкIэ ушэтын­хэм зафагъэхьазырынымкIэ анахь анаIэ зытырагъэтын фэе лъэныкъохэу Рособрнадзорым иэкспертхэм ыкIи материалхэр зэхэзыгъэуцохэрэм къа­Iохэрэр «Урысые гъэзетым» итых.

ГущыIэм пае, географиер пштэмэ «определение азимута» ыкIи «построение профиля» зыфиIохэрэр хахыжьыщтых. УпчIэхэм япчъагъэ нахь макIэ ашIыгъ, ыпэкIэ 31-рэ хъущтыгъэхэмэ, джы 29-рэ зэрэхъухэрэр, къыхэгъэщыгъэн фае сыхьат пчъагъэр нахь макIэ зэрамышIыгъэр.

Экспертхэм зэрагъэнафэрэмкIэ, шIокI имыIэу терминологиер, географическэ объектхэр (псыхъохэм, хыхэм, къушъхьэхэм ацIэхэр) кIэлэеджакIохэм ашIэнхэ фае. Джащ фэдэу анахьыбэ зыщыпсэухэрэ хэгъэ­гухэм, ахэм къащыдагъэкIырэ продукцием афэгъэхьыгъэ IофшIэнхэр хэтынхэ ылъэкIыщт. Цифрэхэр зэрамыгъашIэми хъущт, ахэр статистическэ таблицэм хэтхэу къатыщтых. КартэхэмкIэ Iоф ашIэныр шIокI имыIэу щыт.

Хьисапыр пштэмэ, базовэ лъэныкъом зи зэхъокIыныгъэ фэхъущтэп. Профильнэм векторхэм Iоф зэрадашIэрэр къэзыгъэлъэгъорэ зы IофшIэн къыхэхъуагъ. Экспертхэм зэралъытэрэмкIэ, хьисапыр дэгъоу ныбжьыкIэхэм ашIэми, апшъэрэ еджапIэм чIэхьанхэмкIэ ямыщыкIэгъэщтмэ, профильнэ лъэныкъомкIэ заушэтымэ нахьышIу. Шъугу къэдгъэкIыжьын, зыкI къэралыгъо ушэтыным изэфэхьысыжьхэр илъэсиплIым къыкIоцI ныбжьыкIэхэм агъэфедэн алъэкIыщт.

 ДЕЛЭКЪО Анет.