Апэрэ илъэсхэм ялъытыгъэмэ къэIогъэн фае, кIэлэеджакIохэр нахь есагъэхэу ушэтынхэм къызэрякIуалIэхэрэр, гъэхъэгъэшIу­хэр зышIыхэрэр нахьыбэ зэрэхъурэр. ГъэрекIо предмет зэ­фэ­шъ­хьаф­хэмкIэ нэбгырэ 12-мэ балли 100 къырахыгъ.

Къэралыгъо аттестационнэ къулыкъум къызэриIуагъэмкIэ, зэрэ Урысые фэдэу пэшIорыгъэшъ ушэтынхэр гъэтхапэм и 22-м Адыгеим щаублэщтых, географиемрэ литературэмрэ мы мафэм атыщт. Гъэтхапэм и 26-м урысыбзэр, и 29-м хьисапыр. Мэлылъфэгъум и 2-м биологиемкIэ, IэкIыб къэралыгъуабзэхэмкIэ (тхэн IофшIэныр), физикэмкIэ, и 5-м IэкIыб къэралыгъуа­бзэхэмкIэ (жэрыIокIэ), и 9-м информатикэмкIэ, обществознаниемкIэ ыкIи и 12-м тарихъымкIэ, химиемкIэ ныбжьыкIэхэм заушэтыщт. Ушэтынхэм ятыгъо шъхьаIэ жъоныгъуакIэм и 23-м аублэщт. ГеографиемкIэ, литературэмкIэ, химиемкIэ заушэтыщт, и 28-м урысыбзэмкIэ, и 31-м лъэныкъуи­тIумкIи хьисапыр атыщт. Мэкъуогъум и 4-м общест­вознаниер, и 7-м ыкIи и 8-м информатикэр, и 10-м тарихъыр, физикэр, и 13-м биологиер, IэкIыб къэралыгъуабзэхэр (тхэн IофшIэныр), и 17-м ыкIи и 18-м IэкIыб къэралыгъуабзэхэр (жэрыIокIэ). Мы илъэсым гурыт еджапIэр къэзыухырэ нэбгырэ 1788-мэ зыкI къэралыгъо ушэтынхэм анэмыкIэу къы­чIэкIыгъо къэралыгъо ушэтыныр зытыщтхэри ахэтых. БлэкIыгъэ илъэсхэм афэдэу аттестатыр къаратыжьыным пае шIокI имыIэу урысыбзэмрэ хьисапымрэ атын фае, шъхьадж зычIэхьащтым елъытыгъэу предметхэр къыхехых. ШIокI зимыIэ ушэтынхэр зыфэмытыгъэхэм Iоныгъом и 4-м урысыбзэр, и 9-м базовэ хьисапыр атыжьыщт. Ащ нэмыкIэу Iоныгъом и 23-м базовэ хьисапымкIэ ыкIи урысыбзэмкIэ заушэтыжьын алъэ­кIыщт. КIэлэеджакIохэр мыщынэхэу ушэтынхэм къякIолIэнхэм фэшI Iофтхьэбзэ зэфэшъхьафхэр ренэу афызэхащэх, пчъагъэрэ пэшIорыгъэшъэу заушэты. 2024-рэ илъэсыр къызихьэкIэ Iофтхьабзэхэм язэхэщэн ыуж ихьащтых, Урысые Iофтхьабзэу «Сдаем вместе» зыфиIорэм хэлэжьэщтых. ДЕЛЭКЪО Анет.