ЗэшIохыгъэр макIэп, ау джыри щыкIагъэхэр щыIэх
Гъэстыныпхъэ шхъуантIэр зимыIэхэм ящагухэм ыпкIэ хэмылъэу ящэлIэгъэным фытегъэпсыхьэгъэ программэр гъэцэкIагъэ зэрэхъурэм фэгъэзэгъэ шъолъыр штабэу Адыгеим щызэхащагъэм Мыекъопэ районым зэхэсыгъо щыриIагъ.
[caption id="attachment_142333" align="aligncenter" width="800"] ЗэIухыгъэ къэбарлъыгъэIэс амалхэр.[/caption]
Ар зэрищагъ АР-м и Къэралыгъо Совет – Хасэм и Тхьаматэу, штабым хэтэу Владимир Нарожнэм.
Зэхэсыгъом хэлэжьагъэх Къэралыгъо Советым – Хасэм идепутатхэр, АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур, Iахьзэхэлъ обществэу «Газпром межрегионгаз Майкоп» зыфиIорэм ипащэу ЕкъутэкI Аслъан, псэупIэ кой администрациехэм япащэхэр, народнэ депутатхэм я Совет хэтхэр, нэмыкIхэр.
Мыекъопэ районым щыпсэурэм ипроцент 60-р ары гъэстыныпхъэ шхъуантIэр зыIэкIахьэрэр. Ар имыIэу «догазификацием» фэгъэхьыгъэ программэм хэлэжьэнэу лъэIу тхылъ къэзытыгъэр унэгъо 3847-рэ мэхъу. Ахэм ащыщэу 3234-мэ газымкIэ шъолъыр компаниер зэзэгъыныгъэхэм адыкIэтхагъ, 2530-мэ ящагу гъунапкъэхэм афыращэлIагъ, унэм рищагъэу зыгъэфедэрэр 977-р ары.
Гъэстыныпхъэ шхъуантIэ зимыIэу «догазификацием» фэгъэхьыгъэ программэм къыхиубытэу мы муниципальнэ образованием щагу 4049-рэ ит. Арышъ, джыри 205-мэ ар афыращэлIэн алъэкIыщт.
Ахэм зэкIэми тхылъхэр къагъэхьазырыгъэхэп, къезыхьылIагъэхэми зэрищыкIагъэм тетэу зымыгъэпсыгъэхэр е псэупIэр ежьхэм зэряунаер икъоу къэзымыушыхьатышъугъэхэр къахэкIыгъэх. ПстэумкIи тхылъ 450-мэ арагъэгъэзэжьыгъ.
Анахьэу Iофхэр зыщылъымыкIуатэхэрэр Абдзэхэ ыкIи Дахъо псэупIэ койхэр ары. ГущыIэм пае, поселкэу Гъозэрыплъэ ищагу 84-р газыр ящэлIэгъэным техническэу фэхьазыр, ау лъэIу тхылъ къэзытыгъэр 38-рэ ныIэп. Станицэу Дахъор пштэмэ, ащ ищагу 869-мэ аращэлIэн алъэкIыщт, 256-р ары тхылъ къэзытыгъэр. Ахэм анэмыкIэу ауж къинэхэу ягугъу къашIыгъ поселкэу Усть-Сахрай, псэупIэхэу ХъымыщкIэй, Новосвободнэм.
ПсэупIэ кой администрациехэм япащэхэм зэхэсыгъом къызэрэщаIуагъэмкIэ, зыпари зыщымыпсэурэ унэхэр бэу ахэтых, псэупIэр бысымым зэриунаер къэзыушыхьатырэ тхылъхэр зыIэкIэмылъхэри къахэкIых.
— «Социальнэ догазификацием» фэгъэхьыгъэ проектым ипхырыщын, ащ къыдэлъытагъэхэр игъом ыкIи икъоу гъэцэкIэгъэнхэм апае хэбзэ къулыкъухэмрэ газымкIэ шъолъыр компаниемрэ Iоф зэдашIэн фае, — къыIуагъ Владимир Нарожнэм. — Уахътэу къэнагъэр макIэ, цIыфхэм тхылъхэр тэрэзэу агъэпсынхэмкIэ тадеIэныр шIокI зимыIэ Iоф. Программэм къыдэлъытагъэхэр, фэгъэкIотэнэу щыIэхэр, нэмыкIэу Iофым хэлъхэр икъоу алъыгъэIэсыгъэн фае. АР-м и ЛIышъхьэ программэр гъэцэкIагъэ зэрэхъурэм лъэплъэ, тэри тынаIэ тетынэу пшъэрылъ къытфишIыгъ.
НэмыкI лъэныкъоу программэм игъэцэкIэнкIэ анаIэ зытырагъэтын фаехэми игъэкIотыгъэу атегущыIагъэх. Шъугу къэдгъэкIыжьын, «догазификацием» фэгъэхьыгъэ программэр блэкIыгъэ 2022-рэ илъэсыр ары зежьагъэр, пIэлъэ гъэнэфагъэ иIэп. Урысые политическэ партиеу «Единэ Россиер» ащ кIэщакIо фэхъугъ, УФ-м и Президент къадыригъэштагъ. Владимир Путиным псэупIэу газыр зыдэщагъэхэм ар зимыIэу адэсхэм ящагу гъунапкъэхэм ыпкIэ хэмылъэу афынагъэсынэу пшъэрылъ къышIыгъ. ЦIыфхэм ежьхэм яунэ зэрэращэлIэщтымрэ зэрэщызэбгыращыщтымрэ зыпкIэ атырэр.
Адыгеим исэу гъэстыныпхъэ шхъуантIэр ищагу фыращалIэмэ шIоигъоу лъэIу тхылъ къэзытыгъэр 9796-рэ мэхъу, 8012-мэ зэзэгъыныгъэхэр адашIыгъэх, 6326-мэ ящагухэм афыращэлIагъ, 2216-мэ газыр афатIупщыгъэу агъэфедэ.
Мыекъопэ районым къыфэдгъэзэжьмэ, «догазификацием» фэгъэхьыгъэ программэм къыдэлъытагъэу щызэшIуахырэм нэмыкIэу, гъэстыныпхъэ шхъуантIэр цIыфхэм аIэкIэгъэхьэгъэным фытегъэпсыхьагъэм ишIуагъэкIэ псэупIэхэр зэзыпхырэ газрыкIуапIэу километрэ 32-рэ щагъэпсыщт, псэупIэ кIоцIхэм километрэ 16 ащызэбгыращыщт.
ХЪУТ Нэфсэт.