Лъэпкъхэр зэзыпхырэ фестиваль
Адыгэ къэралыгъо университетым лъэпкъ культурэхэм яфестиваль щырагъэкIокIыгъ. НыбжьыкIэ IофхэмкIэ Федеральнэ агентствэм игрант IэпыIэгъукIэ мы илъэсым ар зэхащагъ.
МэфитIум къыкIоцI апшъэрэ еджапIэм щеджэрэ студентхэр шэн-хабзэхэм якъэухъумэн фэгъэхьыгъэ Iофтхьэбзэ зэфэшъхьафхэм ахэлэжьагъэх. Урысыем щыпсэурэ лъэпкъ зэфэшъхьафхэм къахэкIыгъэ ыкIи IэкIыб къэралыгъохэм къарыкIыгъэ студент миным ехъу мыщ щеджэ.
Лъэпкъ хабзэхэр къызэтегъэнэжьыгъэнхэр, хэхъоныгъэ ягъэшIыгъэныр, лъэпкъхэм якультурэ ыкIи яIэшIагъэхэм нэмыкIхэр нэIуасэ афэшIыгъэнхэр, студентхэм азыфагу зэгурыIоныгъэ илъыныр ары зэхэщакIохэм пшъэрылъ шъхьаIэу зыфагъэуцужьырэр. ЦIыф лъэпкъ зэфэшъхьафхэм ятарихъ, яшэн-зэхэтыкIэхэр ныбжьыкIэхэм ашIэнхэ, ахэм лъытэныгъэ афашIын фае. НыбжьыкIэхэм лъэпкъ зэгурыIоныгъэ азыфагу илъыным, IэкIыб къэралхэм къарыкIыгъэ студентхэм еджэныр къин къащымыхъуным афэгъэхьыгъэ Iофыгъохэм ыкIи нэмыкIхэм защытегущыIэгъэхэ Iэнэ хъураемкIэ фестивалыр къызэIуахыгъ.
Iофтхьабзэм къыдыхэлъытагъэу лъэпкъ зэфэшъхьафхэм яшхыныгъохэр студентхэм къагъэхьазырыгъэх. Iанэм гъомылэпхъэ бэдэдэ тетыгъ, шъхьадж илъэпкъ ишхыныгъо, ишъуашэ къагъэлъэгъуагъэх. Мы мафэр адыгэ уджкIэ аухыгъ.
«Тызэфэдэп, ау тызэгъус» зыфиIорэ IофтхьабзэмкIэ фестивалым иятIонэрэ мафэ зэфашIыжьыгъ.
Адыгеим итарихъ, ичIыопс ябаиныгъэ фэгъэхьыгъэ къэгъэлъэгъоным Iофтхьабзэр къыгъэдэхагъ, пщынэ мэкъамэм, адыгэ орэдым къэзэрэугъоигъэхэр едэIугъэх. Нэужым Армением, Абхъазым, Грузием, Конго, Сирием, Тыркуем, Узбекистан, Урысыем афэгъэхьыгъэ видео техыгъэхэм арагъэплъыгъэх, мыхэм якультурэ, яшэн-хабзэхэр къизыIотыкIырэ къэгъэлъэгъонхэр къашIыгъэх, усэхэм къяджагъэх.
Лъэпкъэу къызхэкIыгъэхэм ыкIи динэу алэжьырэм ямылъытыгъэу апшъэрэ еджапIэм щеджэхэрэр Iофтхьабзэм зэфищагъэх. Мы мафэм нэбгырэ пэпчъ икультурэ зэрэбаир къыгъэлъэгъуагъ. ДЕЛЭКЪО Анет.
Сурэтхэр: АКъУ.