Тымакъэхэр фэтэжъугъэтых
АР-м и Лъэпкъ театрэу Цэй Ибрахьимэ ыцIэ зыхьырэр шIухьафтынэу «Звезда театрала» зыфиIорэм икъыдэхын хэлажьэ.
[caption id="attachment_142045" align="aligncenter" width="800"] АР-м итеатральнэ зэхахьэ ихъарзынэщ.[/caption]
«Лъэпкъ театрэ анахь дэгъу» зыфиIорэ лъэныкъомкIэ пэрытныгъэр зыIыгъ театрищымэ АР-м и Лъэпкъ театрэ ахэфагъ. Инэкъокъогъухэр республикэу Карелием и Лъэпкъ театрэрэ Татарстан итеатрэу Камала ыцIэ зыхьырэмрэ. Къэнагъэр ахэм макъэу афатырэм елъытыгъэу чIыпIэхэр агъэнэфэнхэр ары. АР-м итеатральнэ зэхахьэ ипресс-къулыкъу къызэриIорэмкIэ, ахэри театрэ лъэшых. IофшIэгъу илъэсипшI пчъагъэхэр къызэранэкIыгъэх, творческэ гъоу бай къакIугъ, къэралыгъо щытхъуцIэхэр мызэу, мытIоу къалэжьыгъэх.
Къыхэгъэщыгъэн фае, «Лъэпкъ театрэ анахь дэгъу» зыфиIорэ лъэныкъор загъэнэфагъэр бэшIагъэп. ИлъэскIэ узэкIэIэбэжьмэ зэнэкъокъум хагъэхьагъ. Ащ хэлэжьэн зылъэкIхэрэр тарихъ бай зиIэ Лъэпкъ театрэхэу, лъэпкъ культурэм ыкIи искусствэм зыцIэ щыIугъэхэу, шэн-хабзэхэр къэзыухъумэхэрэр ары. Ахэм яз АР-м и Лъэпкъ театрэу Цэй Ибрахьимэ ыцIэ зыхьырэр. Ащ зымакъэ фэзыты зышIоигъохэм шэкIогъум и 30-м нэс уахътэ яI. Ар зэрэшъушIыщт шIыкIэр АР-м итеатральнэ зэхахьэ ихъытыу нэкIубгъо ижъугъотэщт. Зэфэхьысыжьхэр тыгъэгъазэм и 4-м къэнэфэщтых. Ащ фэгъэхьыгъэ мэфэкI зэхахьэ театрэу Вахтанговым ыцIэ зыхьырэм щыкIощт.
Анцокъо Ирин.