Пэтхъу-Iутхъум дакIоу зэпа­хырэ узэу коронавирусыр республикэм джыри къыще­кIокIы.

Ащ епхыгъэу эпидемиологием изытет къытедгъэгущыIагъ щэфакIохэм яфитыныгъэхэр ыкIи цIыфым игупсэфыныгъэ къэу­хъумэгъэнхэмкIэ Федеральнэ къулыкъум и ГъэIорышIапIэу Адыгэ Республикэм щыIэм эпидемиологие лъыплъэнымкIэ иотдел ипащэ игуадзэу Iэшъынэ Нэфсэт.

Ащ къызэрэхигъэщыгъэмкIэ, бжыхьэ лъэхъаныр къызежьэм, ковидыр къызэузыхэрэм япчъа­гъэ нахь хахъоу фежьагъ, ау эпидемиологие шэпхъэ гъэнэфагъэхэм ашъхьадэкIырэп.

— Зэпахырэ узэу коронавирусыр икIыгъэ я 46-рэ тхьамафэм нэбгырэ 31-мэ къаха­гъэщыгъ, — еIо Iэшъынэ Нэфсэт. — Ащ ыпэрэ тхьама­фэми нэбгырэ 31-рэ атхыгъэр. Тхьамафэ къэс коронавирусыр къызэузыхэрэм япчъагъэ зэ­блэхъугъэ мэхъу. Узыр анахьэу къызхагъэщыхэрэр ныбжь зиIэ­хэр ары, кIэлэцIыкIоу къы-зэутэ­кIыгъэр зырыз дэд. Ковид лъэп­къэу «омикроныр» ары сымаджэхэм къахагъэщырэр.

Мы пчъагъэхэр нахьыбэнкIи хъун, сыда пIомэ экспресс-тес­тым коронавирус цIыфым иIэу къыгъэлъэгъуагъэми, узыр къе­мыхьылъэкIы зыхъукIэ лабораторнэ уплъэкIун аримыгъэшIэу мэхъу. Экспресс-тестхэм яшIуа­гъэкIэ такъикъи 10 — 15-м къыкIоцI зэпахырэ узхэм ащыщэу гриппэу А-р ыкIи В-р, коронавирусыр сымаджэм иIэмэ къашIэн алъэкIы.

Джащ фэдэу тигущыIэгъу къызэриIуагъэмкIэ, тыгъэгъазэм жъугъэу къекIокIырэ узхэм ащыщ сымэджэщым къыщамыубытыгъэ тхьабыл плъыр-стыр узыр (пневмониер). Ау зигугъу къэтшIырэ тхьамафэми ар нэбгырищмэ къяузыгъ.

Бжыхьэ лъэхъаныр къызихьагъэм къыщегъэжьагъэу гриппыр къеутэкIыгъэу зы нэбгырэ сы­мэджэщым чIэфагъ. Ащ гриппым пэуцужьырэ вакцинэр хэ­лъы­гъэп. Ари хъужьи, къычIэкIы- жьыгъ.

ЩэфакIохэм яфитыныгъэхэр ыкIи цIыфым игупсэфыныгъэ къэухъумэгъэнхэмкIэ Федеральнэ къулыкъум и ГъэIорышIапIэу Адыгэ Республикэм щыIэм цIыфхэм зафегъазэ зэпахырэ узхэм зыщаухъумэнэу, общест­веннэ ыкIи цIыфыбэ зыщызэрэугъоирэ чIыпIэхэм нахь макIэу кIонхэу, ащ фэдэ чIыпIэхэм нэгуIухъор ащагъэфедэнэу, аIэ­хэр бэрэ атхьакIынхэу ыкIи жьы къабзэр унэм рагъахьэзэ ашIынэу.

Iэшъынэ Сусан.