Урысые научнэ-практическэ конференциеу «Къэралыгъуабэхэр Урысыем къызыщыпэуцугъэхэ лъэхъаным лъэпкъ щынэгъончъагъэр гъэпытэгъэнымкIэ стратегическэ лъэныкъохэр гъэнэфэгъэнхэр» зыфиIорэр Адыгэ къэралыгъо университетым щыкIуагъ.

Iофтхьабзэм къырагъэблэгъагъ МГИМО-м ипрофессорэу, технологическэ су­ве­ре­нитетымкIэ экспортым и Ассо­циацие ипрезидентэу, зэдэгущыIэгъу клубэу «Валдай» зыфиIорэм иэкспертэу, разведчик-нелегалэу, IэкIыб разведкэмкIэ къулыкъум иполковникэу запасым щыIэ Андрей Безруковыр.

Джащ фэдэу конференцием хэлэжьа­гъэх АР-м терроризмэм пэуцужьы­гъэнымкIэ икомиссие и Аппарат ипащэу ЛIый Азамат, лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ипащэу Шъхьэлэхъо Аскэр, гукъэкIхэм яушэ­тынкIэ департаментым ипащэу Елена Куква, шIэныгъэлэжьхэр, хэбзэухъумэкIо къу­лы­къу­хэм, общественнэ организа­циехэм ялIыкIохэр, динлэжьхэр.

Iофтхьабзэм ипшъэрылъ шъхьаIэр – Урысые Федерациер гумэкIыгъо лъэхъан зыщыхэтым лъэпкъ щынэгъончъагъэр гъэпытэгъэнымкIэ стратегическэ лъэны­къохэм атегущыIэнхэр, екIолIакIэхэр къыхэхыгъэнхэр.

Мы илъэс благъэхэм Урысыем ыкIи дунаим апашъхьэ къиуцон ылъэкIыщт гумэкIыгъо шъхьаIэхэм къатегущыIагъ Андрей Безруковыр.

— Урысыер ыкIи зэрэдунаеу лъэхъэнэ къин зыхахьэхэрэр. Ащ фэдэ илъэсишъэм зэ мэхъу. Пстэури икIэрыкIэу зэте­гъэпсыхьажьыгъэ хъущт ыкIи илъэс 20 зытешIэкIэ, тикъэралыгъуи, дунаири зыфэдэ хъущтхэр къэтшIэжьыщтхэп. Хэхъоныгъэ зыщашIыщт лъэхъанэп къакIорэр, къызэтегъэнэгъэным тызщыфэбэнэщтым тыхэхьэ. Ар дэгъоу къыздэхъущтыр зыпкъитыныгъэр зыщагъэпсын алъэкIыщт къэралыгъор ары. Мыщ фэдэ гъогум илъэси 100-кIэ узэкIэIэбэжьымэ, 1917-рэ илъэсым Урысыер къырыкIуагъ. Ау ащ дэжьым зыпкъитыныгъэр чIэтынэнэу зэрэхъу­гъагъэм къиныгъуабэ къыздихьыгъ. Джыри зэ а гъогум тырымыкIожьыным пае зэкIэми тфэлъэкIыщтыр тшIэныр пшъэрылъ шъхьаIэу тиIэн фае. Тикъэралыгъо экономическэ хэхъоныгъэ иIэу, ицыхьэ зытелъыжьэу къызэтед­гъэнэным тынаIэ тедгъэтыщыт. Ащ епхыгъэ Iофыгъохэм ныбжьыкIэхэр къахэлэжьэнхэу щыт. ЩыпсэунхэмкIэ амалышIухэр зиIэ, IофшIапIэхэр зыдэщыIэщтхэ къэралыгъо ахэм агъэпсын фае, — хигъэунэфыкIыгъ Андрей Безруковым.

КъохьэпIэ къэралыгъохэр къызыщы­пэуцугъэхэ лъэхъаным Урысыем ищынэ­гъончъагъэ зыукъон зылъэкIыщт кIуачIэ­хэм апэуцужьыгъэнхэм къатегущыIагъ Адыгэ къэралыгъо университетым ипрофессорэу Жэдэ Зурыет.

«Гибридные войны» и «цветные рево­люции» как инструмент достижения геополитеческих целей» зыфиIорэ доклад гъэшIэгъон къышIыгъ стратегическэ ушэтынхэмкIэ институтэу Москва дэтым ипащэу Дмитрий Егорченковым.

Iофтхьабзэм икIэухым хэгъэгум къыщыхъурэ гумэкIыгъохэм ялъэхъан зэщыхъокIо кIуачIэу къыкъокIыхэрэм ныбжьыкIэхэр амыгъэплъэхъунхэм, дин ыкIи лъэпкъ зэгурымыIоныгъэхэм ахэща­гъэ мыхъунхэм япхыгъэ Iофтхьабзэхэм къатегущыIагъ АР-м терроризмэм пэуцужьыгъэнымкIэ икомиссие и Аппарат ипащэу ЛIый Азэмат. Нэужым къырагъэблэгъэгъэ хьакIэу Андрей Безруковым апшъэрэ еджапIэм истудентхэм зэIукIэгъу адыриIагъ.

IЭШЪЫНЭ Сусан. Сурэтхэр: АКъУ-р.