Командэ 16 хэлэжьагъ
Мыекъуапэ испорт еджапIэу С. М. Джэнчатэм ыцIэ зыхьырэм зыщызыгъэсэрэ гандболисткэхэм Краснодар щыкIогъэ зэнэкъокъум ятIонэрэ чIыпIэр къыщыдахыгъ.
Адыгеим икъэлэ шъхьаIэ командитIумэ къагъэлъэгъуагъ, ахэм ахэтхэм аныбжь илъэс 12-м шIокIырэп. Тренерхэр Валерий Гончаррэ Дарья Силантьевамрэ.
Зэнэкъокъум Краснодар, Мыекъуапэ, Шъачэ, Тимашевскэ, Шытхьалэ, Волгоград, Ростов на-Дону, станицэхэу Ленинградскэм ыкIи Выселки якомандэхэр хэлэжьагъэх, зэкIэмкIи командэ 18.
ЕшIэгъухэр гъэшIэгъонэу кIуагъэх, 2011-рэ илъэсым къэхъугъэхэм якомандэ анахь дэгъуи 4-м Мыекъуапэ къэзыгъэлъэгъуагъэр ахэфагъ. Типшъашъэхэм зэIукIэгъуищэу яIагъэм ащыщэу тIур къахьыгъ, къатекIуагъэхэр Краснодар икомандэу «Аврора» зыфиIорэр ары, пчъагъэр — 9:10. Мыекъуапэ игандболисткэхэм тыжьын медальхэр къафагъэшъошагъ.
Адыгеим икъэлэ шъхьаIэ иятIонэрэ командэ зэнэкъокъум ябгъонэрэ чIыпIэр щиубытыгъ. Ари зэфэхьысыжь дэеп, сыда пIомэ мы пшъашъэхэр зэкIэми анахьыкIагъэх.