Гурыт еджапIэр къэзыухырэ кIэлэ­еджакIохэр зыкI къэралыгъо ушэтын­хэм якIолIэнхэм ифитыныгъэ къязы­тырэ сочинениер тыгъэгъазэм и 6-м атхыщт. [caption id="attachment_142483" align="aligncenter" width="800"] АМ.[/caption] АР-м икъэралыгъо аттестационнэ къулыкъу къызэрэщытаIуагъэмкIэ, нэбгырэ 1788-мэ еджапIэр къаухы, ахэм ащыщэу нэбгырэ 1775-мэ сочинение, 13-мэ изложение атхынэу щыт. Мы мафэм ар зыфэмытхыгъэ е ушъхьагъу гъэнэфагъэ иIэу емыкIолIэшъугъэхэр къэкIорэ илъэсым мэзаем и 7-м е мэлылъфэгъум и 10-м атхыжьын амал яIэщт. 2023 — 2024-рэ илъэс еджэгъум ушэтынхэр зэрэ­кIощтхэм зэхъокIыныгъэу къахэхьащтхэм ягугъу къэт­шIын. «Урысые гъэзетым» къызэритырэмкIэ, УФ-м просвещениемкIэ и Министерствэрэ Рособрнадзо­рымрэ мыщ фэгъэхьыгъэу проектыр агъэхьазырыгъ, ащ джыри зэхъокIыныгъэхэр фэхъунхэ ылъэкIыщт. ЗэрагъэнафэрэмкIэ, гъэтхапэм и 22-м пэшIоры­гъэшъ зыкI къэралыгъо ушэтынхэр аублэщтых. ЕджапIэр къэзыухыхэрэм мы мафэм географиемкIэ ыкIи литературэмкIэ заушэтын амал яIэщт. 2023 — 2024-рэ илъэс еджэгъум къыщегъэжьагъэу ащ ыпэрэ илъэсхэм еджапIэр къэзыухыгъэхэм пэшIорыгъэшъэу ушэтынхэр атыжьын амал яIэжьэп. Ар шэпхъакIэхэм ащыщ хъугъэ. Джы тыгъо шъхьаIэм иIэпэчIэгъэнэ мафэхэр ары ахэм зызаушэтын алъэкIыщтыр. Мы илъэс еджэгъум зэхъокIыныгъэу къыхэхьагъэхэм ащыщ хьисапымкIэ зызэраушэтыщт лъэныкъор зэбла­хъужьын зэралъэкIыщтыр, гущыIэм пае, базовэм ычIы­пIэкIэ профильнэр къыхахыжьын амал яIэщт. Ушэтыныр рагъэжьэнкIэ тхьамэфитIу нахь макIэ къэ­нагъэ зыхъукIэ, зэхъокIыныгъэ зи фэпшIыжьын плъэ­кIыщтэп. ЗыкI къэралыгъо ушэтынхэм ащагъэфедэрэ программнэ обеспечениер зэкIэ шIэхэу Урысыем къыщы­дагъэкIыщтых. — IофшIэнышхо ащ пылъ, 2026-рэ илъэсым нэс тыухынэу тэгъэнафэ, ау 2024-рэ илъэсым шъолъыр зэфэшъхьафхэм апэрэу урысые программнэ обеспечениер агъэфедэнэу щыт, — къыIуагъ Рособрнадзорым ипащэ игуадзэу Игорь Круглинскэм. 2024-рэ илъэсым зыкI къэралыгъо ушэтыным зэрэфэхьазырхэр мэзаем и 16-м, гъэтхапэм и 5-м, мэлылъфэгъум и 23-м ыкIи жъоныгъуакIэм и 15-м ауплъэкIун амал яIэщт. ПэшIорыгъэшъ ушэтынхэр IэпэчIэгъэнэ мафэхэр хэтхэу мэлылъфэгъум и 22-м нэс, ушэтын шъхьаIэр жъоныгъуакIэм и 23-м къыщегъэжьагъэу бэдзэогъум и 1-м нэс кIощтых. Урысыбзэр ыкIи хьисапыр зымытышъугъэхэм Iоныгъом и 4-м къыщегъэжьагъэу и 23-м нэс атыжьын амал яIэщт. ДЕЛЭКЪО Анет.