МэшIоку гъогухэм ащызэхащэщтых
Темыр-Кавказ мэшIоку гъогум къыхиубытэрэ шъолъырхэм зэкIэми Iофтхьабзэу «Внимание, переезд!» зыфиIорэр мазэрэ ащыкIощт. Ар шэкIогъум и 20-м аублагъ.
МэшIоку гъогу зэпырыкIыпIэхэм ащыхъурэ авариехэр нахь макIэ шIыгъэнхэм афэIорышIэщт пэшIорыгъэшъ Iофтхьабзэхэр Къыблэ ыкIи Темыр-Кавказ федеральнэ шъолъырхэм якъоджэ псэупIэхэм ащызэхащэщтых. Транспорт амалхэм яводительхэу гъогурыкIоным ишапхъэхэр зыукъохэрэм якъыхэгъэщынкIэ рейдхэр рагъэкIокIыщтых. Джащ фэдэу цIыфхэм язещэн фэгъэзэгъэ автопредприятиехэм, автоеджапIэхэм зэдэгущыIэгъухэр, егъэджэгъу сыхьатхэр ащызэхащэщтых, шапхъэхэр зыукъорэ водительхэм пшъэдэкIыжьэу арагъэхьыщтыр къафаIотэщт.
Iофтхьабзэу «Внимание, переезд!» зыфиIорэм ипшъэрылъыр мэшIоку гъогу зэпырыкIыпIэхэм къатехъухьэрэ хъугъэ-шIагъэхэм япчъагъэ нахь макIэ шIыгъэныр ары. Зэфэхьысыжьхэм къызэрагъэлъэгъуагъэмкIэ, мыщ фэдэ чIыпIэхэм авариябэ къащэхъу ыкIи ахэр зэкIэ водительхэм ялажь. ШэкIогъум и 14-м ехъулIэу мэшIоку гъогухэм хъугъэ-шIэгъи 199-рэ къатехъухьагъэу агъэунэфыгъ, блэкIыгъэ илъэсым мыщ фэдэ иуахътэ егъэпшагъэмэ, ар процент 14-кIэ нахьыб.
Водительхэм сакъыныгъэ къызхагъэфэнэу ыкIи шIокI имыIэу гъогурыкIоным ишапхъэр агъэцэкIэнхэу Темыр-Кавказ мэшIоку гъогум закъыфегъазэ.