Адыгэ Республикэм и Правительствэ и Унэ непэ зэIукIэгъу щызэдыряIагъ Адыгеим и ЛIышъхьэу КъумпIыл Муратрэ Тырку Респуб­ликэм и Генеральнэ консулэу къалэу ЦIэ­мэз щыIэ Метин Озканрэ.

[caption id="attachment_142288" align="aligncenter" width="800"] А. Гусев.[/caption]

2023-рэ илъэсым чъэпыогъум а IэнатIэм ар Iуагъэхьэгъагъ ыкIи республикэм нэIуасэ зыфишIын гухэлъ иIэу къэкIуагъ. Ащ игъусагъэх Тырку Респуб­ликэм и Генконсульствэ сатыу IофхэмкIэ иатташеу Айданур Авджи Танышрэ Генконсульствэм иапэрэ секретарэу Севиля Шейховамрэ.

Адыгеимрэ Тыркуемрэ язэ­фы­щытыкIэхэм ягъэпытэн къы­ды­хэ­лъытагъэу язэпхыныгъэ­хэм хэхъоныгъэ ягъэшIыгъэным иIофыгъохэм зэIукIагъэхэр атегущыIагъэх. Ащ хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур, АР-м и ЛIышъхьэ иIэпыIэгъоу Хьакъунэ Беллэ, УФ-м IэкIыб къэрал IофхэмкIэ и Министерствэ и ЛIыкIо IофшIапIэ иапэрэ секретарэу Игорь Терзиян.

АР-м и ЛIышъхьэу КъумпIыл Мурат къыхигъэщыгъ урысые-тырку зэфыщытыкIэхэм ягъэ­пытэн иIахьышIу хишIыхьаным республикэр зэрэфэхьазырыр. А гухэлъыр зыдиIыгъэу Адыгеир ежь зыфэгъэзэгъэ лъэныкъохэм къапкъырыкIызэ товархэу ащ IэкIигъахьэхэрэр нахьыбэ зэришIыщтым ыкIи Тыркуем дыриIэ сатыу-экономикэ, куль­турнэ-гъэсэныгъэ зэпхыныгъэхэм зягъэушъомбгъугъэным, шIушIэ проектхэу Тыркуем щыпсэурэ адыгэхэм япхыгъэхэр гъэцэ­кIагъэ хъунхэм адэлажьэ.

«Тикъэралыгъохэм язэпхыны­гъэхэм алъапсэр типащэхэу Владимир Путинымрэ Реджеп Таийп Эрдоганрэ цыхьэзэфэ­шIыныгъэу азыфагу илъыр ары. Зигъо шъолъыр ыкIи дунэе Iофыгъохэм язэшIохынкIэ ащ ишIуагъэ къэкIо», — къыIуагъ Адыгеим и ЛIышъхьэ.

А гухэлъхэм атегъэпсыхьагъэу 2019-рэ илъэсым КъумпIыл Мурат зипэщэгъэ куп Тыркуем кIогъагъ. А лъэхъаным инвести­циехэмкIэ ыкIи экономикэмкIэ тишъолъыр амалэу иIэхэм нэ­Iуасэ афашIыгъагъэх. Мыекъуа­пэ­рэ Анкара имуниципальнэ район ыкIи къалэу Газиантеп къош зэфыщытыкIэхэр зэдыряе хъугъэх, джащ фэдэу Тэхъутэ­мыкъое районым къалэу Ине­гель зэзэгъыныгъэ дишIыгъ. Ащ нэужым дунэе мэхьанэ зиIэ бизнес Iофтхьэбзэ заулэмэ арыгущыIагъэх. 2022-рэ илъэсым Адыгеим къэралыгъо гъэпсыкIэ иIэ зыхъугъэм ия 100-рэ илъэс ихэгъэунэфыкIын къыдыхэ­лъытагъэу Тыркуем къикIыгъэ депутат купым IукIэ­гъагъэх, ащ ипэщагъ зэкъош­ныгъэмкIэ урысые-тырку парламент купым итхьамэтэгъоу Мурат Байбатур. Тыркуем щыпсэурэ тилъэп­къэгъухэм ялIыкIохэр илъэс къэс адыгэ культурэм ифести­вальхэм, адыгэ къуаем ифести­валь, джащ фэдэу культурэ ыкIи гъэсэныгъэ мэхьанэ зиIэ про­ект­хэм къахэ­лажьэх. Тыркуемрэ Урысыемрэ ащызэхэщэгъэ Адыгэ хасэхэм шIуагъэ къэзы­тырэ зэдэлэжьэ­ныгъэ азыфагу илъ.

АР-м и ЛIышъхьэ къыIотагъ Адыгеим амалэу иIэхэр, IэкIыб къэрал сатыум хэхъоныгъэу ышIырэм къытегущыIэ зэхъум республикэм анахьэу гъусэныгъэ зыдыриIэхэм Тыркуер зэра­щыщыр къыхигъэщыгъ, ахэм адакIоу гъэпсэфыпIэу «Лэгъо­накъэрэ» промышленнэ паркэу «Инэмрэ» ягъэпсынкIэ про­ектыш­хохэр гъэцэкIагъэ зэрэ­хъу­хэрэм щигъэгъозагъэх. «Адыгеимрэ Тыркуемрэ язэдэлэжьэныгъэкIэ мы зэIукIэ­гъум амалыкIэхэр къызэри­тыщтхэм, урысые-тырку зэфы­щы­тыкIэхэр тапэкIи нахь пытэнхэм зэрэфэлэжьэщтым сицыхьэ телъ. Тыркуем адыгабэ зэрэщыпсэурэм укъыпкъырыкIын хъумэ, тизэпхыныгъэхэр нахь пытэн­хэмкIэ лъэныкъуабэ дгъэ­фе­дэн тлъэкIыщт. А зэфыщы­тыкIэхэр джыри нахь дгъэпы­тэнхэм мэхьанэшхо иI», — къыхигъэщыгъ КъумпIыл Мурат.

Тыркуем и Генеральнэ консул къыIуагъ чIыгусысыным зэрар къызфихьыгъэхэм IэпыIэгъу зэраратыгъэм пае къызэра­фэразэр ыкIи Тырку Респуб­ликэм и ЛIыкIоу Москва щыIэм ыцIэ­кIэ шIуфэс гущыIэхэр къа­лъи­гъэIэсыжьыгъэх.

«Мы аужырэ илъэсхэм Тыр­куемрэ Урысыемрэ азыфагу илъ зэфыщытыкIэхэр лъэгэпIэ анахь иным нэсыгъэх. Ти Ген­консульствэ зыдэлажьэрэр эко­но­микэ, социальнэ ыкIи культурнэ зэпхыныгъэхэу шъо­лъыр­хэм адытиIэхэм тапэкIи нахь зягъэушъомбгъугъэныр ары. Кавказым щыпсэухэрэмрэ ахэм яIахьылхэу Тыркуем исхэм­рэ къошныгъэ зэфыщы­тыкIэу азыфагу илъхэр ары зэзыпхыхэрэр. А лъэмыджыр тизэдэлэжьэныгъэ гъэпытэ­гъэным лъапсэ фэхъу. Инвес­тициехэмкIэ амалхэм заушъомб­гъунымкIэ, социальнэ-культурнэ зэпхыныгъэхэр пытэнхэмкIэ ащ фэдэ зэфыщытыкIэхэм адетэгъаштэ ыкIи ахэр зэрэпы­тэщтхэм тынаIэ тедгъэтыщт», — къыIуагъ Метин Озкан.

ИкIэухым къызэрэхагъэщы­гъэмкIэ, лъэныкъуитIумкIи федэ къэзыхьырэ зэдэлэжьэныгъэм IофшIэным илъэныкъо зэфэшъ­хьафхэр къызэлъиу­бытынхэ фае. Сатыу ыкIи экономикэ зэпхыныгъэхэр, культурэмкIэ, гъэсэныгъэмкIэ, научнэ ыкIи гуманитарнэ проектхэмкIэ тизэдэлэжьэныгъэ тапэкIи хэхъоныгъэ егъэшIы­гъэным мэхьанэшхо зэриIэр къыха­гъэщыгъ. «Мой бизнес» зыфи­Iорэ Гупчэу Мыекъуапэ щыIэм щыкIогъэ зэIукIэгъум нахь игъэкIотыгъэу а Iофыгъохэм щахэплъагъэх. Шъугу къэтэ­гъэкIыжьы: Генеральнэ консульс­твэм къыфэгъэзагъэхэм къахеу­бытэх Краснодар краир, Ростов хэкур ыкIи Адыгэ Республикэр.

АР-м и ЛIышъхьэ ипресс-къулыкъу