Апшъэрэ еджапIэхэр
[caption id="attachment_142470" align="aligncenter" width="800"] ЗэIухыгъэ къэбарлъыгъэIэс амалхэр.[/caption]
Физикэ-хьисап ыкIи химикэ-биологическэ гъэсэныгъэм хэхъоныгъэхэр егъэшIыгъэнхэм фэгъэхьыгъэу зэхэсыгъо Москва къэралыгъо университетым бэмышIэу зэрэщыIагъэр «Урысые гъэзетым» къыхиутыгъ.
ФизикэмкIэ, химиемкIэ, биологиемкIэ ыкIи профильнэ хьисапымкIэ зызыушэтыхэрэм япчъагъэ илъэс къэс нахь макIэ зэрэхъурэр, гурыт баллэу къахьырэм зэрэхэкIырэр гумэкIыгъоу ащ къыщаIэтыгъэх.
Москва къэралыгъо университетым иректорэу Виктор Садовничэм зэрилъытэрэмкIэ, мы предметхэм язэгъэшIэн нахь мэхьанэ аратын, гурыт ыкIи апшъэрэ еджапIэхэм нахь игъэкIотыгъэу ащызэрагъэшIэн фае. Мы предметхэмкIэ атырэ зыкI къэралыгъо ушэтынхэм зэхъокIыныгъэхэр афэхъугъэх, джэуап тэрэзыр къызыщыхахыщтыгъэ IофшIэнхэр ахэтыжьхэп, джы анахьыбэмкIэ гурыт еджапIэр къэзыухыхэрэм задачэр къашIы ыкIи зэрашIыгъэр игъэкIотыгъэу къыраIотыкIы.
ФизикэмкIэ зыкI къэралыгъо ушэтыныр пштэмэ, IофшIэнхэр нахь макIэ зэрашIыгъэхэр, нахь къинхэр зэрэхагъэкIыгъэхэр къыIуагъ Московскэ физикэ-техническэ институтым иректорэу Дмитрий Ливановым.
Мы предметхэр языгъэхьыхэрэм апае Iофтхьэбзэ зэфэшъхьафхэр зэхащэн зэрэфаер зэхэсыгъом къыщаIуагъ ыкIи хьисапым изэгъэшIэнкIэ МГУ-м Урысые методическэ семинар щызэхащэнэу игъо алъэгъугъ.
— Семинарым изэхэщэн детэгъаштэ. Методическэ семинархэр хьисап закъомкIэ зэхамыщэу, гуманитар шIэныгъэхэми тынаIэ атедгъэтын фае. Ахэр зэгъусэхэ зыхъукIэ, Iофтхьабзэм нахь шIуагъэ къытыщт, — къыIуагъ просвещениемкIэ министрэу Сергей Кравцовым.
Зэхэсыгъом къыщаIэтыгъэ Iофыгъохэм ащыщ апшъэрэ еджапIэхэм яшапхъэхэр зэхъокIыгъэ зэрэхъущтхэр.
Шъхьадж сэнэхьатэу зэригъэгъотырэм елъытыгъэу лъэныкъо шъхьаIэхэр иIэнхэ зэрэфаер, гущыIэм пае, физикэмкIэ кIэлэегъэджэ сэнэхьат зэзыгъэгъотырэм физикэр, хьисапымкIэ кIэлэегъаджэхэм хьисапыр иIэн фаеу алъытагъ. Гурыт еджапIэр къэзыухырэм инженернэ сэнэхьатыр къыхихыгъэмэ, урысыбзэмкIэ ушэтыным зэфэхьысыжьэу фэхъугъэм нахь макIэу гъунэ лъафынэу къаIуагъ. Профильнэ инженернэ сэнэхьатхэр къыхэзыхыхэрэм информатикэмкIэ, физикэмкIэ ыкIи профильнэ хьисапымкIэ зыкI къэралыгъо ушэтынхэм язэфэхьысыжьхэр агъэфедэхэмэ нахь тэрэзэу зэралъытэрэр къыхагъэщыгъ.
Адыгэ къэралыгъо университетым «гъэсэныгъэ портфелыр» зэригъэкIэжьыгъэр ыкIи 2024-рэ илъэсым приемнэ кампанием зэхъокIыныгъэхэр зэрэфэхъущтхэр къеты. Ахэм зэу ащыщ ныбжьыкIэхэм ящэнэрэ ушэтынэу къыхахыщтыр зыфэдэщтым зэрэхагъэхъощтыр. ГущыIэм пае, юрист сэнэхьат зэзыгъэгъотыхэрэм обществознаниер ыкIи урысыбзэр шIокI имыIэу атын фае, ящэнэрэу къыхахын алъэкIыщт хьисапыр, инджылызыбзэр, информатикэр.
— Мы шIыкIэм ишIуагъэ къэкIощт, апшъэрэ еджапIэм чIэхьанхэр нахь псынкIэ къафэхъущт. Гъэсэныгъэ программэхэм ащыщэу предметипшIым яз джы хэдэнхэ алъэкIыщт, — къыщаIуагъ апшъэрэ еджапIэм.
Джырэ мафэхэм яхъулIэу хэгъэгу 42-мэ ыкIи шъолъыр 58-мэ къарыкIыгъэ студентхэр мы апшъэрэ еджапIэм щеджэх. Факультет 12 мэхъу ыкIи институти 2 хэт, ахэр научнэ-гъэсэныгъэ кластери 5-у зэпхыгъэх, джащ фэдэу гуманитар-техническэ колледжыр хэхьэ.
Мыекъопэ къэралыгъо технологическэ университетми зэхъокIыныгъэхэр фэхъущтых, ахэр нахь кIасэу къыхэтыутыщтых. ДЕЛЭКЪО Анет.