АР-м и Къэралыгъо Совет – Хасэм бюджет, финанс, хэбзэIахь ыкIи экономикэ политикэмкIэ, предпринимательствэмкIэ ыкIи IэкIыб зэпхыныгъэхэмкIэ и Комитет къи­хьащт 2024-рэ илъэс бюджетым ыкIи 2025 — 2026-мкIэ агъэнэфагъэхэм афэгъэхьыгъэ хэбзэгъэуцугъэм ипроект зыщытегущыIэгъэхэ игъэкIотыгъэ зэхэсыгъо непэ иIагъ.

Iофтхьабзэм хэлэжьагъэх Къэралыгъо Советым – Хасэм и Тхьаматэу Владимир Нарож­нэр, идепутатхэр, АР-м финанс­хэмкIэ иминистрэу Виктор Орловыр, федеральнэ ыкIи шъолъыр къулыкъу зэфэшъхьафхэм, муниципальнэ образова­ниехэм ялIыкIохэр, нэмыкIхэр. Зэхэсы­гъор зэрищагъ республикэ Парламентым и Тхьаматэ игуадзэу, бюджет, финанс, хэбзэIахь ыкIи экономикэ политикэмкIэ, предпринимательствэмкIэ ыкIи IэкIыб зэпхыныгъэхэмкIэ Комитетым ипащэу Iэщэ Мухьамэд.

Хэбзэгъэуцугъэм ипроектэу ятIонэрэ еджэгъум фагъэхьазырырэм мызыгъэгум гъэтэрэзыжьын 43-рэ фашIыгъ. Ахэр хэушъхьафыкIыгъэ цIыф купхэм Iэзэгъу уцхэр аIэкIэгъэхьэгъэнхэр, социальнэ псэуалъэхэм гъэстыныпхъэ шхъуантIэр ящэлIэгъэныр, сэкъатныгъэ зиIэхэм ыкIи зипсауныгъэ пыч фэхъугъэу, зекIоныр къызфэкъинхэм яегъэджэн, мэкъумэщ хъызмэтым пылъхэм IэпыIэгъу ятыгъэныр, кIэлэцIыкIухэм языгъэпсэфыгъо уахътэ изэхэщэн, апшъэрэ класс зиIэ спорт­сменхэм ягъэхьазырын ыкIи ахэр шъолъыр, Урысые, дунэе мэхьанэ зиIэ зэнэкъокъухэм ахэгъэлэжьэгъэнхэр ары зыфэгъэхьыгъэхэр. Анахь мэхьанэ ин зиIэр Урысые Федерацием и Президент 2012-рэ илъэсым унашъоу ышIыгъэм тетэу, бюджетым епхыгъэу Iоф зышIэ­хэрэм ащыщхэм ялэжьапкIэ къэIэтыгъэ­ным фэшI сомэ миллион 359-рэ мин 903-кIэ хъарджэхэр нахьыбэ шIыгъэнхэу къызщиIорэр.

Комитетыр гъэтэрэзыжьын пэпчъ тегущыIагъ ыкIи республикэмкIэ анахь зигъо­хэу, къэралыгъом ипащэ и Джэпсалъэ къыщыхигъэщыгъэхэм ягъэцэ­кIэн фытегъэпсыхьагъэхэм адыригъэш­тагъ.

АхъщэкIэ къэпIон зыхъукIэ, ар сомэ миллиардрэ миллион 272-рэ мэхъу.

Къихьащт 2024-рэ илъэс бюджетым ыкIи 2025 — 2026-мкIэ агъэнэфагъэхэм афэгъэхьыгъэ законопроектым гъэтэрэ­зыжьынэу фашIыгъэхэри хэтхэу къэкIощт тхьамафэм АР-м и Парламент изичэзыу зэхэсыгъоу иIэщтым ятIонэрэ еджэгъумкIэ къыхалъхьанэу зэдаштагъ.

ШIокI зимыIэ медицинэ страховани­емкIэ АР-м и ЧIыпIэ фонд 2024-рэ илъэсымкIэ ибюджет ыкIи 2025 — 2026-мкIэ агъэнэфагъэхэм афэгъэхьыгъэ хэб­зэ­гъэу­цугъэм ипроектэу ятIонэрэ еджэгъум фагъэхьазырыгъэм зыпари гъэ­тэ­рэ­зыжьын имыIэщтэу ары зэхэсы­гъом къызэрэщаIуагъэр. Ащи Парламен­тым изэхэсыгъоу къэблагъэрэм депутат­хэр щыхэплъэщтых.

ХЪУТ Нэфсэт.